6.63

तैः श्रुतम् अन्तर्हितो ऽसौ भगवतः काश्यपस्य सम्यक्सम्बुद्धस्य शरीरसंघातधातुर् अविकोपित इति

taiḥ śrutam antarhito 'sau bhagavataḥ kāśyapasya samyaksambuddhasya śarīrasaṃghātadhātur avikopita iti

6.64

श्रुत्वा च पुनस्तेषां दुःखदौर्मनस्यमुत्पन्नम् वृथा अस्माकमागमनं जातमिति

śrutvā ca punasteṣāṃ duḥkhadaurmanasyamutpannam vṛthā asmākamāgamanaṃ jātamiti

6.65

अथान्यतमेन चोपासकेन स प्रदेशः प्रदक्षिणीकृतः

athānyatamena copāsakena sa pradeśaḥ pradakṣiṇīkṛtaḥ

6.66

एवं च चेतसा चित्तमभिसंस्कृतम् अस्मान्मे पदाविहारात् कियत् पुण्यं भविष्यतीति

evaṃ ca cetasā cittamabhisaṃskṛtam asmānme padāvihārāt kiyat puṇyaṃ bhaviṣyatīti

6.67

अथ भगवांस्तस्य महाजनकायस्याविप्रतिसारसंजननार्थं तस्य चोपासकस्य चेतसा चित्तमाज्ञाय गाथां भाषते

atha bhagavāṃstasya mahājanakāyasyāvipratisārasaṃjananārthaṃ tasya copāsakasya cetasā cittamājñāya gāthāṃ bhāṣate

6.68

शतं सहस्राणि सुवर्णनिष्का जाम्बूनदा नास्य समा भवन्ति

śataṃ sahasrāṇi suvarṇaniṣkā jāmbūnadā nāsya samā bhavanti

6.68.2

यो बुद्धचैत्येषु प्रसन्नचित्तः पदाविहारं प्रकरोति विद्वान्

yo buddhacaityeṣu prasannacittaḥ padāvihāraṃ prakaroti vidvān

6.69

अन्यतमेन उपासकेन तस्मिन् प्रदेशे मृत्तिकापिण्डो दत्तः

anyatamena upāsakena tasmin pradeśe mṛttikāpiṇḍo dattaḥ

6.70

एवं च चित्तमभिसंस्कृतम् पदाविहारस्य तावदियत् पुण्यमाख्यातं भगवता अन्यत्र

evaṃ ca cittamabhisaṃskṛtam padāvihārasya tāvadiyat puṇyamākhyātaṃ bhagavatā anyatra

6.71

मृत्तिकापिण्डस्य कियत् पुण्यं भविष्यतीति अथ भगवांस्तस्यापि चेतसा चित्तमाज्ञाय भाषते

mṛttikāpiṇḍasya kiyat puṇyaṃ bhaviṣyatīti atha bhagavāṃstasyāpi cetasā cittamājñāya bhāṣate

6.72

शतं सहस्राणि सुवर्णनिष्का जाम्बूनदा नास्य समा भवन्ति

śataṃ sahasrāṇi suvarṇaniṣkā jāmbūnadā nāsya samā bhavanti

6.72.2

यो बुद्धचैत्येषु प्रसन्नचित्त आरोपयेन्मृत्तिकपिण्डमेकम्

yo buddhacaityeṣu prasannacitta āropayenmṛttikapiṇḍamekam

6.73

ततः श्रुत्वा अनेकैः प्राणिशतसहस्रैर्मृत्तिकापिण्डसमारोपणं कृतम्

tataḥ śrutvā anekaiḥ prāṇiśatasahasrairmṛttikāpiṇḍasamāropaṇaṃ kṛtam

6.74

अपरैस्तत्र मुक्तपुष्पाण्यवक्षिप्तानि एवं च चित्तमभिसंस्कृतम् पदाविहारस्य मृत्तिकापिण्डस्य चेयत् पुण्यमुक्तं भगवता अस्माकं तु मुक्तपुष्पाणां कियत् पुण्यं भविष्यतीति अथ भगवांस्तेषामपि चेतसा चित्तमाज्ञाय गाथां भाषते

aparaistatra muktapuṣpāṇyavakṣiptāni evaṃ ca cittamabhisaṃskṛtam padāvihārasya mṛttikāpiṇḍasya ceyat puṇyamuktaṃ bhagavatā asmākaṃ tu muktapuṣpāṇāṃ kiyat puṇyaṃ bhaviṣyatīti atha bhagavāṃsteṣāmapi cetasā cittamājñāya gāthāṃ bhāṣate

6.75

शतं सहस्राणि सुवर्णनिष्का जाम्बूनदा नास्य समा भवन्ति

śataṃ sahasrāṇi suvarṇaniṣkā jāmbūnadā nāsya samā bhavanti

6.76

यो बुद्धचैत्येषु प्रसन्नचित्तः आरोपयेन्मुक्तसुपुष्पराशिम्

yo buddhacaityeṣu prasannacittaḥ āropayenmuktasupuṣparāśim

6.77

अपरैस्तत्र मालाविहारः कृतः चित्तं चाभिसंस्कृतम् मुक्तपुष्पाणां भगवता इयत् पुण्यमुक्तम्

aparaistatra mālāvihāraḥ kṛtaḥ cittaṃ cābhisaṃskