7.171

स येन भगवांस्तेनोपसंक्रान्तः

sa yena bhagavāṃstenopasaṃkrāntaḥ

7.172

उपसंक्रम्य भगवतः पादौ शिरसा वन्दित्वा एकान्ते निषण्णः

upasaṃkramya bhagavataḥ pādau śirasā vanditvā ekānte niṣaṇṇaḥ

7.173

एकान्तनिषण्णं राजानं प्रसेनजितं कौशलं भगवान् धर्म्यया कथया संदर्शयति समादापयति समुत्तेजयति संप्रहर्षयति

ekāntaniṣaṇṇaṃ rājānaṃ prasenajitaṃ kauśalaṃ bhagavān dharmyayā kathayā saṃdarśayati samādāpayati samuttejayati saṃpraharṣayati

7.174

अनेकपर्यायेण धर्म्यया कथया संदर्श्य समादाप्य समुत्तेज्य संप्रहर्ष्य तूष्णीम्

anekaparyāyeṇa dharmyayā kathayā saṃdarśya samādāpya samuttejya saṃpraharṣya tūṣṇīm

7.175

अथ राजा प्रसेनजित् कौशल उत्थायासनाद् एकांसमुत्तरासङ्गं कृत्वा भगवन्तमिदमवोचत् अधिवासयतु मे भगवांस्त्रैमासीं चीवरपिण्डपातशयनासनग्लानप्रत्ययभैषज्यपरिष्कारैः सार्धं संघेनेति

atha rājā prasenajit kauśala utthāyāsanād ekāṃsamuttarāsaṅgaṃ kṛtvā bhagavantamidamavocat adhivāsayatu me bhagavāṃstraimāsīṃ cīvarapiṇḍapātaśayanāsanaglānapratyayabhaiṣajyapariṣkāraiḥ sārdhaṃ saṃgheneti

7.176

अधिवासयति भगवान् राज्ञः प्रसेनजितः कौशलस्य तूष्णीभावेन

adhivāsayati bhagavān rājñaḥ prasenajitaḥ kauśalasya tūṣṇībhāvena

7.177

ततो राज्ञा प्रसेनजिता कौशलेन बुद्धमुखाय भिक्षुसंघाय त्रैमास्यं शतरसं भोजनं दत्तम्

tato rājñā prasenajitā kauśalena buddhamukhāya bhikṣusaṃghāya traimāsyaṃ śatarasaṃ bhojanaṃ dattam

7.178

एकैकश्च भिक्षुः शतसहस्रेण वस्त्रेणाच्छादितः

ekaikaśca bhikṣuḥ śatasahasreṇa vastreṇācchāditaḥ

7.179

तैलस्य च कुम्भकोटिं समुदानीय दीपमाला अभ्युद्यतो दातुम्

tailasya ca kumbhakoṭiṃ samudānīya dīpamālā abhyudyato dātum

7.180

तत्र भक्ते पूजायां च महान् कोलाहलो जातः

tatra bhakte pūjāyāṃ ca mahān kolāhalo jātaḥ

7.181

यावदन्यतमा नगरावलम्बिका अतीव दुःखिता

yāvadanyatamā nagarāvalambikā atīva duḥkhitā

7.182

तया क्रोडमल्लकेन भिक्षामटन्त्या उच्चशब्दः श्रुतः

tayā kroḍamallakena bhikṣāmaṭantyā uccaśabdaḥ śrutaḥ

7.183

श्रुत्वा च पुनः पृच्छति भवन्तः किमेष उच्चशब्दो महाशब्द इति

śrutvā ca punaḥ pṛcchati bhavantaḥ kimeṣa uccaśabdo mahāśabda iti

7.184

अपरैः समाख्यातम् राज्ञा प्रसेनजिता कौशलेन बुद्धप्रमुखो भिक्षुसंघस्त्रैमास्यं भोजितः एकैकश्च भिक्षुः शतसहस्रेण वस्त्रेण आच्छादितः तैलस्य कुम्भकोटिं च समुदानीय दीपमाला अभ्युद्यतो दातुमिति

aparaiḥ samākhyātam rājñā prasenajitā kauśalena buddhapramukho bhikṣusaṃghastraimāsyaṃ bhojitaḥ ekaikaśca bhikṣuḥ śatasahasreṇa vastreṇa ācchāditaḥ tailasya kumbhakoṭiṃ ca samudānīya dīpamālā abhyudyato dātumiti

7.185

ततस्तस्या नगरावलम्बिकाया एतदभवत् अयं तावद्राजा प्रसेनजित् कौशलः पुण्यैरतृप्तो ऽद्यापि दानानि ददाति पुण्यानि करोति

tatastasyā nagarāvalambikāyā etadabhavat ayaṃ tāvadrājā prasenajit kauśalaḥ puṇyairatṛpto 'dyāpi dānāni dadāti puṇyāni karoti

7.186

यन्न्वहमपि कुतश्चित् समुदानीय भगवतः प्रदीपं दद्यामिति

yannvahamapi kutaścit samudānīya bhagavataḥ pradīpaṃ dadyāmiti

7.187

तया खण्डमल्लके तैलस्य स्तोकम् याचयित्वा प्रदीपं प्रज्वाल्य भगवतश्चङ्क्रमे दत्तः

tayā khaṇḍamallake tailasya stokam yācayitvā pradīpaṃ prajvālya bhagavataścaṅkrame dattaḥ

7.188

पादयोर् निपत्य प्रणिधानं कृतम् अनेनाहं कुशलमूलेन यथायं भगवाञ् शाक्यमुनिर्वर्षशतायुषि प्रजायां शाक्यमुनिर् नाम शास्ता लोक उत्पन्नः एवमहमपि वर्षशतायुषि प्रजायां शाक्यमुनिरेव शास्ता भवेयम्

pādayor nipatya praṇidhānaṃ kṛtam anenāhaṃ kuśalamūlena yathāyaṃ bhagavāñ śākyamunirvarṣaśatāyuṣi prajāyāṃ śākyamunir nāma śāstā loka utpannaḥ evamahamapi varṣaśatāyuṣi prajāyāṃ śākyamunireva śāstā bhaveyam

7.189

यथा चास्य शारिपुत्रमौद्गल्यायनाग्रयुगं भद्रयुगमानन्दो भिक्षुरुपस्थायकः शुद्धोदनः पिता माता महामाया राहुलभद्रः कुमारः पुत्रः

yathā cāsya śāriputramaudgalyāyanāgrayugaṃ bhadrayugamānando bhikṣurupasthāyakaḥ śuddhodanaḥ pitā mātā mahāmāyā rāhulabhadraḥ kumāraḥ putraḥ

7.190

यथायं भगवान् धातुविभागं कृत्वा परिनिर्वास्यति एवमहमपि धातुविभागं कृत्वा परिनिर्वापयेयमिति

yathāyaṃ bhagavān dhātuvibhāgaṃ kṛtvā parinirvāsyati evamahamapi dhātuvibhāgaṃ kṛtvā parinirvāpayeyamiti

Divyāvadāna