9.62

तेन पापेन महता लोकदूष्यो ऽभवन् नृप

tena pāpena mahatā lokadūṣyo 'bhavan nṛpa

9.62.2

पश्चात् तापाभिभूतः सन् बभ्राम जगतीतले

paścāt tāpābhibhūtaḥ san babhrāma jagatītale

9.63

तिरस्कृतः स सर्वैश् च मुनिभिर् भावितात्मभिः

tiraskṛtaḥ sa sarvaiś ca munibhir bhāvitātmabhiḥ

9.63.2

ततो दुर्वाससं दृष्ट्वा प्रणम्य प्राञ्जलिर् नृप

tato durvāsasaṃ dṛṣṭvā praṇamya prāñjalir nṛpa

9.64

प्रसाद्योवाच विप्रः सः दुर्वासास् तु तपोनिधिः

prasādyovāca vipraḥ saḥ durvāsās tu taponidhiḥ

9.64.2

प्राह त्वत्कृतपापस्य निष्कृतिर् नास्ति कुत्रचित्

prāha tvatkṛtapāpasya niṣkṛtir nāsti kutracit

9.65

तथापि वक्ष्ये पापस्य निष्कृतिं शृणु भो द्विज

tathāpi vakṣye pāpasya niṣkṛtiṃ śṛṇu bho dvija

9.65.2

गोकर्णाख्यं महाक्षेत्रम् अस्ति पापविनाशनम्

gokarṇākhyaṃ mahākṣetram asti pāpavināśanam

9.66

तत्रास्ति सर्वपापघ्नी नदी कामाघनाशिनी

tatrāsti sarvapāpaghnī nadī kāmāghanāśinī

9.66.2

शिवत्रिशूलजनिता मन्मथस्याघशान्तये

śivatriśūlajanitā manmathasyāghaśāntaye

9.67

मात्रा सहैव त्वं गच्छ तत्र स्थित्वा विधानतः

mātrā sahaiva tvaṃ gaccha tatra sthitvā vidhānataḥ

9.67.2

स्नात्वा कामाघनाशिन्यां जपन् पञ्चाक्षरीं मनुम्

snātvā kāmāghanāśinyāṃ japan pañcākṣarīṃ manum

9.68

तत्र कामेश्वरं लिङ्गं पूजयस्व विधानतः

tatra kāmeśvaraṃ liṅgaṃ pūjayasva vidhānataḥ

9.68.2

इति दुर्वाससो वाक्यं श्रुत्वा तं प्रणिपत्य च

iti durvāsaso vākyaṃ śrutvā taṃ praṇipatya ca

9.69

कामाघनाशिनीं प्राप्य तत्रोवास चिरं द्विजः

kāmāghanāśinīṃ prāpya tatrovāsa ciraṃ dvijaḥ

9.69.2

स्नात्वा कामाघनाशिन्यां कामेशं परिपूजयन्

snātvā kāmāghanāśinyāṃ kāmeśaṃ paripūjayan

9.70

जपन् पञ्चाक्षरीं विद्यां द्वादशाब्दम् उवास ह

japan pañcākṣarīṃ vidyāṃ dvādaśābdam uvāsa ha

9.70.2

ततो गोकर्णम् आसाद्य कोटितीर्थादिषु क्रमात्

tato gokarṇam āsādya koṭitīrthādiṣu kramāt

9.71

स्नात्वा सर्वेषु तीर्थेषु तल्लिङ्गं परिपूज्य च

snātvā sarveṣu tīrtheṣu talliṅgaṃ paripūjya ca

9.71.2

कृतकृत्यस् ततो भूत्वा ययौ स्वभवनं द्विजः

kṛtakṛtyas tato bhūtvā yayau svabhavanaṃ dvijaḥ