2.55

मधुरैर् अवशानि लम्भयन्न् अपि तिर्यञ्चि शमं निरीक्षितैः

madhurair avaśāni lambhayann api tiryañci śamaṃ nirīkṣitaiḥ

2.55.2

परितः पटु बिभ्रद् एनसां दहनं धाम विलोकनक्षमम्

paritaḥ paṭu bibhrad enasāṃ dahanaṃ dhāma vilokanakṣamam

2.56

सहसोपगतः सविस्मयं तपसां सूतिर् असूतिर् एनसाम्

sahasopagataḥ savismayaṃ tapasāṃ sūtir asūtir enasām

2.56.2

ददृशे जगतीभुजा मुनिः स वपुष्मान् इव पुण्यसंचयः

dadṛśe jagatībhujā muniḥ sa vapuṣmān iva puṇyasaṃcayaḥ

2.57

अथोच्चकैर् आसनतः परार्ध्याद् उद्यन् स धूतारुणवल्कलाग्रः

athoccakair āsanataḥ parārdhyād udyan sa dhūtāruṇavalkalāgraḥ

2.57.2

रराज कीर्णाकपिशांशुजालः शृङ्गात् सुमेरोर् इव तिग्मरश्मिः

rarāja kīrṇākapiśāṃśujālaḥ śṛṅgāt sumeror iva tigmaraśmiḥ

2.58

अवहितहृदयो विधाय स अर्हाम् ऋषिवद् ऋषिप्रवरे गुरूपदिष्टाम्

avahitahṛdayo vidhāya sa arhām ṛṣivad ṛṣipravare gurūpadiṣṭām

2.58.2

तदनुमतम् अलंचकार पश्चात् प्रशम इव श्रुतम् आसनं नरेन्द्रः

tadanumatam alaṃcakāra paścāt praśama iva śrutam āsanaṃ narendraḥ

2.59

व्यक्तोदितस्मितमयूखविभासितोष्ठस् तिष्ठन् मुनेर् अभिमुखं स विकीर्णधाम्नः

vyaktoditasmitamayūkhavibhāsitoṣṭhas tiṣṭhan muner abhimukhaṃ sa vikīrṇadhāmnaḥ

2.59.2

तन्वन्तम् इद्धम् अभितो गुरुम् अंशुजालं लक्ष्मीम् उवाह सकलस्य शशाङ्कमूर्तेः

tanvantam iddham abhito gurum aṃśujālaṃ lakṣmīm uvāha sakalasya śaśāṅkamūrteḥ

3.1

ततः शरच्चन्द्रकराभिरामैर् उत्सर्पिभिः प्रांशुम् इवांशुजालैः

tataḥ śaraccandrakarābhirāmair utsarpibhiḥ prāṃśum ivāṃśujālaiḥ

3.1.2

बिभ्राणम् आनीलरुचं पिशङ्गीर् जटास् तडित्वन्तम् इवाम्बुवाहम्

bibhrāṇam ānīlarucaṃ piśaṅgīr jaṭās taḍitvantam ivāmbuvāham

3.2

प्रसादलक्ष्मीं दधतं समग्रां वपुःप्रकर्षेण जनातिगेन

prasādalakṣmīṃ dadhataṃ samagrāṃ vapuḥprakarṣeṇa janātigena

3.2.2

प्रसह्य चेतःसु समासजन्तम् असंस्तुतानाम् अपि भावम् आर्द्रम्

prasahya cetaḥsu samāsajantam asaṃstutānām api bhāvam ārdram

3.3

अनुद्धताकारतया विविक्तां तन्वन्तम् अन्तःकरणस्य वृत्तिम्

anuddhatākāratayā viviktāṃ tanvantam antaḥkaraṇasya vṛttim

3.3.2

माधुर्यविस्रम्भविशेषभाजा कृतोपसम्भाषम् इवेक्षितेन

mādhuryavisrambhaviśeṣabhājā kṛtopasambhāṣam ivekṣitena

3.4

धर्मात्मजो धर्मनिबन्धिनीनां प्रसूतिम् एनःप्रणुदां श्रुतीनाम्

dharmātmajo dharmanibandhinīnāṃ prasūtim enaḥpraṇudāṃ śrutīnām

3.4.2

हेतुं तदभ्यागमने परीप्सुः सुखोपविष्टं मुनिम् आबभाषे

hetuṃ tadabhyāgamane parīpsuḥ sukhopaviṣṭaṃ munim ābabhāṣe

3.5

अनाप्तपुण्योपचरैर् दुरापा फलस्य निर्धूतरजाः सवित्री

anāptapuṇyopacarair durāpā phalasya nirdhūtarajāḥ savitrī

3.5.2

तुल्या भवद्दर्शनसम्पद् एषा वृष्टेर् दिवो वीतबलाहकायाः

tulyā bhavaddarśanasampad eṣā vṛṣṭer divo vītabalāhakāyāḥ

Kirātārjunīya