1.10.2

अथोष्णशीताभिर् अद्भिः स्नापयत्य् आपो हि ष्ठा मयोभुव इति तिसृभिर् हिरण्यवर्णाः शुचयः पावका इति चतसृभिः पवमानः सुवर्जन इति चैतेनानुवाकेन

athoṣṇaśītābhir adbhiḥ snāpayaty āpo hi ṣṭhā mayobhuva iti tisṛbhir hiraṇyavarṇāḥ śucayaḥ pāvakā iti catasṛbhiḥ pavamānaḥ suvarjana iti caitenānuvākena

1.10.3

गोष्ठे वावच्छाद्य संपरिश्रित्य पुरोदयमादित्यस्य प्रविशत्य् अत्र सर्वं क्रियते नैनम् एतद् अहर् आदित्यो ऽभितपतीत्य् एकेषां स्नातानां वा एष तेजसा तपति य एष तपति तस्मात्स्नातकस्य मुखं रेफायतीव

goṣṭhe vāvacchādya saṃpariśritya purodayamādityasya praviśaty atra sarvaṃ kriyate nainam etad ahar ādityo 'bhitapatīty ekeṣāṃ snātānāṃ vā eṣa tejasā tapati ya eṣa tapati tasmātsnātakasya mukhaṃ rephāyatīva

1.10.4

आहरन्त्यस्मै सर्वसुरभि चन्दनं वा पिष्टं तदभ्युक्ष्य नमो ग्रहाय चाभिग्रहाय च नमः शाकजञ्जभाभ्यां नमस्ताभ्यो देवताभ्यो या अभिग्राहिणीर् इति देवेभ्यः प्राचीनम् अञ्जलिं कृत्वा तेनानुलिम्पते ऽप्सरासु च यो गन्धो गन्धर्वेषु च यद्यशो दैव्यो यो मानुषो गन्धः स माम् आविशताद् इहेति

āharantyasmai sarvasurabhi candanaṃ vā piṣṭaṃ tadabhyukṣya namo grahāya cābhigrahāya ca namaḥ śākajañjabhābhyāṃ namastābhyo devatābhyo yā abhigrāhiṇīr iti devebhyaḥ prācīnam añjaliṃ kṛtvā tenānulimpate 'psarāsu ca yo gandho gandharveṣu ca yadyaśo daivyo yo mānuṣo gandhaḥ sa mām āviśatād iheti

1.10.5

आहरन्त्यस्मा अहते वाससी ते अभ्युक्ष्य सोमस्य तनूरसि तनुवं मे पाहि स्वा मा तनूराविश शिवा मा तनूर् आविशेत्य् अन्तरीयं वासः परिधायाप उपस्पृश्य तथैवोत्तरीयम् अपरेणाग्निं प्राङ्मुख उपविशति

āharantyasmā ahate vāsasī te abhyukṣya somasya tanūrasi tanuvaṃ me pāhi svā mā tanūrāviśa śivā mā tanūr āviśety antarīyaṃ vāsaḥ paridhāyāpa upaspṛśya tathaivottarīyam apareṇāgniṃ prāṅmukha upaviśati

1.10.6

आहरन्त्यस्मै कुण्डले चान्दनमणिं बादरं वा सुवर्णाभिच्छादनं तदुभयं दर्भेण प्रबध्योपर्यग्नौ धारयन्नभिजुहोत्य् आयुष्यं वर्चस्यं रायस्पोषम् औद्भिदम् इदं हिरण्यम् आयुषे वर्चसे जैत्र्यायाविशतां मां स्वाहोच्चैर् वाजि पृतनासाहं सभासाहं धनंजयं सर्वाः समग्रा ऋद्धयो हिरण्ये ऽस्मिन् समाभृताः स्वाहा शुनमहं हिरण्यस्य पितुरिव नामाग्रभिषं तं मा हिरण्यवर्चसं करोतु पूरुषु प्रियं ब्रह्मवर्चसिनं मा करोतु स्वाहा प्रियं मा कुरु देवेषु प्रियं मा ब्रह्मणि कुरु प्रियं विश्येषु शूद्रेषु प्रियं मा कुरु राजसु स्वाहेयम् ओषधे त्रायमाणा सहमाना सहस्वती सा मा हिरण्यवर्चसं करोतु पूरुषु प्रियं ब्रह्मवर्चसिनं मा करोतु स्वाहेति

