3.53.3

एवम् अम्बरम् उक्तं च कटिसूत्रेण योजयेत्

evam ambaram uktaṃ ca kaṭisūtreṇa yojayet

3.54

भस्मना गात्रसंलिप्तं सिद्धासनं समाचरेत्

bhasmanā gātrasaṃliptaṃ siddhāsanaṃ samācaret

3.54.2

नासाभ्यां प्राणम् आकृष्य अपाने योजयेद् बलात्

nāsābhyāṃ prāṇam ākṛṣya apāne yojayed balāt

3.55

तावद् आकुञ्चयेद् गुह्यं शनैर् अश्विनीमुद्रया

tāvad ākuñcayed guhyaṃ śanair aśvinīmudrayā

3.55.2

यावद् गच्छेत् सुषुम्णायां वायुः प्रकाशयेद्धठात्

yāvad gacchet suṣumṇāyāṃ vāyuḥ prakāśayeddhaṭhāt

3.56

तावद् वायुप्रभेदेन कुम्भिका च भुजङ्गिनी

tāvad vāyuprabhedena kumbhikā ca bhujaṅginī

3.56.2

बद्धश्वासस् ततो भूत्वा च ऊर्ध्वमात्रं प्रपद्यते

baddhaśvāsas tato bhūtvā ca ūrdhvamātraṃ prapadyate

3.56.3

शब्दद्वयं फलैकं तु योनिमुद्रां च चालयेत्

śabdadvayaṃ phalaikaṃ tu yonimudrāṃ ca cālayet

3.57

विना शक्तिचालनेन योनिमुद्रा न सिध्यति

vinā śakticālanena yonimudrā na sidhyati

3.57.2

आदौ चालनम् अभ्यस्य योनिमुद्रां समभ्यसेत्

ādau cālanam abhyasya yonimudrāṃ samabhyaset

3.58

इति ते कथितं चण्ड प्रकारं शक्तिचालनम्

iti te kathitaṃ caṇḍa prakāraṃ śakticālanam

3.58.2

गोपनीयं प्रयत्नेन दिने दिने समभ्यसेत्

gopanīyaṃ prayatnena dine dine samabhyaset

3.59

मुद्रेयं परमा गोप्या जरामरणनाशिनी

mudreyaṃ paramā gopyā jarāmaraṇanāśinī

3.59.2

तस्माद् अभ्यसनं कार्यं योगिभिः सिद्धिकाङ्क्षिभिः

tasmād abhyasanaṃ kāryaṃ yogibhiḥ siddhikāṅkṣibhiḥ

3.60

नित्यं यो ऽभ्यसते योगी सिद्धिस् तस्य करे स्थिता

nityaṃ yo 'bhyasate yogī siddhis tasya kare sthitā

3.60.2

तस्य विग्रहसिद्धिः स्याद् रोगाणां संक्षयो भवेत्

tasya vigrahasiddhiḥ syād rogāṇāṃ saṃkṣayo bhavet

3.61

उदरे पश्चिमं तानं कृत्वा च तडागाकृति

udare paścimaṃ tānaṃ kṛtvā ca taḍāgākṛti

3.61.2

तडागी सा परा मुद्रा जरामृत्युविनाशिनी

taḍāgī sā parā mudrā jarāmṛtyuvināśinī

3.62

मुखं संमुद्रितं कृत्वा जिह्वामूलं प्रचालयेत्

mukhaṃ saṃmudritaṃ kṛtvā jihvāmūlaṃ pracālayet

3.62.2

शनैर् ग्रसेद् अमृतं तन् माण्डुकीं मुद्रिकां विदुः

śanair grased amṛtaṃ tan māṇḍukīṃ mudrikāṃ viduḥ

Gheraṇḍasaṃhitā