7.1.2

समाधिश्च परं तत्त्वं बहुभाग्येन लभ्यते

samādhiśca paraṃ tattvaṃ bahubhāgyena labhyate

7.1.3

गुरोः कृपाप्रसादेन प्राप्यते गुरुभक्तितः

guroḥ kṛpāprasādena prāpyate gurubhaktitaḥ

7.2

विद्याप्रतीतिः स्वगुरुप्रतीतिर् आत्मप्रतीतिर् मनसः प्रबोधः

vidyāpratītiḥ svagurupratītir ātmapratītir manasaḥ prabodhaḥ

7.2.2

दिने दिने यस्य भवेत् स योगी सुशोभनाभ्यासम् उपैति सद्यः

dine dine yasya bhavet sa yogī suśobhanābhyāsam upaiti sadyaḥ

7.3

घटाद् भिन्नं मनः कृत्वा ऐक्यं कुर्यात् परात्मनि

ghaṭād bhinnaṃ manaḥ kṛtvā aikyaṃ kuryāt parātmani

7.3.2

समाधिं तं विजानीयान् मुक्तसंज्ञो दशादिभिः

samādhiṃ taṃ vijānīyān muktasaṃjño daśādibhiḥ

7.4

अहं ब्रह्म न चान्यो ऽस्मि ब्रह्मैवाहं न शोकभाक्

ahaṃ brahma na cānyo 'smi brahmaivāhaṃ na śokabhāk

7.4.2

सच्चिदानन्दरूपो ऽहं नित्यमुक्तः स्वभाववान्

saccidānandarūpo 'haṃ nityamuktaḥ svabhāvavān

7.5

शाम्भव्या चैव खेचर्या भ्रामर्या योनिमुद्रया

śāmbhavyā caiva khecaryā bhrāmaryā yonimudrayā

7.5.2

ध्यानं नादं रसानन्दं लयसिद्धिश् चतुर्विधा

dhyānaṃ nādaṃ rasānandaṃ layasiddhiś caturvidhā

7.6

पञ्चधा भक्तियोगेन मनोमूर्छा च षड्विधा

pañcadhā bhaktiyogena manomūrchā ca ṣaḍvidhā

7.6.2

षड्विधो ऽयं राजयोगः प्रत्येकम् अवधारयेत्

ṣaḍvidho 'yaṃ rājayogaḥ pratyekam avadhārayet

7.7

शाम्भवीं मुद्रिकां कृत्वा आत्मप्रत्यक्षम् आनयेत्

śāmbhavīṃ mudrikāṃ kṛtvā ātmapratyakṣam ānayet

7.7.2

बिन्दुब्रह्ममयं दृष्ट्वा मनस् तत्र नियोजयेत्

bindubrahmamayaṃ dṛṣṭvā manas tatra niyojayet

7.8

खमध्ये कुरु चात्मानम् आत्ममध्ये च खं कुरु

khamadhye kuru cātmānam ātmamadhye ca khaṃ kuru

7.8.2

आत्मानं खमयं दृष्ट्वा न किंचिद् अपि बाध्यते

ātmānaṃ khamayaṃ dṛṣṭvā na kiṃcid api bādhyate

7.8.3

सदानन्दमयो भूत्वा समाधिस्थो भवेन् नरः

sadānandamayo bhūtvā samādhistho bhaven naraḥ

7.9

खेचरीमुद्रासाधनाद् रसना ऊर्ध्वगता यदा

khecarīmudrāsādhanād rasanā ūrdhvagatā yadā

7.9.2

तदा समाधिसिद्धिः स्याद्धित्वा साधारणक्रियाम्

tadā samādhisiddhiḥ syāddhitvā sādhāraṇakriyām

7.10

अनिलं मन्दवेगेन भ्रामरीकुम्भकं चरेत्

anilaṃ mandavegena bhrāmarīkumbhakaṃ caret

Gheraṇḍasaṃhitā