6.95

अथ अनाथपिण्डदो गृहपतिर्भगवन्तमिदमवोचत् यदि भगवाननुजानीयात् अत्र महं प्रज्ञापयेयम्

atha anāthapiṇḍado gṛhapatirbhagavantamidamavocat yadi bhagavānanujānīyāt atra mahaṃ prajñāpayeyam

6.96

अनुजानामि गृहपते प्रज्ञापयितव्यम्

anujānāmi gṛhapate prajñāpayitavyam

6.97

ततो ऽनाथपिण्डदेन गृहपतिना महः प्रज्ञापितः

tato 'nāthapiṇḍadena gṛhapatinā mahaḥ prajñāpitaḥ

6.98

तोयिकामह इति संज्ञा संवृत्ता

toyikāmaha iti saṃjñā saṃvṛttā

6.99

इदमवोचद्भगवान्

idamavocadbhagavān

6.100

आत्तमनसस् ते भिक्षवो भगवतो भाषितमभ्यनन्दन्

āttamanasas te bhikṣavo bhagavato bhāṣitamabhyanandan

7.1

अथ भगवान् कोशलेषु जनपदेषु चारिकां चरञ् श्रावस्तीमनुप्राप्तः

atha bhagavān kośaleṣu janapadeṣu cārikāṃ carañ śrāvastīmanuprāptaḥ

7.2

श्रावस्त्यां विहरति जेतवने अनाथपिण्डदस्यारामे

śrāvastyāṃ viharati jetavane anāthapiṇḍadasyārāme

7.3

अश्रौषीदनाथपिण्डदो गृहपतिः भगवान् कोशलेषु जनपदेषु चारिकां चरञ् श्रावस्तीमनुप्राप्तः

aśrauṣīdanāthapiṇḍado gṛhapatiḥ bhagavān kośaleṣu janapadeṣu cārikāṃ carañ śrāvastīmanuprāptaḥ

7.4

श्रावस्त्यां विहरति जेतवने अनाथपिण्डदस्याराम इति

śrāvastyāṃ viharati jetavane anāthapiṇḍadasyārāma iti

7.5

श्रुत्वा च पुनर्येन भगवांस्तेनोपसंक्रान्तः

śrutvā ca punaryena bhagavāṃstenopasaṃkrāntaḥ

7.6

उपसंक्रम्य भगवतः पादौ शिरसा वन्दित्वा एकान्ते निषण्णः

upasaṃkramya bhagavataḥ pādau śirasā vanditvā ekānte niṣaṇṇaḥ

7.7

एकान्तनिषण्णमनाथपिण्डदं गृहपतिं भगवान् धर्म्यया कथया संदर्शयति समादापयति समुत्तेजयति संप्रहर्षयति

ekāntaniṣaṇṇamanāthapiṇḍadaṃ gṛhapatiṃ bhagavān dharmyayā kathayā saṃdarśayati samādāpayati samuttejayati saṃpraharṣayati

7.8

अनेकपर्यायेण धर्म्यया कथया संदर्श्य समादाप्य समुत्तेज्य संप्रहर्ष्य तूष्णीम्

anekaparyāyeṇa dharmyayā kathayā saṃdarśya samādāpya samuttejya saṃpraharṣya tūṣṇīm

7.9

अनाथपिण्डदो गृहपतिर् उत्थायासनाद् एकांसमुत्तरासंगं कृत्वा येन भगवांस्तेनाञ्जलिं प्रणम्य भगवन्तमिदमवोचत् अधिवासयतु मे भगवाञ् श्वो ऽन्तर्गृहे भुक्तेन सार्धं भिक्षुसंघेन इति

anāthapiṇḍado gṛhapatir utthāyāsanād ekāṃsamuttarāsaṃgaṃ kṛtvā yena bhagavāṃstenāñjaliṃ praṇamya bhagavantamidamavocat adhivāsayatu me bhagavāñ śvo 'ntargṛhe bhuktena sārdhaṃ bhikṣusaṃghena iti

7.10

अधिवासयति भगवाननाथपिण्डदस्य गृहपतेस्तूष्णीभावेन

adhivāsayati bhagavānanāthapiṇḍadasya gṛhapatestūṣṇībhāvena

7.11

अनाथपिण्डदो गृहपतिर्भगवतस् तूष्णीभावेनाधिवासनां विदित्वा भगवतो भाषितमभिनन्द्यानुमोद्य भगवतः पादौ शिरसा वन्दित्वा भगवतो ऽन्तिकात् प्रक्रान्तो येन स्वनिवेशनं तेनोपसंक्रान्तः

anāthapiṇḍado gṛhapatirbhagavatas tūṣṇībhāvenādhivāsanāṃ viditvā bhagavato bhāṣitamabhinandyānumodya bhagavataḥ pādau śirasā vanditvā bhagavato 'ntikāt prakrānto yena svaniveśanaṃ tenopasaṃkrāntaḥ

7.12

उपसंक्रम्य दौवारिकं पुरुषमामन्त्रयते न तावद्भोः पुरुष तीर्थ्यानां प्रवेशो दातव्यो यावद् बुद्धप्रमुखेन भिक्षुसंघेन भुक्तं भवति

upasaṃkramya dauvārikaṃ puruṣamāmantrayate na tāvadbhoḥ puruṣa tīrthyānāṃ praveśo dātavyo yāvad buddhapramukhena bhikṣusaṃghena bhuktaṃ bhavati

7.13

ततः पश्चादहं तीर्थ्यानां दास्यामीति

tataḥ paścādahaṃ tīrthyānāṃ dāsyāmīti

7.14

एवमार्येति दौवारिकः पुरुषो ऽनाथपिण्डदस्य गृहपतेः प्रत्यश्रौषीत्

evamāryeti dauvārikaḥ puruṣo 'nāthapiṇḍadasya gṛhapateḥ pratyaśrauṣīt

Divyāvadāna