1.1

विनीतः शास्त्रसम्पन्नः कोशशौर्यसमन्वितः

vinītaḥ śāstrasampannaḥ kośaśauryasamanvitaḥ

1.1.2

ब्रह्मण्यो दानशीलः स्यात् सत्यधर्मपरो नृपः

brahmaṇyo dānaśīlaḥ syāt satyadharmaparo nṛpaḥ

1.2

स्तम्भोपतापपैशुन्यचापलक्रोधवर्जितः

stambhopatāpapaiśunyacāpalakrodhavarjitaḥ

1.2.2

प्रगल्भः संनतोदग्रः सम्भाषी प्रियदर्शनः

pragalbhaḥ saṃnatodagraḥ sambhāṣī priyadarśanaḥ

1.3

वश्येन्द्रियं जितात्मानं धृतदण्डं विकारिषु

vaśyendriyaṃ jitātmānaṃ dhṛtadaṇḍaṃ vikāriṣu

1.3.2

परीक्ष्यकारिणं धीरम् अत्यन्तं श्रीर् निषेवते

parīkṣyakāriṇaṃ dhīram atyantaṃ śrīr niṣevate

1.4

शौर्यविद्यार्थबाहुल्यात् प्रभुत्वाच् च विशेषतः

śauryavidyārthabāhulyāt prabhutvāc ca viśeṣataḥ

1.4.2

सदा चित्तं नरेन्द्राणां मोहम् आयाति कारणात्

sadā cittaṃ narendrāṇāṃ moham āyāti kāraṇāt

1.5

तस्माच् चित्तं प्रबोद्धव्यं राजधर्मे सदा द्विजैः

tasmāc cittaṃ praboddhavyaṃ rājadharme sadā dvijaiḥ

1.5.2

पवित्रं परमं पुण्यं स्मृतिवाक्यं न लङ्घयेत्

pavitraṃ paramaṃ puṇyaṃ smṛtivākyaṃ na laṅghayet

1.6

वेदध्वनिप्रभावेण देवाः स्वर्गनिवासिनः

vedadhvaniprabhāveṇa devāḥ svarganivāsinaḥ

1.6.2

ते ऽपि तत्र प्रमोदन्ते तृप्तास् तु द्विजपूजनात्

te 'pi tatra pramodante tṛptās tu dvijapūjanāt

1.7

तस्माद् यत्नेन कर्तव्या द्विजपूजा सदा नृपैः

tasmād yatnena kartavyā dvijapūjā sadā nṛpaiḥ

1.7.2

तेन भूयो ऽपि शक्रत्वं नरेन्द्रत्वं पुनः पुनः

tena bhūyo 'pi śakratvaṃ narendratvaṃ punaḥ punaḥ

1.8

सुराध्यक्षश् च्युतः स्वर्गान् नृपरूपेण तिष्ठति

surādhyakṣaś cyutaḥ svargān nṛparūpeṇa tiṣṭhati

1.8.2

कर्तव्यं तेन तन् नित्यं येन तत्त्वं समाप्नुयात्

kartavyaṃ tena tan nityaṃ yena tattvaṃ samāpnuyāt

1.9

आत्मीये संस्थिता धर्मे नृपाः शक्रत्वम् आप्नुयुः

ātmīye saṃsthitā dharme nṛpāḥ śakratvam āpnuyuḥ

1.9.2

अवीचिवासिनो ये तु व्यपेताचारिणः सदा

avīcivāsino ye tu vyapetācāriṇaḥ sadā

1.10

गच्छेत् सम्यग् अविज्ञाय वशं क्रोधस्य यो नृपः

gacchet samyag avijñāya vaśaṃ krodhasya yo nṛpaḥ

1.10.2

वसेत् स नरके घोरे कल्पार्धं तु न संशयः

vaset sa narake ghore kalpārdhaṃ tu na saṃśayaḥ

Kātyāyanasmṛti