1.5.5

असाव् इत्याचष्टे यथानामा भवति

asāv ityācaṣṭe yathānāmā bhavati

1.5.6

स्वस्ति देव सवितर् अहम् अनेनामुनोदृचम् अशीयेति नामनी गृह्णाति

svasti deva savitar aham anenāmunodṛcam aśīyeti nāmanī gṛhṇāti

1.5.7

शं नो देवीर् अभिष्टय आपो भवन्तु पीतये शं योर् अभिस्रवन्तु न इति मार्जयेते

śaṃ no devīr abhiṣṭaya āpo bhavantu pītaye śaṃ yor abhisravantu na iti mārjayete

1.5.8

अथास्य दक्षिणेन हस्तेन दक्षिणम् अंसम् अन्वारभ्य सव्येन सव्यं व्याहृतिभिः सावित्र्येति दक्षिणं बाहुम् अभ्यात्मन्न् उपनयते देवस्य त्वा सवितुः प्रसवे ऽश्विनोर् बाहुभ्यां पूष्णो हस्ताभ्याम् उपनये ऽसाव् इति च

athāsya dakṣiṇena hastena dakṣiṇam aṃsam anvārabhya savyena savyaṃ vyāhṛtibhiḥ sāvitryeti dakṣiṇaṃ bāhum abhyātmann upanayate devasya tvā savituḥ prasave 'śvinor bāhubhyāṃ pūṣṇo hastābhyām upanaye 'sāv iti ca

1.5.9

अथास्य दक्षिणेन हस्तेन दक्षिणं हस्तं साङ्गुष्ठं गृह्णात्य् अग्निष् टे हस्तमग्रभीत् सोमस्ते हस्तम् अग्रभीत् सविता ते हस्तम् अग्रभीत् सरस्वती ते हस्तम् अग्रभीत् पूषा ते हस्तम् अग्रभीद् बृहस्पतिस्ते हस्तम् अग्रभीन् मित्रस्ते हस्तमग्रभीद् वरुणस् ते हस्तम् अग्रभीत् त्वष्टा ते हस्तमग्रभीद् धाता ते हस्तमग्रभीद् विष्णुस्ते हस्तमग्रभीत् प्रजापतिस्ते हस्तमग्रभीद् इति

athāsya dakṣiṇena hastena dakṣiṇaṃ hastaṃ sāṅguṣṭhaṃ gṛhṇāty agniṣ ṭe hastamagrabhīt somaste hastam agrabhīt savitā te hastam agrabhīt sarasvatī te hastam agrabhīt pūṣā te hastam agrabhīd bṛhaspatiste hastam agrabhīn mitraste hastamagrabhīd varuṇas te hastam agrabhīt tvaṣṭā te hastamagrabhīd dhātā te hastamagrabhīd viṣṇuste hastamagrabhīt prajāpatiste hastamagrabhīd iti

1.5.10

सविता त्वाभिरक्षतु मित्रस् त्वमसि धर्मणाग्निराचार्यस् तव देवेन सवित्रा प्रसूतो बृहस्पतेर्ब्रह्मचारी भवासाव् अपो ऽशानः समिध आधेहि कर्म कुरु मा दिवा स्वाप्सीर् इत्येनं संशास्ति

savitā tvābhirakṣatu mitras tvamasi dharmaṇāgnirācāryas tava devena savitrā prasūto bṛhaspaterbrahmacārī bhavāsāv apo 'śānaḥ samidha ādhehi karma kuru mā divā svāpsīr ityenaṃ saṃśāsti

1.5.11

अथास्य दक्षिणेन हस्तेन दक्षिणमंसमुपर्युपर्यन्ववमृश्य हृदयदेशमभिमृशति मम हृदये हृदयं ते अस्तु मम चित्तं चित्तेनान्वेहि मम वाचमेकमना जुषस्व बृहस्पतिस् त्वा नियुनक्तु मह्यं माम् एवानुसंरभस्व मयि चित्तानि सन्तु ते मयि सामीच्यम् अस्तु ते मह्यं वाचं नियच्छताद् इति

athāsya dakṣiṇena hastena dakṣiṇamaṃsamuparyuparyanvavamṛśya hṛdayadeśamabhimṛśati mama hṛdaye hṛdayaṃ te astu mama cittaṃ cittenānvehi mama vācamekamanā juṣasva bṛhaspatis tvā niyunaktu mahyaṃ mām evānusaṃrabhasva mayi cittāni santu te mayi sāmīcyam astu te mahyaṃ vācaṃ niyacchatād iti

1.5.12

प्राणानां ग्रन्थिरसि स मा विस्रस इति नाभिदेशम्

prāṇānāṃ granthirasi sa mā visrasa iti nābhideśam

1.5.13

भूर्भुवः सुवः सुप्रजाः प्रजया भूयासं सुवीरो वीरैः सुवर्चा वर्चसा सुपोषः पोषैः सुमेधा मेधया सुब्रह्मा ब्रह्मचारिभिर् इत्येनमभिमन्त्र्य भूर् ऋक्षु त्वाग्नौ पृथिव्यां वाचि ब्रह्मणि ददे ऽसौ भुवो यजुःषु त्वा वायावन्तरिक्षे प्राणे ब्रह्मणि ददे ऽसौ सुवः सामसु त्वा सूर्ये दिवि चक्षुषि ब्रह्मणि ददे ऽसाव् इष्टस्ते प्रियो ऽसान्य् असाव् अनलस्य ते प्रियो ऽसान्यसाव् इदं वत्स्यावः प्राण आयुषि वत्स्यावः प्राण आयुषि वसासाव् इति च

