1.31

मिश्राणि नाटकादीनि तेषाम् अन्यत्र विस्तरः

miśrāṇi nāṭakādīni teṣām anyatra vistaraḥ

1.31.2

गद्यपद्यमयी काचित् चम्पूर् इत्य् अभिधीयते

gadyapadyamayī kācit campūr ity abhidhīyate

1.32

तद् एतद् वाङ्मयं भूयः संस्कृतं प्राकृतं तथा

tad etad vāṅmayaṃ bhūyaḥ saṃskṛtaṃ prākṛtaṃ tathā

1.32.2

अपभ्रंशश् च मिश्रं चेत्य् आहुर् आर्याश् चतुर्विधम्

apabhraṃśaś ca miśraṃ cety āhur āryāś caturvidham

1.33

संस्कृतं नाम दैवी वाग् अन्वाख्याता महर्षिभिः

saṃskṛtaṃ nāma daivī vāg anvākhyātā maharṣibhiḥ

1.33.2

तद्भवस् तत्समो देशीत्य् अनेकः प्राकृतक्रमः

tadbhavas tatsamo deśīty anekaḥ prākṛtakramaḥ

1.34

महाराष्ट्राश्रयां भाषां प्रकृष्टं प्राकृतं विदुः

mahārāṣṭrāśrayāṃ bhāṣāṃ prakṛṣṭaṃ prākṛtaṃ viduḥ

1.34.2

सागरः सूक्तिरत्नानां सेतुबन्धादि यन्मयम्

sāgaraḥ sūktiratnānāṃ setubandhādi yanmayam

1.35

शौरसेनी च गौडी च लाटी चान्या च तादृशी

śaurasenī ca gauḍī ca lāṭī cānyā ca tādṛśī

1.35.2

याति प्राकृतम् इत्य् एवं व्यवहारेषु संनिधिम्

yāti prākṛtam ity evaṃ vyavahāreṣu saṃnidhim

1.36

आभीरादिगिरः काव्येष्व् अपभ्रंश इति स्मृताः

ābhīrādigiraḥ kāvyeṣv apabhraṃśa iti smṛtāḥ

1.36.2

शास्त्रेषु संस्कृताद् अन्यद् अपभ्रंशतयोदितम्

śāstreṣu saṃskṛtād anyad apabhraṃśatayoditam

1.37

संस्कृतं सर्गबन्धादि प्राकृतं स्कन्धकादिकम्

saṃskṛtaṃ sargabandhādi prākṛtaṃ skandhakādikam

1.37.2

ओसरादीन्य् अपभ्रंशो नाटकादि तु मिश्रकम्

osarādīny apabhraṃśo nāṭakādi tu miśrakam

1.38

कथापि सर्वभाषाभिः संस्कृतेन च बध्यते

kathāpi sarvabhāṣābhiḥ saṃskṛtena ca badhyate

1.38.2

भूतभाषामयीं प्राहुर् अद्भुतार्थां बृहत्कथाम्

bhūtabhāṣāmayīṃ prāhur adbhutārthāṃ bṛhatkathām

1.39

लास्यच्छलितशम्पादि प्रेक्षार्थम् इतरत् पुनः

lāsyacchalitaśampādi prekṣārtham itarat punaḥ

1.39.2

श्रव्यम् एवेति सैषापि द्वयी गतिर् उदाहृता

śravyam eveti saiṣāpi dvayī gatir udāhṛtā

1.40

अस्त्य् अनेको गिरां मार्गः सूक्ष्मभेदः परस्परम्

asty aneko girāṃ mārgaḥ sūkṣmabhedaḥ parasparam

1.40.2

तत्र वैदर्भगौडीयौ वर्ण्येते प्रस्फुटान्तरौ

tatra vaidarbhagauḍīyau varṇyete prasphuṭāntarau

Kāvyādarśa