1.208.2

सुसिद्धो ग्रहमात्रेण अरिर् मूलनिकृन्तनः

susiddho grahamātreṇa arir mūlanikṛntanaḥ

1.209

सिद्धसिद्धो यथोक्तेन द्विगुणात् सिद्धसाधकः

siddhasiddho yathoktena dviguṇāt siddhasādhakaḥ

1.209.2

सिद्धसुसिद्धो ऽर्धजपात् सिद्धारिर् हन्ति बान्धवान्

siddhasusiddho 'rdhajapāt siddhārir hanti bāndhavān

1.210

साध्यसिद्धो द्विगुणिकः साध्यसाध्यो ह्य् अनर्थकः

sādhyasiddho dviguṇikaḥ sādhyasādhyo hy anarthakaḥ

1.210.2

तत्सुसिद्धस् त्रिगुणितात् साध्यारिर् हन्ति गोत्रजान्

tatsusiddhas triguṇitāt sādhyārir hanti gotrajān

1.211

सुसिद्धसिद्धो ऽर्धजपात् तत्साध्यस् तु गुणाधिकात्

susiddhasiddho 'rdhajapāt tatsādhyas tu guṇādhikāt

1.211.2

तत्सुसिद्धो ग्रहाद् एव सुसिद्धारिः स्वगोत्रहा

tatsusiddho grahād eva susiddhāriḥ svagotrahā

1.212

अरिसिद्धः सुतान् हन्याद् अरिसाध्यस् तु कन्यकाः

arisiddhaḥ sutān hanyād arisādhyas tu kanyakāḥ

1.212.2

तत्सुसिद्धस् तु पत्नीघ्नस् तदरिर् हन्ति साधकम्

tatsusiddhas tu patnīghnas tadarir hanti sādhakam

1.213

तथा च तन्त्रे अस्य च मन्त्रविशेषेऽपवादः

tathā ca tantre asya ca mantraviśeṣe'pavādaḥ

1.213.2

नृसिंहार्कवराहाणां प्रासादप्रणवस्य च

nṛsiṃhārkavarāhāṇāṃ prāsādapraṇavasya ca

1.213.3

वैदिकस्य च मन्त्रस्य सिद्धादीन् नैव शोधयेत्

vaidikasya ca mantrasya siddhādīn naiva śodhayet

1.214

स्वप्नलब्धे स्त्रिया दत्ते मालामन्त्रे च त्र्यक्षरे

svapnalabdhe striyā datte mālāmantre ca tryakṣare

1.214.2

एकाक्षरे तथा मन्त्रे सिद्धादीन् नैव शोधयेत्

ekākṣare tathā mantre siddhādīn naiva śodhayet

1.215

स्वकुलान्य् अकुलत्वादि विज्ञेयं चागमान्तरात्

svakulāny akulatvādi vijñeyaṃ cāgamāntarāt

1.215.2

न विस्तरभयाद् अत्र व्यर्थत्वाद् अपि लिख्यते

na vistarabhayād atra vyarthatvād api likhyate

1.216

श्रीमद्गोपालदेवस्य सर्वैश्वर्यप्रदर्शिनः

śrīmadgopāladevasya sarvaiśvaryapradarśinaḥ

1.216.2

तादृक्शक्तिषु मन्त्रेषु नहि किंचिद् विचार्यते

tādṛkśaktiṣu mantreṣu nahi kiṃcid vicāryate

1.217

तथा च क्रमदीपिकायाम्

tathā ca kramadīpikāyām

1.217.2

सर्वेषु वर्णेषु तथाश्रमेषु नारीषु नानाह्वयजन्मभेषु दाता फलानाम् अभिवाञ्छितानां द्राग् एव गोपालकमन्त्र एषः

sarveṣu varṇeṣu tathāśrameṣu nārīṣu nānāhvayajanmabheṣu dātā phalānām abhivāñchitānāṃ drāg eva gopālakamantra eṣaḥ

Haribhaktivilāsa