1.1

सान्द्रोद्रेकक्षुभितम् अभितः स्वान्तम् अन्तर् नियम्य प्रायो धत्ते नवनवरसोल्लेखम् आनन्दकन्दम्

sāndrodrekakṣubhitam abhitaḥ svāntam antar niyamya prāyo dhatte navanavarasollekham ānandakandam

1.2

भूयो भूयः प्रलयविभवोद्दामदुःखान्तरायो यो ऽसाव् अन्तर् जयति हृदये को ऽपि संविद्विकासः

bhūyo bhūyaḥ pralayavibhavoddāmaduḥkhāntarāyo yo 'sāv antar jayati hṛdaye ko 'pi saṃvidvikāsaḥ

1.3

इह खलु निखिलजगदात्मा सर्वोत्तीर्णश् च सर्वमयश् च विकल्पासंकुचितसंवित्प्रकाशरूपः अनवच्छिन्नचिदानन्दविश्रान्तः प्रसरदविरलविचित्रपञ्चवाहवाहवाहिनीमहोदधिः निरतिशयस्वातन्त्र्यसीमनि प्रगल्भमानः सर्वशक्तिखचित एक एव अस्ति संविद् आत्मा महेश्वरः

iha khalu nikhilajagadātmā sarvottīrṇaś ca sarvamayaś ca vikalpāsaṃkucitasaṃvitprakāśarūpaḥ anavacchinnacidānandaviśrāntaḥ prasaradaviralavicitrapañcavāhavāhavāhinīmahodadhiḥ niratiśayasvātantryasīmani pragalbhamānaḥ sarvaśaktikhacita eka eva asti saṃvid ātmā maheśvaraḥ

1.4

तस्य प्रकाशरूपता चिच्छक्तिः स्वातन्त्र्यम् आनन्दशक्तिः तच्चमत्कारः इच्छाशक्तिः आमर्शात्मकता ज्ञानशक्तिः सर्वाकारयोगित्वं क्रियाशक्तिः इति

tasya prakāśarūpatā cicchaktiḥ svātantryam ānandaśaktiḥ taccamatkāraḥ icchāśaktiḥ āmarśātmakatā jñānaśaktiḥ sarvākārayogitvaṃ kriyāśaktiḥ iti

1.5

इत्थं सर्वशक्तियोगे ऽपि आभिर् मुख्याभिः शक्तिभिर् उपचर्यते स च भगवान् स्वातन्त्र्यशक्तिमहिम्ना स्वात्मानं संकुचितम् इव आभासयन् अणुः इति उच्यते

itthaṃ sarvaśaktiyoge 'pi ābhir mukhyābhiḥ śaktibhir upacaryate sa ca bhagavān svātantryaśaktimahimnā svātmānaṃ saṃkucitam iva ābhāsayan aṇuḥ iti ucyate

1.6

यथोक्तम्

yathoktam

1.6.2

व्यापको हि शिवः स्वेच्छाक्ﾱप्तसंकोचमुद्रणात्

vyāpako hi śivaḥ svecchākﾱptasaṃkocamudraṇāt

1.6.3

विचित्रफलकर्मौघवशात् तत्तच्छरीरभाक्

vicitraphalakarmaughavaśāt tattaccharīrabhāk

1.7

इति निजस्वरूपगोपनकेलिलोलम् एवं माहेशशक्तिपरिस्पन्दं प्रवरगुरवः प्रतिपेदिरे

iti nijasvarūpagopanakelilolam evaṃ māheśaśaktiparispandaṃ pravaraguravaḥ pratipedire

1.8

तथा च आहुः

tathā ca āhuḥ

1.8.2

अतिदुर्घटकारित्वात् स्वाच्छन्द्यनिर्मलाद् असौ

atidurghaṭakāritvāt svācchandyanirmalād asau

1.8.3

स्वात्मप्रच्छादनक्रीडापण्डितः परमेश्वरः

svātmapracchādanakrīḍāpaṇḍitaḥ parameśvaraḥ

1.9

अनावृते स्वरूपे ऽपि यदात्माच्छादनं विभोः

anāvṛte svarūpe 'pi yadātmācchādanaṃ vibhoḥ

1.9.2

सैवाविद्या यतो भेद एतावान् विश्ववृत्तिकः

saivāvidyā yato bheda etāvān viśvavṛttikaḥ

1.9.3

इति

iti

1.10

न च एतावता भगवतो देशकालाकारोपाधिविरहितनिरतिशयानन्दपरिस्पन्दात्मकस्य काचिद् अपि क्षतिः प्रत्युत परममहिम्नः परिपुष्टिर् इत्य् उक्तम्

na ca etāvatā bhagavato deśakālākāropādhivirahitaniratiśayānandaparispandātmakasya kācid api kṣatiḥ pratyuta paramamahimnaḥ paripuṣṭir ity uktam

1.11

अस्थास्यद् एकरूपेण वपुषा चेन् महेश्वरः

asthāsyad ekarūpeṇa vapuṣā cen maheśvaraḥ

1.11.2

महेश्वरत्वं संवित्त्वं तद् अत्यक्ष्यद् घटादिवत्

maheśvaratvaṃ saṃvittvaṃ tad atyakṣyad ghaṭādivat

1.12

परिच्छिन्नप्रकाशत्वं जडस्य किल लक्षणम्

paricchinnaprakāśatvaṃ jaḍasya kila lakṣaṇam

1.12.2

जडाद् विलक्षणो बोधो यतो न परिमीयते

jaḍād vilakṣaṇo bodho yato na parimīyate

Janmamaraṇavicāra