7.191

यावत् सर्वे ते दीपा नैर्वाणाः

yāvat sarve te dīpā nairvāṇāḥ

7.192

स तया प्रज्वलितः प्रदीपः प्रज्वलत्येव

sa tayā prajvalitaḥ pradīpaḥ prajvalatyeva

7.193

धर्मता खलु बुद्धानां भगवताम् न तावदुपस्थायकाः प्रतिसंलीयन्ते न यावद्बुद्धा भगवन्तः प्रतिसंलीना इति

dharmatā khalu buddhānāṃ bhagavatām na tāvadupasthāyakāḥ pratisaṃlīyante na yāvadbuddhā bhagavantaḥ pratisaṃlīnā iti

7.194

अथायुष्मानानन्दः संलक्षयति अस्थानमनवकाशो यद्बुद्धा भगवन्त आलोके शय्यां कल्पयन्ति

athāyuṣmānānandaḥ saṃlakṣayati asthānamanavakāśo yadbuddhā bhagavanta āloke śayyāṃ kalpayanti

7.195

यन्न्वहं दीपम् निर्वापयेयमिति

yannvahaṃ dīpam nirvāpayeyamiti

7.196

स हस्तेन निर्वापयितुमारब्धो न शक्नोति

sa hastena nirvāpayitumārabdho na śaknoti

7.197

ततश्चीवरकर्णिकेन ततो व्यजनेन तथापि न शक्नोति निर्वापयितुम्

tataścīvarakarṇikena tato vyajanena tathāpi na śaknoti nirvāpayitum

7.198

तत्र भगवानायुष्मन्तमानन्दमामन्त्रयते किमेतदानन्देति

tatra bhagavānāyuṣmantamānandamāmantrayate kimetadānandeti

7.199

स कथयति भगवन् मम बुद्धिरुत्पन्ना अस्थानमनवकाशो यद्बुद्धा भगवन्त आलोके शय्यां कल्पयन्ति

sa kathayati bhagavan mama buddhirutpannā asthānamanavakāśo yadbuddhā bhagavanta āloke śayyāṃ kalpayanti

7.200

यन्न्वहं दीपं निर्वापयेयमिति

yannvahaṃ dīpaṃ nirvāpayeyamiti

7.201

सो ऽहं हस्तेन निर्वापयितुमारब्धो न शक्नोमि ततश्चीवरकर्णिकेन ततो व्यजनेन तथापि न शक्नोमीति

so 'haṃ hastena nirvāpayitumārabdho na śaknomi tataścīvarakarṇikena tato vyajanena tathāpi na śaknomīti

7.202

भगवानाह खेदमानन्द आपत्स्यसे

bhagavānāha khedamānanda āpatsyase

7.203

यदि वैरम्भका अपि वायवो वायेयुः ते ऽपि न शक्नुयुर् निर्वापयितुं प्रागेव हस्तगतश्चीवरकर्णिको व्यजनं वा

yadi vairambhakā api vāyavo vāyeyuḥ te 'pi na śaknuyur nirvāpayituṃ prāgeva hastagataścīvarakarṇiko vyajanaṃ vā

7.204

तथा हि अयं प्रदीपस्तया दारिकया महता चित्ताभिसंस्कारेण प्रज्वलितः

tathā hi ayaṃ pradīpastayā dārikayā mahatā cittābhisaṃskāreṇa prajvalitaḥ

7.205

अपि तु आनन्द भविष्यत्यसौ दारिका वर्षशतायुषि प्रजायां शाक्यमुनिर् नाम तथागतो ऽर्हन् सम्यक्सम्बुद्धः

api tu ānanda bhaviṣyatyasau dārikā varṣaśatāyuṣi prajāyāṃ śākyamunir nāma tathāgato 'rhan samyaksambuddhaḥ

7.206

शारिपुत्रमौद्गल्यायनौ तस्याग्रयुगं भद्रयुगम् आनन्दो भिक्षुरुपासकः शुद्धोदनः पिता महामाया माता कपिलवस्तु नगरम् राहुलभद्रः कुमारः पुत्रः

śāriputramaudgalyāyanau tasyāgrayugaṃ bhadrayugam ānando bhikṣurupāsakaḥ śuddhodanaḥ pitā mahāmāyā mātā kapilavastu nagaram rāhulabhadraḥ kumāraḥ putraḥ

7.207

सापि धातुविभागं कृत्वा परिनिर्वास्यतीति

sāpi dhātuvibhāgaṃ kṛtvā parinirvāsyatīti

7.208

इदमवोचद्भगवान्

idamavocadbhagavān

7.209

आत्तमनसस्ते च भिक्षवो भगवतो भाषितमभ्यनन्दन्

āttamanasaste ca bhikṣavo bhagavato bhāṣitamabhyanandan

8.1

बुद्धो भवाञ् श्रावस्त्यां विहरति जेतवने अनाथपिण्डदस्यारामे सत्कृतो गुरुकृतो मानितः पूजितो राजभी राजमात्रैर्धनिभिः पौरैर्ब्राह्मणैर्गृहपतिभिः श्रेष्ठिभिः सार्थवाहैर्देवैर् नागैर्यक्षैरसुरैर्गरुडैः किन्नरैर्महोरगैरिति देवनागयक्षासुरगरुडकिन्नरमहोरगाभ्यर्चितो बुद्धो भगवांल्लाभी चीवरपिण्डपातशयनासनग्लानप्रत्ययभैषज्यपरिष्काराणां सश्रावकसंघः

buddho bhavāñ śrāvastyāṃ viharati jetavane anāthapiṇḍadasyārāme satkṛto gurukṛto mānitaḥ pūjito rājabhī rājamātrairdhanibhiḥ paurairbrāhmaṇairgṛhapatibhiḥ śreṣṭhibhiḥ sārthavāhairdevair nāgairyakṣairasurairgaruḍaiḥ kinnarairmahoragairiti devanāgayakṣāsuragaruḍakinnaramahoragābhyarcito buddho bhagavāṃllābhī cīvarapiṇḍapātaśayanāsanaglānapratyayabhaiṣajyapariṣkārāṇāṃ saśrāvakasaṃghaḥ

Divyāvadāna