Tṛtīya upadeshaḥ.38

रसनाम् ऊर्ध्वगां कृत्वा क्षणार्धम् अपि तिष्ठति

rasanām ūrdhvagāṃ kṛtvā kṣaṇārdham api tiṣṭhati

Tṛtīya upadeshaḥ.38.2

विषैर् विमुच्यते योगी व्याधिमृत्युजरादिभिः

viṣair vimucyate yogī vyādhimṛtyujarādibhiḥ

Tṛtīya upadeshaḥ.39

न रोगो मरणं तन्द्रा न निद्रा न क्षुधा तृषा

na rogo maraṇaṃ tandrā na nidrā na kṣudhā tṛṣā

Tṛtīya upadeshaḥ.39.2

न च मूर्छा भवेत् तस्य यो मुद्रां वेत्ति खेचरीम्

na ca mūrchā bhavet tasya yo mudrāṃ vetti khecarīm

Tṛtīya upadeshaḥ.40

पीड्यते न स रोगेण लिप्यते न च कर्मणा

pīḍyate na sa rogeṇa lipyate na ca karmaṇā

Tṛtīya upadeshaḥ.40.2

बाध्यते न स कालेन यो मुद्रां वेत्ति खेचरीम्

bādhyate na sa kālena yo mudrāṃ vetti khecarīm

Tṛtīya upadeshaḥ.41

चित्तं चरति खे यस्माज् जिह्वा चरति खे गता

cittaṃ carati khe yasmāj jihvā carati khe gatā

Tṛtīya upadeshaḥ.41.2

तेनैषा खेचरी नाम मुद्रा सिद्धैर् निरूपिता

tenaiṣā khecarī nāma mudrā siddhair nirūpitā

Tṛtīya upadeshaḥ.42

खेचर्या मुद्रितं येन विवरं लम्बिकोर्ध्वतः

khecaryā mudritaṃ yena vivaraṃ lambikordhvataḥ

Tṛtīya upadeshaḥ.42.2

न तस्य क्षरते बिन्दुः कामिन्याः श्लेषितस्य च

na tasya kṣarate binduḥ kāminyāḥ śleṣitasya ca

Tṛtīya upadeshaḥ.43

चलितोऽपि यदा बिन्दुः सम्प्राप्तो योनिमण्डलम्

calito'pi yadā binduḥ samprāpto yonimaṇḍalam

Tṛtīya upadeshaḥ.43.2

व्रजत्य् ऊर्ध्वं हृतः शक्त्या निबद्धो योनिमुद्रया

vrajaty ūrdhvaṃ hṛtaḥ śaktyā nibaddho yonimudrayā

Tṛtīya upadeshaḥ.44

ऊर्ध्वजिह्वः स्थिरो भूत्वा सोमपानं करोति यः

ūrdhvajihvaḥ sthiro bhūtvā somapānaṃ karoti yaḥ

Tṛtīya upadeshaḥ.44.2

मासार्धेन न संदेहो मृत्युं जयति योगवित्

māsārdhena na saṃdeho mṛtyuṃ jayati yogavit

Tṛtīya upadeshaḥ.45

नित्यं सोमकलापूर्णं शरीरं यस्य योगिनः

nityaṃ somakalāpūrṇaṃ śarīraṃ yasya yoginaḥ

Tṛtīya upadeshaḥ.45.2

तक्षकेणापि दष्टस्य विषं तस्य न सर्पति

takṣakeṇāpi daṣṭasya viṣaṃ tasya na sarpati

Tṛtīya upadeshaḥ.46

इन्धनानि यथा वह्निस् तैलवर्तिं च दीपकः

indhanāni yathā vahnis tailavartiṃ ca dīpakaḥ

Tṛtīya upadeshaḥ.46.2

तथा सोमकलापूर्णं देही देहं न मुञ्चति

tathā somakalāpūrṇaṃ dehī dehaṃ na muñcati

Tṛtīya upadeshaḥ.47

गोमांसं भक्षयेन् नित्यं पिबेद् अमरवारुणीम्

gomāṃsaṃ bhakṣayen nityaṃ pibed amaravāruṇīm

Tṛtīya upadeshaḥ.47.2

कुलीनं तम् अहं मन्ये चेतरे कुलघातकाः

kulīnaṃ tam ahaṃ manye cetare kulaghātakāḥ

Haṭhayogapradīpikā