1.20.2

त्रिकोणं तत्पुरं वह्नेर् अधो मेढ्रात् प्रतिष्ठितम्

trikoṇaṃ tatpuraṃ vahner adho meḍhrāt pratiṣṭhitam

1.21

यत् समाधौ परं ज्योतिर् अनन्तं विश्वतोमुखम्

yat samādhau paraṃ jyotir anantaṃ viśvatomukham

1.21.2

तस्मिन् दृष्टे महायोगे यातायातं न विद्यते

tasmin dṛṣṭe mahāyoge yātāyātaṃ na vidyate

1.22

स्वशब्देन भवेत् प्राणः स्वाधिष्ठानं तदाश्रयः

svaśabdena bhavet prāṇaḥ svādhiṣṭhānaṃ tadāśrayaḥ

1.22.2

स्वाधिष्ठानात् पदाद् अस्मान् मेढ्रम् एवाभिधीयते

svādhiṣṭhānāt padād asmān meḍhram evābhidhīyate

1.23

तन्तुना मणिवत् प्रोतो यत्र कन्दः सुषुम्णया

tantunā maṇivat proto yatra kandaḥ suṣumṇayā

1.23.2

तन्नाभिमण्डलं चक्रं प्रोच्यते मणिपूरकम्

tannābhimaṇḍalaṃ cakraṃ procyate maṇipūrakam

1.24

द्वादशारे महाचक्रे पुण्यपापविवर्जिते

dvādaśāre mahācakre puṇyapāpavivarjite

1.24.2

तावज् जीवो भ्रमत्य् एव यावत् तत्त्वं न विन्दति

tāvaj jīvo bhramaty eva yāvat tattvaṃ na vindati

1.25

ऊर्ध्वं मेढ्राद् अधो नाभेः कन्दयोनिः खगाण्डवत्

ūrdhvaṃ meḍhrād adho nābheḥ kandayoniḥ khagāṇḍavat

1.25.2

तत्र नाड्यः समुत्पन्नाः सहस्राणां द्विसप्ततिः

tatra nāḍyaḥ samutpannāḥ sahasrāṇāṃ dvisaptatiḥ

1.26

तेषु नाडिसहस्रेषु द्विसप्ततिर् उदाहृताः

teṣu nāḍisahasreṣu dvisaptatir udāhṛtāḥ

1.26.2

प्रधानं प्राणवाहिन्यो भूयस् तत्र दश स्मृताः

pradhānaṃ prāṇavāhinyo bhūyas tatra daśa smṛtāḥ

1.27

इडा च पिङ्गला चैव सुषुम्णा च तृतीयका

iḍā ca piṅgalā caiva suṣumṇā ca tṛtīyakā

1.27.2

गान्धारी हस्तिजिह्वा च पूषा चैव यशस्विनी

gāndhārī hastijihvā ca pūṣā caiva yaśasvinī

1.28

अलम्बुषा कुहूश् चैव शङ्खिनी दशमी स्मृता

alambuṣā kuhūś caiva śaṅkhinī daśamī smṛtā

1.28.2

एतन् नाडिमयं चक्रं ज्ञातव्यं योगिभिः सदा

etan nāḍimayaṃ cakraṃ jñātavyaṃ yogibhiḥ sadā

1.29

इडा वामे स्थिता भागे पिङ्गला दक्षिणे तथा

iḍā vāme sthitā bhāge piṅgalā dakṣiṇe tathā

1.29.2

सुषुम्णा मध्यदेशे तु गान्धारी वामचक्षुषि

suṣumṇā madhyadeśe tu gāndhārī vāmacakṣuṣi

1.30

दक्षिणे हस्तिजिह्वा च पूषा कर्णे च दक्षिणे

dakṣiṇe hastijihvā ca pūṣā karṇe ca dakṣiṇe

Gorakṣaśataka