7.15

अनाथपिण्डदो गृहपतिस्तामेव रात्रिं शुचि प्रणीतं खादनीयभोजनीयं समुदानीय काल्यमेवोत्थाय आसनानि प्रज्ञप्य उदकमणीन् प्रतिष्ठाप्य भगवतो दूतेन कालमारोचयति समयो भदन्त सज्जं भक्तम् यस्येदानीं भगवान् कालं मन्यत इति

anāthapiṇḍado gṛhapatistāmeva rātriṃ śuci praṇītaṃ khādanīyabhojanīyaṃ samudānīya kālyamevotthāya āsanāni prajñapya udakamaṇīn pratiṣṭhāpya bhagavato dūtena kālamārocayati samayo bhadanta sajjaṃ bhaktam yasyedānīṃ bhagavān kālaṃ manyata iti

7.16

अथ भगवान् पूर्वाह्णे निवास्य पात्रचीवरमादाय भिक्षुगणपरिवृतो भिक्षुसंघपुरस्कृतो येन अनाथपिण्डदस्य गृहपतेर्भक्ताभिसारस्तेनोपसंक्रान्तः

atha bhagavān pūrvāhṇe nivāsya pātracīvaramādāya bhikṣugaṇaparivṛto bhikṣusaṃghapuraskṛto yena anāthapiṇḍadasya gṛhapaterbhaktābhisārastenopasaṃkrāntaḥ

7.17

उपसंक्रम्य पुरस्ताद्भिक्षुसंघस्य प्रज्ञप्त एवासने निषण्णः

upasaṃkramya purastādbhikṣusaṃghasya prajñapta evāsane niṣaṇṇaḥ

7.18

अथ अनाथपिण्डदो गृहपतिः सुखोपनिषण्णं बुद्धप्रमुखं भिक्षुसंघं विदित्वा शुचिना प्रणीतेन खादनीयभोजनीयेन स्वहस्तं संतर्पयति संप्रवारयति

atha anāthapiṇḍado gṛhapatiḥ sukhopaniṣaṇṇaṃ buddhapramukhaṃ bhikṣusaṃghaṃ viditvā śucinā praṇītena khādanīyabhojanīyena svahastaṃ saṃtarpayati saṃpravārayati

7.19

अनेकपर्यायेण शुचिना प्रणीतेन खादनीयभोजनीयेन स्वहस्तं संतर्प्य संप्रवार्य भगवन्तं भुक्तवन्तं विदित्वा धौतहस्तमपनीतपात्रं नीचतरमासनं गृहीत्वा भगवतः पुरस्तान्निषण्णो धर्मश्रवणाय

anekaparyāyeṇa śucinā praṇītena khādanīyabhojanīyena svahastaṃ saṃtarpya saṃpravārya bhagavantaṃ bhuktavantaṃ viditvā dhautahastamapanītapātraṃ nīcataramāsanaṃ gṛhītvā bhagavataḥ purastānniṣaṇṇo dharmaśravaṇāya

7.20

अथायुष्मान् महाकाश्यपो ऽन्यतमस्मादारण्यकाच्छयनासनात् दीर्घकेशश्मश्रुर्लूहचीवरो जेतवनं गतः

athāyuṣmān mahākāśyapo 'nyatamasmādāraṇyakācchayanāsanāt dīrghakeśaśmaśrurlūhacīvaro jetavanaṃ gataḥ

7.21

स पश्यति जेतवनं शून्यम्

sa paśyati jetavanaṃ śūnyam

7.22

तेनोपधिवारिकः पृष्टः कुत्र बुद्धप्रमुखो भिक्षुसंघ इति

tenopadhivārikaḥ pṛṣṭaḥ kutra buddhapramukho bhikṣusaṃgha iti

7.23

तेन समाख्यातम् अनाथपिण्डदेन गृहपतिनोपनिमन्त्रित इति

tena samākhyātam anāthapiṇḍadena gṛhapatinopanimantrita iti

7.24

स संलक्षयति गच्छामि तत्रैव पिण्डपातं परिभोक्ष्यामि बुद्धप्रमुखं च भिक्षुसंघं पर्युपासिष्यामीति

sa saṃlakṣayati gacchāmi tatraiva piṇḍapātaṃ paribhokṣyāmi buddhapramukhaṃ ca bhikṣusaṃghaṃ paryupāsiṣyāmīti

7.25

सो ऽनाथपिण्डदस्य गृहपतेर् निवेशनं गतः

so 'nāthapiṇḍadasya gṛhapater niveśanaṃ gataḥ

7.26

अतो दौवारिकेन उक्तः आर्य तिष्ठ मा प्रवेक्ष्यसि

ato dauvārikena uktaḥ ārya tiṣṭha mā pravekṣyasi

7.27

कस्यार्थाय अनाथपिण्डदेन गृहपतिना आज्ञा दत्ता मा तावत् तीर्थ्यानां प्रवेशं दास्यसि यावद्बुद्धप्रमुखेन भिक्षुसंघेन भुक्तम्

kasyārthāya anāthapiṇḍadena gṛhapatinā ājñā dattā mā tāvat tīrthyānāṃ praveśaṃ dāsyasi yāvadbuddhapramukhena bhikṣusaṃghena bhuktam

7.28

ततः पश्चात् तीर्थ्यानां दास्यामि इति

tataḥ paścāt tīrthyānāṃ dāsyāmi iti

7.29

अथायुष्मान् महाकाश्यपः संलक्षयति तस्य मे लाभाः सुलब्धाः यन्मां श्राद्धा ब्राह्मणगृहपतयः श्रमणशाक्यपुत्रीय इति न जानन्ते

athāyuṣmān mahākāśyapaḥ saṃlakṣayati tasya me lābhāḥ sulabdhāḥ yanmāṃ śrāddhā brāhmaṇagṛhapatayaḥ śramaṇaśākyaputrīya iti na jānante

7.30

गच्छामि कृपणजनस्यानुग्रहं करोमीति विदित्वा उद्यानं गतः

gacchāmi kṛpaṇajanasyānugrahaṃ karomīti viditvā udyānaṃ gataḥ

7.31

स संलक्षयति अद्य मया कस्यानुग्रहः कर्तव्य इति

sa saṃlakṣayati adya mayā kasyānugrahaḥ kartavya iti

7.32

यावदन्यतमा नगरावलम्बिका कुष्ठाभिद्रुता सरुजार्ता पक्वगात्रा भिक्षामटति

yāvadanyatamā nagarāvalambikā kuṣṭhābhidrutā sarujārtā pakvagātrā bhikṣāmaṭati

7.33

स तस्याः सकाशमुपसंक्रान्तः

sa tasyāḥ sakāśamupasaṃkrāntaḥ

7.34

तस्याश्च भिक्षायामायासः सम्पन्नः

tasyāśca bhikṣāyāmāyāsaḥ sampannaḥ

Divyāvadāna