1.104.11

इडेति निधनं करोति

iḍeti nidhanaṃ karoti

1.104.12

परोक्षेणैवैनां तद् रूपेण गायति

parokṣeṇaivaināṃ tad rūpeṇa gāyati

1.104.13

अनुष्टुभि प्रस्तुतायां गायत्रम् एव गायन् दिवं मनसा गच्छेत्

anuṣṭubhi prastutāyāṃ gāyatram eva gāyan divaṃ manasā gacchet

1.104.14

वाचा गायन् वाग् इति निधनं करोति

vācā gāyan vāg iti nidhanaṃ karoti

1.104.15

परोक्षेणैवैनां तद् रूपेण गायति

parokṣeṇaivaināṃ tad rūpeṇa gāyati

1.104.16

पङ्क्त्यां प्रस्तुतायां गायत्रम् एव गायन्न् ऋतून् मनसा गच्छेत्

paṅktyāṃ prastutāyāṃ gāyatram eva gāyann ṛtūn manasā gacchet

1.104.17

परोक्षेणैवैनां तद् रूपेण गायति

parokṣeṇaivaināṃ tad rūpeṇa gāyati

1.104.18

ओषम् एवैतद् उत्तमं तृचं गायति

oṣam evaitad uttamaṃ tṛcaṃ gāyati

1.104.19

प्रजननो वा एष तृचः

prajanano vā eṣa tṛcaḥ

1.104.20

ओषम् एव प्रजया पशुभिः प्रजायते य एवं वेद

oṣam eva prajayā paśubhiḥ prajāyate ya evaṃ veda

1.104.21

प्रजापतिर् यत् प्रजा असृजत ता एतेनैव तृचेनासृजत

prajāpatir yat prajā asṛjata tā etenaiva tṛcenāsṛjata

1.104.22

पवमानस्य ते कवे वाजिन् सर्गा असृक्षतेति सर्गश एवासृजत

pavamānasya te kave vājin sargā asṛkṣateti sargaśa evāsṛjata

1.104.23

असृग्रं वारे अव्यय इति चासृजत

asṛgraṃ vāre avyaya iti cāsṛjata

1.104.24

तासां सृष्टानां परावापाद् अबिभेत्

tāsāṃ sṛṣṭānāṃ parāvāpād abibhet

1.104.25

स एताम् उत्तमां समुद्रवतीम् अपश्यत्

sa etām uttamāṃ samudravatīm apaśyat

1.104.26

तयैना अच्छा समुद्रम् इन्दव इत्य् एव समुद्रेण समन्तं परिण्यदधात्

tayainā acchā samudram indava ity eva samudreṇa samantaṃ pariṇyadadhāt

1.104.27

ता अस्य न परोप्यन्त

tā asya na paropyanta

1.104.28

नास्य वित्तं परोप्यते य एवं वेद

nāsya vittaṃ paropyate ya evaṃ veda

1.104.29

अग्मन्न् ऋतस्य योनिम् एति

agmann ṛtasya yonim eti

1.104.30

गृहा ह वा ऋतस्य योनिः

gṛhā ha vā ṛtasya yoniḥ

Jaiminīyabrāhmaṇa