6.80

अपरैस्तत्र प्रदीपमाला दत्ता चित्तं चाभिसंस्कृतम् मालाविहारस्य भगवता इयत् पुण्यमुक्तम्

aparaistatra pradīpamālā dattā cittaṃ cābhisaṃskṛtam mālāvihārasya bhagavatā iyat puṇyamuktam

6.81

अस्माकं प्रदीपदानस्य कियत्पुण्यं भविष्यतीति अथ भगवांस्तेषामपि चेतसा चित्तमाज्ञाय गाथां भाषते

asmākaṃ pradīpadānasya kiyatpuṇyaṃ bhaviṣyatīti atha bhagavāṃsteṣāmapi cetasā cittamājñāya gāthāṃ bhāṣate

6.82

शतं सहस्राणि सुवर्णकोट्यो जाम्बूनदा नास्य समा भवन्ति

śataṃ sahasrāṇi suvarṇakoṭyo jāmbūnadā nāsya samā bhavanti

6.82.2

यो बुद्धचैत्येषु प्रसन्नचित्तः प्रदीपदानं प्रकरोति विद्वान्

yo buddhacaityeṣu prasannacittaḥ pradīpadānaṃ prakaroti vidvān

6.83

अपरैस्तत्र गन्धाभिषेको दत्तः

aparaistatra gandhābhiṣeko dattaḥ

6.84

एवं चेतसा चित्तमभिसंस्कृतम् प्रदीपस्य भगवता इयत् पुण्यमुक्तम्

evaṃ cetasā cittamabhisaṃskṛtam pradīpasya bhagavatā iyat puṇyamuktam

6.85

अस्माकं गन्धाभिषेकस्य कियत्पुण्यं भविष्यतीति अथ भगवांस्तेषामपि चेतसा चित्तमाज्ञाय गाथां भाषते

asmākaṃ gandhābhiṣekasya kiyatpuṇyaṃ bhaviṣyatīti atha bhagavāṃsteṣāmapi cetasā cittamājñāya gāthāṃ bhāṣate

6.86

शतं सहस्राणि सुवर्णराशयो जाम्बूनदा नास्य समा भवन्ति

śataṃ sahasrāṇi suvarṇarāśayo jāmbūnadā nāsya samā bhavanti

6.86.2

यो बुद्धचैत्येषु प्रसन्नचित्तो गन्धाभिषेकं प्रकरोति विद्वान्

yo buddhacaityeṣu prasannacitto gandhābhiṣekaṃ prakaroti vidvān

6.87

अपरैस्तत्र छत्रध्वजपताकारोपणं कृतम्

aparaistatra chatradhvajapatākāropaṇaṃ kṛtam

6.88

एवं च चेतसा चित्तमाज्ञाय गाथां भाषते

evaṃ ca cetasā cittamājñāya gāthāṃ bhāṣate

6.89

तिष्ठन्तं पूजयेद्यश्च यश्चापि परिनिर्वृतम्

tiṣṭhantaṃ pūjayedyaśca yaścāpi parinirvṛtam

6.89.2

समं चित्तं प्रसाद्येह नास्ति पुण्यविशेषता

samaṃ cittaṃ prasādyeha nāsti puṇyaviśeṣatā

6.90

एवं ह्यचिन्तिया बुद्धा बुद्धधर्माप्यचिन्तिया

evaṃ hyacintiyā buddhā buddhadharmāpyacintiyā

6.90.2

अचिन्तिये प्रसन्नानां विपाको ऽपि अचिन्तियः

acintiye prasannānāṃ vipāko 'pi acintiyaḥ

6.91

तेषाम् अचिन्तियानाम् अप्रतिहतधर्मचक्रवर्तिनाम्

teṣām acintiyānām apratihatadharmacakravartinām

6.91.2

सम्यक्सम्बुद्धानां नालं गुणपारमधिगन्तुम्

samyaksambuddhānāṃ nālaṃ guṇapāramadhigantum

6.92

इति

iti

6.93

ततो भगवता तस्य महाजनकायस्य तथाविधा धर्मदेशना कृता यां श्रुत्वा अनेकैः प्राणिशतसहस्रैर्महान् विशेषो ऽधिगतः

tato bhagavatā tasya mahājanakāyasya tathāvidhā dharmadeśanā kṛtā yāṃ śrutvā anekaiḥ prāṇiśatasahasrairmahān viśeṣo 'dhigataḥ

6.94

कैश्चिच्छ्रावकबोधौ चित्तान्युत्पादितानि कैश्चित् प्रत्येकबोधौ कैश्चिदनुत्तरायां सम्यक्सम्बोधौ कैश्चिन्मूर्धागतानि कैश्चिन्मूर्धानः कैश्चिदुष्णगतान्यासादितानि कैश्चित् सत्यानुलोमाः क्षान्तयः कैश्चित्स्रोतआपत्तिफलं साक्षात्कृतम् कैश्चित् सकृदागामिफलम् कैश्चित् सर्वक्लेशप्रहाणादर्हत्त्वं साक्षात्कृतम् यद्भूयसा बुद्धनिम्ना धर्मप्रवणाः संघप्राग्भारा व्यवस्थापिताः

kaiścicchrāvakabodhau cittānyutpāditāni kaiścit pratyekabodhau kaiścidanuttarāyāṃ samyaksambodhau kaiścinmūrdhāgatāni kaiścinmūrdhānaḥ kaiściduṣṇagatānyāsāditāni kaiścit satyānulomāḥ kṣāntayaḥ kaiścitsrotaāpattiphalaṃ sākṣātkṛtam kaiścit sakṛdāgāmiphalam kaiścit sarvakleśaprahāṇādarhattvaṃ sākṣātkṛtam yadbhūyasā buddhanimnā dharmapravaṇāḥ saṃghaprāgbhārā vyavasthāpitāḥ

Divyāvadāna