1.51.30.2

अयने विषुवे चैव ग्रहणे चन्द्रसूर्ययोः

ayane viṣuve caiva grahaṇe candrasūryayoḥ

1.51.31

संक्रान्त्यादिषु कालेषु दत्तं भवति चाक्षयम्

saṃkrāntyādiṣu kāleṣu dattaṃ bhavati cākṣayam

1.51.31.2

प्रयागादिषु तीर्थेषु गयायां च विशेषतः

prayāgādiṣu tīrtheṣu gayāyāṃ ca viśeṣataḥ

1.51.32

दानधर्मात्परो धर्मो भूतानां नेह विद्यते

dānadharmātparo dharmo bhūtānāṃ neha vidyate

1.51.32.2

स्वर्गायुर्भूतिकामेन दानं पापोपशान्तये

svargāyurbhūtikāmena dānaṃ pāpopaśāntaye

1.51.33

दीयमानं तु यो मोहाद्गोविप्राग्निसुरेषु च

dīyamānaṃ tu yo mohādgoviprāgnisureṣu ca

1.51.33.2

निवारयति पापात्मा तिर्यग्योनिं व्रजेन्नरः

nivārayati pāpātmā tiryagyoniṃ vrajennaraḥ

1.51.34

यस्तु दुर्भिक्षवेलायाम् अन्नाद्यं न प्रयच्छति

yastu durbhikṣavelāyām annādyaṃ na prayacchati

1.51.34.2

म्रियमाणेषु विप्रेषु ब्रह्महा स तु गर्हितः

mriyamāṇeṣu vipreṣu brahmahā sa tu garhitaḥ

1.51.35

इति श्रीगारुडे महापुराणे पूर्वखण्डे प्रथमांशाख्ये आचारकाण्डे दानधर्मनिरूपणं नामैकपञ्चाशत्तमो ऽध्यायः

iti śrīgāruḍe mahāpurāṇe pūrvakhaṇḍe prathamāṃśākhye ācārakāṇḍe dānadharmanirūpaṇaṃ nāmaikapañcāśattamo 'dhyāyaḥ

1.52.1

ब्रह्मोवाच

brahmovāca

1.52.1.2

अतः परं प्रवक्ष्यामि प्रायश्चित्तविधिं द्विजाः

ataḥ paraṃ pravakṣyāmi prāyaścittavidhiṃ dvijāḥ

1.52.1.3

ब्रह्महा च सुरापश्च स्तेयी च गुरुतल्पगः

brahmahā ca surāpaśca steyī ca gurutalpagaḥ

1.52.2

पञ्च पातकिनस्त्वेते तत्संयोगी च पञ्चमः

pañca pātakinastvete tatsaṃyogī ca pañcamaḥ

1.52.2.2

उपपापानि गोहत्याप्रभृतीनि सुरा जगुः

upapāpāni gohatyāprabhṛtīni surā jaguḥ

1.52.3

ब्रह्महा द्वादशाब्दानि कुटीं कृत्वा वने वसेत्

brahmahā dvādaśābdāni kuṭīṃ kṛtvā vane vaset

1.52.3.2

कुर्यादनशनं वाथ भृगोः पतनमेव च

kuryādanaśanaṃ vātha bhṛgoḥ patanameva ca

1.52.4

ज्वलन्तं वा विशेदग्निं जलं वा प्रविशेत्स्वयम्

jvalantaṃ vā viśedagniṃ jalaṃ vā praviśetsvayam

1.52.4.2

ब्राह्मणार्थे गवार्थे वा सम्यक् प्राणान्परित्यजेत्

brāhmaṇārthe gavārthe vā samyak prāṇānparityajet

1.52.5

दत्त्वा चान्नं च विदुषे ब्रह्महत्यां व्यपोहति

dattvā cānnaṃ ca viduṣe brahmahatyāṃ vyapohati

Garuḍapurāṇa