bhūrbhuvaḥ suvaḥ suprajāḥ prajayā bhūyāsaṃ suvīro vīraiḥ suvarcā varcasā supoṣaḥ poṣaiḥ sumedhā medhayā subrahmā brahmacāribhir ityenamabhimantrya bhūr ṛkṣu tvāgnau pṛthivyāṃ vāci brahmaṇi dade 'sau bhuvo yajuḥṣu tvā vāyāvantarikṣe prāṇe brahmaṇi dade 'sau suvaḥ sāmasu tvā sūrye divi cakṣuṣi brahmaṇi dade 'sāv iṣṭaste priyo 'sāny asāv analasya te priyo 'sānyasāv idaṃ vatsyāvaḥ prāṇa āyuṣi vatsyāvaḥ prāṇa āyuṣi vasāsāv iti ca

1.5.14

अथास्य दक्षिणेन हस्तेन दक्षिणं हस्तं साङ्गुष्ठं गृह्णात्य् अग्निरायुष्मान् इति पञ्चभिः पर्यायैः

athāsya dakṣiṇena hastena dakṣiṇaṃ hastaṃ sāṅguṣṭhaṃ gṛhṇāty agnirāyuṣmān iti pañcabhiḥ paryāyaiḥ

1.5.15

आयुष् टे विश्वतो दधद् इति

āyuṣ ṭe viśvato dadhad iti

1.6.1

दक्षिणे कर्णे जपति

dakṣiṇe karṇe japati

1.6.2

आयुर्दा अग्न इत्युत्तरे

āyurdā agna ityuttare

1.6.3

अग्नौ पृथिव्यां प्रतितिष्ठ वायावन्तरिक्षे सूर्ये दिवि यां स्वस्तिम् अग्निर् वायुर् आदित्यश् चन्द्रमा आपो ऽनुसंचरन्ति तां स्वस्तिम् अनुसंचरासौ प्राणस्य ब्रह्मचार्यभूर् असाव् इत्य् उभयत्रानुषजति

agnau pṛthivyāṃ pratitiṣṭha vāyāvantarikṣe sūrye divi yāṃ svastim agnir vāyur ādityaś candramā āpo 'nusaṃcaranti tāṃ svastim anusaṃcarāsau prāṇasya brahmacāryabhūr asāv ity ubhayatrānuṣajati

1.6.4

मेधां त इन्द्रो ददातु मेधां देवी सरस्वती मेधां ते अश्विनावुभावाधत्तां पुष्करस्रजाव् इति तस्य मुखेन मुखं संनिधाय जपति

medhāṃ ta indro dadātu medhāṃ devī sarasvatī medhāṃ te aśvināvubhāvādhattāṃ puṣkarasrajāv iti tasya mukhena mukhaṃ saṃnidhāya japati

1.6.5

अथैनं परिददाति कषकाय त्वा परिददाम्य् अन्तकाय त्वा परिददाम्य् अघोराय त्वा परिददामि गदाय त्वा परिददामि यमाय त्वा परिददामि मखाय त्वा परिददामि वशिन्यै त्वा परिददामि पृथिव्यै त्वा सवैश्वानरायै परिददाम्य् अद्भ्यस्त्वा परिददाम्य् ओषधीभ्यस्त्वा परिददामि वनस्पतिभ्यस्त्वा परिददामि द्यावापृथिवीभ्यां त्वा परिददामि सुभूताय त्वा परिददामि ब्रह्मवर्चसाय त्वा परिददामि विश्वेभ्यस्त्वा देवेभ्यः परिददामि सर्वेभ्यस्त्वा भूतेभ्यः परिददामि सर्वाभ्यस् त्वा देवताभ्यः परिददामीति

athainaṃ paridadāti kaṣakāya tvā paridadāmy antakāya tvā paridadāmy aghorāya tvā paridadāmi gadāya tvā paridadāmi yamāya tvā paridadāmi makhāya tvā paridadāmi vaśinyai tvā paridadāmi pṛthivyai tvā savaiśvānarāyai paridadāmy adbhyastvā paridadāmy oṣadhībhyastvā paridadāmi vanaspatibhyastvā paridadāmi dyāvāpṛthivībhyāṃ tvā paridadāmi subhūtāya tvā paridadāmi brahmavarcasāya tvā paridadāmi viśvebhyastvā devebhyaḥ paridadāmi sarvebhyastvā bhūtebhyaḥ paridadāmi sarvābhyas tvā devatābhyaḥ paridadāmīti

1.6.6

अत्र सावित्रीं वाचयति यदि पुरस्ताद् उपेतो भवति

atra sāvitrīṃ vācayati yadi purastād upeto bhavati

1.6.7

यद्य् अनुपेतस् त्र्यहे पर्यवेते

yady anupetas tryahe paryavete

1.6.8

सद्यः पुष्करसादिः

sadyaḥ puṣkarasādiḥ

1.6.9

अपरेणाग्निम् उदगग्रं कूर्चं निधाय तस्मिन्प्राङ्मुख उपविशति राष्ट्रभृद् अस्य् आचार्यासन्दी मा त्वद् योषम् इति

apareṇāgnim udagagraṃ kūrcaṃ nidhāya tasminprāṅmukha upaviśati rāṣṭrabhṛd asy ācāryāsandī mā tvad yoṣam iti

Hiraṇyakeśigṛhyasūtra