Dharmalib

121–140 of 801 verses

2.2

केचिद् ओजोऽभिधित्सन्तः समस्यन्ति बहून्यपि

kecid ojo'bhidhitsantaḥ samasyanti bahūnyapi

2.2.2

यथा मन्दारकुसुमरेणुपिञ्जरितालका

yathā mandārakusumareṇupiñjaritālakā

2.3

श्रव्यं नातिसमस्तार्थं काव्यं मधुरमिष्यते

śravyaṃ nātisamastārthaṃ kāvyaṃ madhuramiṣyate

2.3.2

आ विद्वदङ्गनाबालप्रतीतार्थं प्रसादवत्

ā vidvadaṅganābālapratītārthaṃ prasādavat

2.4

अनुप्रासः सयमको रूपकं दीपकोपमे

anuprāsaḥ sayamako rūpakaṃ dīpakopame

2.4.2

इति वाचामलंकाराः पञ्चैवान्यैर् उदाहृताः

iti vācāmalaṃkārāḥ pañcaivānyair udāhṛtāḥ

2.5

सरूपवर्णविन्यासम् अनुप्रासं प्रचक्षते

sarūpavarṇavinyāsam anuprāsaṃ pracakṣate

2.5.2

किंतया चिन्तया कान्ते नितान्तेति यथोदितम्

kiṃtayā cintayā kānte nitānteti yathoditam

2.6

ग्राम्यानुप्रासम् अन्यत्तु मन्यन्ते सुधियो ऽपरे

grāmyānuprāsam anyattu manyante sudhiyo 'pare

2.6.2

स लोलमालानीलालिकुलाकुलगलो बलः

sa lolamālānīlālikulākulagalo balaḥ

2.7

नानार्थवन्तो ऽनुप्रासा न चाप्यसदृशाक्षराः

nānārthavanto 'nuprāsā na cāpyasadṛśākṣarāḥ

2.7.2

युक्त्यानया मध्यमया जायन्ते चारवो गिरः

yuktyānayā madhyamayā jāyante cāravo giraḥ

2.8

लाटीयम् अप्यनुप्रासम् इहेच्छन्त्यपरे यथा

lāṭīyam apyanuprāsam ihecchantyapare yathā

2.8.2

दृष्टिं दृष्टिसुखां धेहि चन्द्रश्चन्द्रमुखोदितः

dṛṣṭiṃ dṛṣṭisukhāṃ dhehi candraścandramukhoditaḥ

2.9

आदिमध्यान्तयमकं पादाभ्यासं तथावली

ādimadhyāntayamakaṃ pādābhyāsaṃ tathāvalī

2.9.2

समस्तपादयमकमित्येतत् पञ्चधोच्यते

samastapādayamakamityetat pañcadhocyate

2.10

संदष्टकसमुद्गादेर् अत्रैवान्तर्गतिर् मता

saṃdaṣṭakasamudgāder atraivāntargatir matā

2.10.2

आदौ मध्यान्तयोर्वा स्यादिति पञ्चैव तद्यथा

ādau madhyāntayorvā syāditi pañcaiva tadyathā

2.11

साधुना साधुना तेन राजता राजता भृता

sādhunā sādhunā tena rājatā rājatā bhṛtā

2.11.2

सहितं सहितं कर्तुं संगतं संगतं जनम्

sahitaṃ sahitaṃ kartuṃ saṃgataṃ saṃgataṃ janam