3.26

योगं च तं योग्यतमाय तस्मै तपःप्रभावाद् विततार सद्यः

yogaṃ ca taṃ yogyatamāya tasmai tapaḥprabhāvād vitatāra sadyaḥ

3.26.2

येनास्य तत्त्वेषु कृते ऽवभासे समुन्मिमीलेव चिराय चक्षुः

yenāsya tattveṣu kṛte 'vabhāse samunmimīleva cirāya cakṣuḥ

3.27

आकारम् आशंसितभूरिलाभं दधानम् अन्तःकरणानुरूपम्

ākāram āśaṃsitabhūrilābhaṃ dadhānam antaḥkaraṇānurūpam

3.27.2

नियोजयिष्यन् विजयोदये तं तपःसमाधौ मुनिर् इत्य् उवाच

niyojayiṣyan vijayodaye taṃ tapaḥsamādhau munir ity uvāca

3.28

अनेन योगेन विवृद्धतेजा निजां परस्मै पदवीम् अयच्छन्

anena yogena vivṛddhatejā nijāṃ parasmai padavīm ayacchan

3.28.2

समाचराचारम् उपात्तशस्त्रो जपोपवासाभिषवैर् मुनीनाम्

samācarācāram upāttaśastro japopavāsābhiṣavair munīnām

3.29

करिष्यसे यत्र सुदुश्चराणि प्रसत्तये गोत्रभिदस् तपांसि

kariṣyase yatra suduścarāṇi prasattaye gotrabhidas tapāṃsi

3.29.2

शिलोच्चयं चारुशिलोच्चयं तम् एष क्षणान् नेष्यति गुह्यकस् त्वाम्

śiloccayaṃ cāruśiloccayaṃ tam eṣa kṣaṇān neṣyati guhyakas tvām

3.30

इति ब्रुवाणेन महेन्द्रसूनुं महर्षिणा तेन तिरोबभूवे

iti bruvāṇena mahendrasūnuṃ maharṣiṇā tena tirobabhūve

3.30.2

तं राजराजानुचरो ऽस्य साक्षात् प्रदेशम् आदेशम् इवाधितस्थौ

taṃ rājarājānucaro 'sya sākṣāt pradeśam ādeśam ivādhitasthau

3.31

कृतानतिर् व्याहृतसान्त्ववादे जातस्पृहः पुण्यजनः स जिष्णौ

kṛtānatir vyāhṛtasāntvavāde jātaspṛhaḥ puṇyajanaḥ sa jiṣṇau

3.31.2

इयाय सख्याविव सम्प्रसादं विश्वासयत्याशु सतां हि योगः

iyāya sakhyāviva samprasādaṃ viśvāsayatyāśu satāṃ hi yogaḥ

3.32

अथोष्णभासेव सुमेरुकुञ्जान् विहीयमानान् उदयाय तेन

athoṣṇabhāseva sumerukuñjān vihīyamānān udayāya tena

3.32.2

बृहद्द्युतीन् दुःखकृतात्मलाभं तमः शनैः पाण्डुसुतान् प्रपेदे

bṛhaddyutīn duḥkhakṛtātmalābhaṃ tamaḥ śanaiḥ pāṇḍusutān prapede

3.33

असंशयालोचितकार्यनुन्नः प्रेम्णा समानीय विभज्यमानः

asaṃśayālocitakāryanunnaḥ premṇā samānīya vibhajyamānaḥ

3.33.2

तुल्याद् विभागाद् इव तन्मनोभिर् दुःखातिभारो ऽपि लघुः स मेने

tulyād vibhāgād iva tanmanobhir duḥkhātibhāro 'pi laghuḥ sa mene

3.34

धैर्येण विश्वास्यतया महर्षेस् तीव्राद् अरातिप्रभवाच्च मन्योः

dhairyeṇa viśvāsyatayā maharṣes tīvrād arātiprabhavācca manyoḥ

3.34.2

वीर्यं च विद्वत्सु सुते मघोनः स तेषु न स्थानम् अवाप शोकः

vīryaṃ ca vidvatsu sute maghonaḥ sa teṣu na sthānam avāpa śokaḥ

3.35

तान् भूरिधाम्नश्चतुरो ऽपि दूरं विहाय यामान् इव वासरस्य

tān bhūridhāmnaścaturo 'pi dūraṃ vihāya yāmān iva vāsarasya

3.35.2

एकौघभूतं तद् अशर्म कृष्णां विभावरीं ध्वान्तम् इव प्रपेदे

ekaughabhūtaṃ tad aśarma kṛṣṇāṃ vibhāvarīṃ dhvāntam iva prapede

Kirātārjunīya