1.116.2

मरुत्वन्तं ग्रहं गृह्णन्ति

marutvantaṃ grahaṃ gṛhṇanti

1.116.3

मरुत्वान् वा इन्द्रो वृत्रम् अहन् वार्त्रहत्याय

marutvān vā indro vṛtram ahan vārtrahatyāya

1.116.4

उच्चा ते जातम् अन्धसेत्य् अन्धस्वतीर् भवन्ति

uccā te jātam andhasety andhasvatīr bhavanti

1.116.5

अहर् वा अन्धः

ahar vā andhaḥ

1.116.6

अह्न एवारम्भः

ahna evārambhaḥ

1.116.7

यज्ञो वा अन्धः

yajño vā andhaḥ

1.116.8

यज्ञस्यैवारम्भः

yajñasyaivārambhaḥ

1.116.9

त्रीणि यज्ञे ऽन्धांसीति ह स्म पूर्वे ब्राह्मणा मीमांसन्त उच्चा ते जातम् अन्धसा वसोर् मन्दानम् अन्धसः पुरोजिती वो अन्धस इति

trīṇi yajñe 'ndhāṃsīti ha sma pūrve brāhmaṇā mīmāṃsanta uccā te jātam andhasā vasor mandānam andhasaḥ purojitī vo andhasa iti

1.116.10

त्रयः पशुषु भोगाः प्रातर् मध्यंदिने सायम्

trayaḥ paśuṣu bhogāḥ prātar madhyaṃdine sāyam

1.116.11

तान् एवैतेनावरुन्द्धे

tān evaitenāvarunddhe

1.116.12

इमौ वै लोकौ सह सन्तौ व्यैताम्

imau vai lokau saha santau vyaitām

1.116.13

तयोर् न किंचन समपतत्

tayor na kiṃcana samapatat

1.116.14

ते देवमनुष्या आशनायन्

te devamanuṣyā āśanāyan

1.116.15

इतःप्रदानाद्धि देवा जीवन्त्य् अमुतःप्रदानान् मनुष्याः

itaḥpradānāddhi devā jīvanty amutaḥpradānān manuṣyāḥ

1.116.16

स एताः प्रजापतिर् ऋचो ऽपश्यद् उच्चा ते जातम् अन्धसेति

sa etāḥ prajāpatir ṛco 'paśyad uccā te jātam andhaseti

1.116.17

स उद् इत्य् एवेतो देवेभ्यो हव्यम् अवहत्

sa ud ity eveto devebhyo havyam avahat

1.116.18

दिवि सद् भूम्य् आ दद इत्य् अमुतो वृष्टिम् आच्यावयत्

divi sad bhūmy ā dada ity amuto vṛṣṭim ācyāvayat

1.116.19

ताव् इमौ लोकौ सवासिनाव् अकरोत्

tāv imau lokau savāsināv akarot

1.116.20

ताव् अस्मै कामम् अपिन्वाताम्

tāv asmai kāmam apinvātām

1.116.21

कामम् अस्मा इमौ लोकौ पिन्वाते य एवं वेद

kāmam asmā imau lokau pinvāte ya evaṃ veda

Jaiminīyabrāhmaṇa