āharantyasmai kuṇḍale cāndanamaṇiṃ bādaraṃ vā suvarṇābhicchādanaṃ tadubhayaṃ darbheṇa prabadhyoparyagnau dhārayannabhijuhoty āyuṣyaṃ varcasyaṃ rāyaspoṣam audbhidam idaṃ hiraṇyam āyuṣe varcase jaitryāyāviśatāṃ māṃ svāhoccair vāji pṛtanāsāhaṃ sabhāsāhaṃ dhanaṃjayaṃ sarvāḥ samagrā ṛddhayo hiraṇye 'smin samābhṛtāḥ svāhā śunamahaṃ hiraṇyasya pituriva nāmāgrabhiṣaṃ taṃ mā hiraṇyavarcasaṃ karotu pūruṣu priyaṃ brahmavarcasinaṃ mā karotu svāhā priyaṃ mā kuru deveṣu priyaṃ mā brahmaṇi kuru priyaṃ viśyeṣu śūdreṣu priyaṃ mā kuru rājasu svāheyam oṣadhe trāyamāṇā sahamānā sahasvatī sā mā hiraṇyavarcasaṃ karotu pūruṣu priyaṃ brahmavarcasinaṃ mā karotu svāheti

1.10.7

एतैरेव पञ्चभिर् अस्वाहाकारैस् त्रिः प्रदक्षिणम् उदपात्रे ऽनुपरिप्लाव्य

etaireva pañcabhir asvāhākārais triḥ pradakṣiṇam udapātre 'nupariplāvya

1.11.1

विराजं च स्वराजं चाभिष्टीर् या च नो गृहे

virājaṃ ca svarājaṃ cābhiṣṭīr yā ca no gṛhe

1.11.1.2

लक्ष्मी राष्ट्रस्य या मुखे तया मा संसृजामसीति कुण्डले प्रतिहरते दक्षिणे कर्णे दक्षिणं सव्ये सव्यम्

lakṣmī rāṣṭrasya yā mukhe tayā mā saṃsṛjāmasīti kuṇḍale pratiharate dakṣiṇe karṇe dakṣiṇaṃ savye savyam

1.11.2

ऋतुभिष्ट्वार्तवैर् आयुषे वर्चसे

ṛtubhiṣṭvārtavair āyuṣe varcase

1.11.2.2

संवत्सरस्य धायसा तेन सन्ननुगृह्णासीति कुण्डले संगृह्णीते

saṃvatsarasya dhāyasā tena sannanugṛhṇāsīti kuṇḍale saṃgṛhṇīte

1.11.3

इयमोषधे त्रायमाणा सहमाना सहस्वती

iyamoṣadhe trāyamāṇā sahamānā sahasvatī

1.11.3.2

सा मा हिरण्यवर्चसं करोतु पूरुषु प्रियं ब्रह्मवर्चसिनं मा करोत्व् अपाशो ऽसीति ग्रीवायां मणिं प्रतिमुञ्चते

sā mā hiraṇyavarcasaṃ karotu pūruṣu priyaṃ brahmavarcasinaṃ mā karotv apāśo 'sīti grīvāyāṃ maṇiṃ pratimuñcate

1.11.4

शुभिके शुभमारोह शोभयन्ती मुखं मम

śubhike śubhamāroha śobhayantī mukhaṃ mama

1.11.4.2

मुखं च मम शोभय भूयांसं च भगं कुरु

mukhaṃ ca mama śobhaya bhūyāṃsaṃ ca bhagaṃ kuru

1.11.4.3

यामाहरज्जमदग्निः श्रद्धायै कामायास्यै

yāmāharajjamadagniḥ śraddhāyai kāmāyāsyai

1.11.4.4

इमां तां प्रतिमुञ्चे ऽहं भगेन सह वर्चसा

imāṃ tāṃ pratimuñce 'haṃ bhagena saha varcasā

1.11.4.5

इति द्वाभ्यां स्रजं प्रतिमुञ्चते

iti dvābhyāṃ srajaṃ pratimuñcate

1.11.5

यदाञ्जनं त्रैककुदं जातं हिमवत उपरि

yadāñjanaṃ traikakudaṃ jātaṃ himavata upari

1.11.5.2

तेन वाम् आञ्जे ऽहं भगेन सह वर्चसा

tena vām āñje 'haṃ bhagena saha varcasā

1.11.5.3

मयि पर्वतपूरुषम्

mayi parvatapūruṣam

Hiraṇyakeśigṛhyasūtra