1.70

दारयति दारुणः क्रकचपात इव हृदयं संस्तुतजनविरहः सा नार्हस्येवं भवितुम्

dārayati dāruṇaḥ krakacapāta iva hṛdayaṃ saṃstutajanavirahaḥ sā nārhasyevaṃ bhavitum

1.71

अभूमिः खल्वसि दुःखक्ष्वेडाङ्कुरप्रसवानाम्

abhūmiḥ khalvasi duḥkhakṣveḍāṅkuraprasavānām

1.72

अपि च पुराकृते कर्मणि बलवति शुभे ऽशुभे वा फलकृति तिष्ठत्यधिष्ठातरि पृष्ठे पृष्ठतश्च को ऽवसरो विदुषि शुचाम्

api ca purākṛte karmaṇi balavati śubhe 'śubhe vā phalakṛti tiṣṭhatyadhiṣṭhātari pṛṣṭhe pṛṣṭhataśca ko 'vasaro viduṣi śucām

1.73

इदं च ते त्रिभुवनमङ्गलैककमलम् अमङ्गलभूताः कथमिव मुखम् अपवित्रयन्त्य् अश्रुबिन्दवः

idaṃ ca te tribhuvanamaṅgalaikakamalam amaṅgalabhūtāḥ kathamiva mukham apavitrayanty aśrubindavaḥ

1.74

तदलम्

tadalam

1.75

अधुना कथय कतमं भुवो भागम् अलंकर्तुम् इच्छसि

adhunā kathaya katamaṃ bhuvo bhāgam alaṃkartum icchasi

1.76

कस्मिन्न् अवतितीर्षति ते पुण्यभाजि प्रदेशे हृदयम्

kasminn avatitīrṣati te puṇyabhāji pradeśe hṛdayam

1.77

कानि वा तीर्थान्यनुग्रहीतुमभिलषसि

kāni vā tīrthānyanugrahītumabhilaṣasi

1.78

केषु वा धन्येषु तपोवनधामसु तपस्यन्ती स्थातुम् इच्छसि

keṣu vā dhanyeṣu tapovanadhāmasu tapasyantī sthātum icchasi

1.79

सज्जो ऽयमुपचरणचतुरः सहपांशुक्रीडापरिचयपेशलः प्रेयान् सखीजनः क्षितितलावतरणाय

sajjo 'yamupacaraṇacaturaḥ sahapāṃśukrīḍāparicayapeśalaḥ preyān sakhījanaḥ kṣititalāvataraṇāya

1.80

अनन्यशरणा चाद्यैव प्रभृति प्रतिपद्यस्व मनसा वाचा क्रियया च सर्वविद्याविधातारं दातारं च श्वःश्रेयसस्य चरणरजःपवित्रितत्रिदशासुरं सुधासूतिकलिकाकल्पितकर्णावतंसं देवदेवं त्रिभुवनगुरुं त्र्यम्बकम्

ananyaśaraṇā cādyaiva prabhṛti pratipadyasva manasā vācā kriyayā ca sarvavidyāvidhātāraṃ dātāraṃ ca śvaḥśreyasasya caraṇarajaḥpavitritatridaśāsuraṃ sudhāsūtikalikākalpitakarṇāvataṃsaṃ devadevaṃ tribhuvanaguruṃ tryambakam

1.81

अल्पीयसैव कालेन स ते शापशोकविरतिं वितरिष्यतीति

alpīyasaiva kālena sa te śāpaśokaviratiṃ vitariṣyatīti

1.82

एवमुक्ता मुक्तमुक्ताफलधवललोचनजललवा सरस्वती प्रत्यवादीत् प्रियसखि त्वया सह विचरन्त्या न मे कांचिद् अपि पीडाम् उत्पादयिष्यति ब्रह्मलोकविरहः शापशोको वा

evamuktā muktamuktāphaladhavalalocanajalalavā sarasvatī pratyavādīt priyasakhi tvayā saha vicarantyā na me kāṃcid api pīḍām utpādayiṣyati brahmalokavirahaḥ śāpaśoko vā

1.83

केवलं कमलासनसेवासुखमार्द्रयति मे हृदयम्

kevalaṃ kamalāsanasevāsukhamārdrayati me hṛdayam

1.84

अपि च त्वमेव वेत्सि मे भुवि धर्मधामानि समाधिसाधनानि योगयोग्यानि च स्थानानि स्थातुम् इत्येवमभिधाय विरराम

api ca tvameva vetsi me bhuvi dharmadhāmāni samādhisādhanāni yogayogyāni ca sthānāni sthātum ityevamabhidhāya virarāma

1.85

रणरणकोपनीतप्रजागरा चानिमीलितलोचनैव तां निशामनयत्

raṇaraṇakopanītaprajāgarā cānimīlitalocanaiva tāṃ niśāmanayat

1.86

अन्येद्युर् उदिते भगवति त्रिभुवनशेखरे खणखणायमानस्खलत्खलीनक्षतनिजतुरगमुखक्षिप्तेन क्षतजेनेव पाटलितवपुष्युदयाचलचूडामणौ जरत्कृकवाकुचूडारुणारुणपुरःसरे विरोचने नातिदूरवर्ती विविच्य पितामहविमानहंसकुलपालः पर्यटन्नपरवक्त्रमुच्चैरगायत्

anyedyur udite bhagavati tribhuvanaśekhare khaṇakhaṇāyamānaskhalatkhalīnakṣatanijaturagamukhakṣiptena kṣatajeneva pāṭalitavapuṣyudayācalacūḍāmaṇau jaratkṛkavākucūḍāruṇāruṇapuraḥsare virocane nātidūravartī vivicya pitāmahavimānahaṃsakulapālaḥ paryaṭannaparavaktramuccairagāyat

1.86.2

तरलयसि दृशं किम् उत्सुकाम् अकलुषमानसवासलालिते

taralayasi dṛśaṃ kim utsukām akaluṣamānasavāsalālite

1.86.3

अवतर कलहंसि वापिकां पुनरपि यास्यसि पङ्कजालयम्

avatara kalahaṃsi vāpikāṃ punarapi yāsyasi paṅkajālayam

1.87

तच्छ्रुत्वा सरस्वती पुनरचिन्तयद् अहम् इवानेन पर्यनुयुक्ता

tacchrutvā sarasvatī punaracintayad aham ivānena paryanuyuktā

Harṣacarita