1.6.10

आदित्यायाञ्जलिं कृत्वाचार्यायोपसंगृह्य दक्षिणतः कुमार उपविश्याधीहि भो इत्य् उक्त्वाथाह सावित्रीं भो अनुब्रूहीति

ādityāyāñjaliṃ kṛtvācāryāyopasaṃgṛhya dakṣiṇataḥ kumāra upaviśyādhīhi bho ity uktvāthāha sāvitrīṃ bho anubrūhīti

1.6.11

गणानां त्वा गणपतिं हवामह इत्येनम् अभिमन्त्र्याथास्मै पच्छो ऽग्रे ऽन्वाहाथार्धर्चशो ऽथ संततां भूस् तत् सवितुर् वरेण्यं भुवो भर्गो देवस्य धीमहि सुवर्धियो यो नः प्रचोदयाद् भूर् भुवस् तत् सवितुर्वरेण्यं भर्गो देवस्य धीमहि सुवर्धियो यो नः प्रचोदयाद् भूर्भुवः सुवस् तत् सवितुर् वरेण्यं भर्गो देवस्य धीमहि धियो यो नः प्रचोदयाद् इति

gaṇānāṃ tvā gaṇapatiṃ havāmaha ityenam abhimantryāthāsmai paccho 'gre 'nvāhāthārdharcaśo 'tha saṃtatāṃ bhūs tat savitur vareṇyaṃ bhuvo bhargo devasya dhīmahi suvardhiyo yo naḥ pracodayād bhūr bhuvas tat saviturvareṇyaṃ bhargo devasya dhīmahi suvardhiyo yo naḥ pracodayād bhūrbhuvaḥ suvas tat savitur vareṇyaṃ bhargo devasya dhīmahi dhiyo yo naḥ pracodayād iti

1.7.1

अथ सप्त पालाशीः समिध आर्द्रा अप्रच्छिन्नाग्राः प्रादेशमात्रीर् घृतान्वक्ता आभ्याधापयति

atha sapta pālāśīḥ samidha ārdrā apracchinnāgrāḥ prādeśamātrīr ghṛtānvaktā ābhyādhāpayati

1.7.2

अग्नये समिधमाहार्षं बृहते जातवेदसे यथा त्वमग्ने समिधा समिध्यस एवं मां मेधया प्रज्ञया प्रजया पशुभिर् ब्रह्मवर्चसेनान्नाद्येन समेधय स्वाहेत्येकाम्

agnaye samidhamāhārṣaṃ bṛhate jātavedase yathā tvamagne samidhā samidhyasa evaṃ māṃ medhayā prajñayā prajayā paśubhir brahmavarcasenānnādyena samedhaya svāhetyekām

1.7.3

अग्नये समिधाव् इति द्वे

agnaye samidhāv iti dve

1.7.4

अग्नये समिध इति चतस्रः

agnaye samidha iti catasraḥ

1.7.5

अथ परिषिञ्चति यथा पुरस्तात्

atha pariṣiñcati yathā purastāt

1.7.6

अन्वमंस्थाः प्रासावीर् इति मन्त्रान्तान् संनमति

anvamaṃsthāḥ prāsāvīr iti mantrāntān saṃnamati

1.7.7

अथ देवता उपतिष्ठते

atha devatā upatiṣṭhate

1.7.8

अग्ने व्रतपते व्रतं चरिष्यामीत्यग्निं वायो व्रतपत इति वायुम् आदित्य व्रतपत इत्यादित्यं व्रतानां व्रतपत इति व्रतपतिम्

agne vratapate vrataṃ cariṣyāmītyagniṃ vāyo vratapata iti vāyum āditya vratapata ityādityaṃ vratānāṃ vratapata iti vratapatim

1.7.9

अत्र गुरवे वरं ददाति

atra gurave varaṃ dadāti

1.7.10

उदायुषेत्य् उत्थाप्य सूर्यैष ते पुत्रस् तं ते परिददामीति परिदाय तच्चक्षुर्देवहितं पुरस्ताच्छुक्रम् उच्चरत् पश्येम शरदः शतं जीवेम शरदः शतं नन्दाम शरदः शतं मोदाम शरदः शतं भवाम शरदः शतं शृणवाम शरदः शतं प्रब्रवाम शरदः शतम् अजिताः स्याम शरदः शतं ज्योक् च सूर्यं दृश इत्यादित्यम् उपतिष्ठते

udāyuṣety utthāpya sūryaiṣa te putras taṃ te paridadāmīti paridāya taccakṣurdevahitaṃ purastācchukram uccarat paśyema śaradaḥ śataṃ jīvema śaradaḥ śataṃ nandāma śaradaḥ śataṃ modāma śaradaḥ śataṃ bhavāma śaradaḥ śataṃ śṛṇavāma śaradaḥ śataṃ prabravāma śaradaḥ śatam ajitāḥ syāma śaradaḥ śataṃ jyok ca sūryaṃ dṛśa ityādityam upatiṣṭhate

1.7.11

अग्निष् ट आयुः प्रतरां कृणोत्व् अग्निष् टे पुष्टिं प्रतरां दधात्व् इन्द्रो मरुद्भिरिह ते दधात्व् आदित्यस्ते वसुभिर् आदधात्व् इति दण्डं प्रदायामत्रं प्रयच्छति

agniṣ ṭa āyuḥ pratarāṃ kṛṇotv agniṣ ṭe puṣṭiṃ pratarāṃ dadhātv indro marudbhiriha te dadhātv ādityaste vasubhir ādadhātv iti daṇḍaṃ pradāyāmatraṃ prayacchati

1.7.12

अथाह भिक्षाचर्यं चरेति

athāha bhikṣācaryaṃ careti

1.7.13

स मातरमेवाग्रे भिक्षेत

sa mātaramevāgre bhikṣeta

1.7.14

अतो ऽन्येषु रातिकुलेषु

ato 'nyeṣu rātikuleṣu

1.7.15

आहृत्य भैक्षम् इति गुरवे प्राह

āhṛtya bhaikṣam iti gurave prāha

1.7.16

तत्सुभैक्षम् इत्युक्त्वा

tatsubhaikṣam ityuktvā

1.7.17

यस्य ते प्रथमवास्यं हरामस्तं त्वा विश्वे अवन्तु देवास् तं त्वा भ्रातरः सुहृदो वर्धमानमनुजायन्तां बहवः सुजातम् इति प्रथमवास्यम् अस्यादत्ते

yasya te prathamavāsyaṃ harāmastaṃ tvā viśve avantu devās taṃ tvā bhrātaraḥ suhṛdo vardhamānamanujāyantāṃ bahavaḥ sujātam iti prathamavāsyam asyādatte

1.7.18

उपस्थिते ऽन्न ओदनस्यापूपानां सक्तूनाम् इति समवदाय सर्पिर्मिश्रस्य जुहोत्य् अग्नये स्वाहा सोमाय स्वाहाग्नये ऽन्नादाय स्वाहाग्नये ऽन्नपतये स्वाहा प्रजापतये स्वाहा विश्वेभ्यो देवेभ्यः स्वाहा सर्वाभ्यो देवताभ्यः स्वाहाग्नये स्विष्टकृते स्वाहेति

upasthite 'nna odanasyāpūpānāṃ saktūnām iti samavadāya sarpirmiśrasya juhoty agnaye svāhā somāya svāhāgnaye 'nnādāya svāhāgnaye 'nnapataye svāhā prajāpataye svāhā viśvebhyo devebhyaḥ svāhā sarvābhyo devatābhyaḥ svāhāgnaye sviṣṭakṛte svāheti

Hiraṇyakeśigṛhyasūtra