5.27

साध्येन लिङ्गानुगीतस्तदभावे च नास्तिता

sādhyena liṅgānugītastadabhāve ca nāstitā

5.27.2

ख्याप्यते येन दृष्टान्तः स किलान्यैर्द्विधोच्यते

khyāpyate yena dṛṣṭāntaḥ sa kilānyairdvidhocyate

5.28

दूषणन्यूनताद्युक्तिर्न्यूनं हेत्वादिनात्र च

dūṣaṇanyūnatādyuktirnyūnaṃ hetvādinātra ca

5.28.2

तन्मूलत्वात्कथायाश्च न्यूनं नेष्टं प्रतिज्ञया

tanmūlatvātkathāyāśca nyūnaṃ neṣṭaṃ pratijñayā

5.29

जातयो दूषणाभासास्ताः साधर्म्यसमाधयः

jātayo dūṣaṇābhāsāstāḥ sādharmyasamādhayaḥ

5.29.2

तासां प्रपञ्चो बहुधा भूयस्त्वादिह नोदितः

tāsāṃ prapañco bahudhā bhūyastvādiha noditaḥ

5.30

अपरं वक्ष्यते न्यायलक्षणं काव्यसंश्रयम्

aparaṃ vakṣyate nyāyalakṣaṇaṃ kāvyasaṃśrayam

5.30.2

इदं तु शास्त्रगर्भेषु काव्येष्वभिहितं यथा

idaṃ tu śāstragarbheṣu kāvyeṣvabhihitaṃ yathā

5.31

अथ नित्याविनाभावि दृष्टं जगति कारणम्

atha nityāvinābhāvi dṛṣṭaṃ jagati kāraṇam

5.31.2

कारणं चेन् न तन्नित्यं नित्यं चेत् कारणं न तत्

kāraṇaṃ cen na tannityaṃ nityaṃ cet kāraṇaṃ na tat

5.32

लक्ष्मप्रयोगदोषाणां भेदेनानेकवर्त्मना

lakṣmaprayogadoṣāṇāṃ bhedenānekavartmanā

5.32.2

संधादिसाधनं सिद्ध्यै शास्त्रेषूदितमन्यथा

saṃdhādisādhanaṃ siddhyai śāstreṣūditamanyathā

5.33

तज्ज्ञैः काव्यप्रयोगेषु तत् प्रादुष्कृतम् अन्यथा

tajjñaiḥ kāvyaprayogeṣu tat prāduṣkṛtam anyathā

5.33.2

तत्र लोकाश्रयं काव्यमागमास्तत्त्वशंसिनः

tatra lokāśrayaṃ kāvyamāgamāstattvaśaṃsinaḥ

5.34

असिसंकाशम् आकाशं शब्दो दूरानुपात्ययम्

asisaṃkāśam ākāśaṃ śabdo dūrānupātyayam

5.34.2

तदेव वापि सिन्धूनामहो स्थेमा महार्चिषः

tadeva vāpi sindhūnāmaho sthemā mahārciṣaḥ

5.35

रूपादीनां यथा द्रव्यमाश्रयो नश्वरीति या

rūpādīnāṃ yathā dravyamāśrayo naśvarīti yā

5.35.2

इष्टकार्याभ्युपगमं प्रतिज्ञां प्रतिजानते

iṣṭakāryābhyupagamaṃ pratijñāṃ pratijānate

5.36

धर्मार्थकामकोपानां संश्रयात्सा चतुर्विधा

dharmārthakāmakopānāṃ saṃśrayātsā caturvidhā

5.36.2

जरामेष बिभर्मीति प्रतिज्ञाय पितुर्यथा

jarāmeṣa bibharmīti pratijñāya pituryathā