1.24.7

तं होवाच काण्ड्वीय किं तेज इति

taṃ hovāca kāṇḍvīya kiṃ teja iti

1.24.8

अग्निम् उपदिशन्न् उवाचेदं तेज इत्य् अदस् तेज इत्य् आदित्यं सो ऽहम् अदस् तेजो ऽस्मिंस् तेजसि सायं जुहोमीदं तेजो ऽमुष्मिंस् तेजसि प्रातर् जुहोम्य् एताव् एव मा तद् गमयिष्यतो यत्र सर्वे कामा एतौ मे पुनर्मृत्युम् अपजेष्यत इति

agnim upadiśann uvācedaṃ teja ity adas teja ity ādityaṃ so 'ham adas tejo 'smiṃs tejasi sāyaṃ juhomīdaṃ tejo 'muṣmiṃs tejasi prātar juhomy etāv eva mā tad gamayiṣyato yatra sarve kāmā etau me punarmṛtyum apajeṣyata iti

1.24.9

सुहुतं देवान् राधयानि इति हैव प्रशशंस

suhutaṃ devān rādhayāni iti haiva praśaśaṃsa

1.24.10

अथ हापरं पप्रच्छ कथा भगवस् त्वम् अग्निहोत्रं जुहोषीति

atha hāparaṃ papraccha kathā bhagavas tvam agnihotraṃ juhoṣīti

1.25.1

स होवाच बुडिल आश्वतराश्विर् वैयाघ्रपद्यो ऽर्काश्वमेधावित्य् एव सम्राड् अहम् अग्निहोत्रं जुहोम्य् अन्नं ह्य् एतद् देवानां यद् अर्को ऽश्वो मेधो मेध्य इति

sa hovāca buḍila āśvatarāśvir vaiyāghrapadyo 'rkāśvamedhāvity eva samrāḍ aham agnihotraṃ juhomy annaṃ hy etad devānāṃ yad arko 'śvo medho medhya iti

1.25.2

तं होवाच वैयाघ्रपद्य को ऽर्कः को ऽश्वो मेधो मेध्य इति

taṃ hovāca vaiyāghrapadya ko 'rkaḥ ko 'śvo medho medhya iti

1.25.3

अग्निम् उपदिशन्न् उवाचायम् अर्क इत्यसावश्वो मेधो मेध्य इत्य् आदित्यं सो ऽहम् अमुम् अश्वं मेधं मेध्यम् अस्मिन्न् अर्के सायं जुहोमीमम् अर्कम् अमुष्मिन्न् अश्वे मेधे मेध्ये प्रातर् जुहोम्य् एतावेव मा तद् गमयिष्यतो यत्र सर्वे कामा एतौ मे पुनर्मृत्युम् अपजेष्यत इति

agnim upadiśann uvācāyam arka ityasāvaśvo medho medhya ity ādityaṃ so 'ham amum aśvaṃ medhaṃ medhyam asminn arke sāyaṃ juhomīmam arkam amuṣminn aśve medhe medhye prātar juhomy etāveva mā tad gamayiṣyato yatra sarve kāmā etau me punarmṛtyum apajeṣyata iti

1.25.4

सुहुतम् इति ह प्रशस्योवाच यो ह किल मह्यम् अग्निहोत्र इतिं च गतिं च ब्रूयात् तस्मा अहं वरं दद्याम् इति

suhutam iti ha praśasyovāca yo ha kila mahyam agnihotra itiṃ ca gatiṃ ca brūyāt tasmā ahaṃ varaṃ dadyām iti

1.25.5

ते होचुर् न न्वै वयम् अग्निहोत्र इतिं च गतिं चानूचिमहे त्वम् अस्मभ्यम् अग्निहोत्र इतिं च गतिं च ब्रूहि वयं तुभ्यं पृथक् पञ्च वरान् दद्म इति

te hocur na nvai vayam agnihotra itiṃ ca gatiṃ cānūcimahe tvam asmabhyam agnihotra itiṃ ca gatiṃ ca brūhi vayaṃ tubhyaṃ pṛthak pañca varān dadma iti

1.25.6

अग्निम् उपदिशन्न् उवाचेयम् इतिर् इत्य् असौ गतिर् इत्य् आदित्यं सो ऽहम् अमूं गतिम् अस्याम् इतौ सायं जुहोमीमाम् इतिम् अमुष्यां गतौ प्रातर् जुहोम्य् एताव् एव मा तद् गमयिष्यतो यत्र सर्वे कामा एतौ मे पुनर्मृत्युम् अपजेष्यत इति

agnim upadiśann uvāceyam itir ity asau gatir ity ādityaṃ so 'ham amūṃ gatim asyām itau sāyaṃ juhomīmām itim amuṣyāṃ gatau prātar juhomy etāv eva mā tad gamayiṣyato yatra sarve kāmā etau me punarmṛtyum apajeṣyata iti

1.25.7

सुहुतम् इति ह प्रशस्योचुर् वरान् वृणीष्व यान् अदामेति

suhutam iti ha praśasyocur varān vṛṇīṣva yān adāmeti

1.25.8

स होवाचैष एव मे वरो ऽहम् एव युष्मभ्यं पृथक् पञ्च सहस्राणि शताश्वानि ददानीति

sa hovācaiṣa eva me varo 'ham eva yuṣmabhyaṃ pṛthak pañca sahasrāṇi śatāśvāni dadānīti

1.25.9

एतानि वा अग्निहोत्र उपासनान्य् एते कामाः

etāni vā agnihotra upāsanāny ete kāmāḥ

1.25.10

एतान् एव कामान् अवरुन्द्धे य एवं वेदाथो यस्यैवं विद्वान् अग्निहोत्रं जुहोति

etān eva kāmān avarunddhe ya evaṃ vedātho yasyaivaṃ vidvān agnihotraṃ juhoti

1.26.1

अग्नीन् आदधानः प्रातर् एवोद्धरेत्

agnīn ādadhānaḥ prātar evoddharet

1.26.2

तद् द्विः सायं द्विः प्रातर् जुहोति

tad dviḥ sāyaṃ dviḥ prātar juhoti

1.26.3

चतस्र आहुतयः सम्पद्यन्ते

catasra āhutayaḥ sampadyante

1.26.4

चतुष्पदा वै पशवो ये च ग्राम्या ये चारण्याः

catuṣpadā vai paśavo ye ca grāmyā ye cāraṇyāḥ

1.26.5

तेषाम् एवैतत् प्रत्याशं प्रत्यपचयति

teṣām evaitat pratyāśaṃ pratyapacayati

1.26.6

एष वै मृत्युर् यद् अग्नी रिहन्न् एव नाम

eṣa vai mṛtyur yad agnī rihann eva nāma

Jaiminīyabrāhmaṇa