Caturthopadeśaḥ.77.2

सृष्टिसंहारकर्तासौ योगीश्वरसमो भवेत्

sṛṣṭisaṃhārakartāsau yogīśvarasamo bhavet

Caturthopadeśaḥ.78

अस्तु वा मास्तु वा मुक्तिर् अत्रैवाखण्डितं सुखम्

astu vā māstu vā muktir atraivākhaṇḍitaṃ sukham

Caturthopadeśaḥ.78.2

लयोद्भवम् इदं सौख्यं राजयोगाद् अवाप्यते

layodbhavam idaṃ saukhyaṃ rājayogād avāpyate

Caturthopadeśaḥ.79

राजयोगम् अजानन्तः केवलं हठकर्मिणः

rājayogam ajānantaḥ kevalaṃ haṭhakarmiṇaḥ

Caturthopadeśaḥ.79.2

एतान् अभ्यासिनो मन्ये प्रयासफलवर्जितान्

etān abhyāsino manye prayāsaphalavarjitān

Caturthopadeśaḥ.80

उन्मन्यवाप्तये शीघ्रं भ्रूध्यानं मम संमतम्

unmanyavāptaye śīghraṃ bhrūdhyānaṃ mama saṃmatam

Caturthopadeśaḥ.80.2

राजयोगपदं प्राप्तुं सुखोपायोऽल्पचेतसाम्

rājayogapadaṃ prāptuṃ sukhopāyo'lpacetasām

Caturthopadeśaḥ.80.3

सद्यः प्रत्ययसंधायी जायते नादजो लयः

sadyaḥ pratyayasaṃdhāyī jāyate nādajo layaḥ

Caturthopadeśaḥ.81

नादानुसंधानसमाधिभाजां योगीश्वराणां हृदि वर्धमानम्

nādānusaṃdhānasamādhibhājāṃ yogīśvarāṇāṃ hṛdi vardhamānam

Caturthopadeśaḥ.81.2

आनन्दम् एकं वचसाम् अगम्यं जानाति तं श्रीगुरुनाथ एकः

ānandam ekaṃ vacasām agamyaṃ jānāti taṃ śrīgurunātha ekaḥ

Caturthopadeśaḥ.82

कर्णौ पिधाय हस्ताभ्यां यः शृणोति ध्वनिं मुनिः

karṇau pidhāya hastābhyāṃ yaḥ śṛṇoti dhvaniṃ muniḥ

Caturthopadeśaḥ.82.2

तत्र चित्तं स्थिरीकुर्याद् यावत् स्थिरपदं व्रजेत्

tatra cittaṃ sthirīkuryād yāvat sthirapadaṃ vrajet

Caturthopadeśaḥ.83

अभ्यस्यमानो नादोऽयं बाह्यम् आवृणुते ध्वनिम्

abhyasyamāno nādo'yaṃ bāhyam āvṛṇute dhvanim

Caturthopadeśaḥ.83.2

पक्षाद् विक्षेपम् अखिलं जित्वा योगी सुखी भवेत्

pakṣād vikṣepam akhilaṃ jitvā yogī sukhī bhavet

Caturthopadeśaḥ.84

श्रूयते प्रथमाभ्यासे नादो नानाविधो महान्

śrūyate prathamābhyāse nādo nānāvidho mahān

Caturthopadeśaḥ.84.2

ततोऽभ्यासे वर्धमाने श्रूयते सूक्ष्मसूक्ष्मकः

tato'bhyāse vardhamāne śrūyate sūkṣmasūkṣmakaḥ

Caturthopadeśaḥ.85

आदौ जलधिजीमूतभेरीझर्झरसम्भवाः

ādau jaladhijīmūtabherījharjharasambhavāḥ

Caturthopadeśaḥ.85.2

मध्ये मर्दलशङ्खोत्था घण्टाकाहलजास् तथा

madhye mardalaśaṅkhotthā ghaṇṭākāhalajās tathā

Caturthopadeśaḥ.86

अन्ते तु किङ्किणीवंशवीणाभ्रमरनिःस्वनाः

ante tu kiṅkiṇīvaṃśavīṇābhramaraniḥsvanāḥ

Caturthopadeśaḥ.86.2

इति नानाविधा नादाः श्रूयन्ते देहमध्यगाः

iti nānāvidhā nādāḥ śrūyante dehamadhyagāḥ

Haṭhayogapradīpikā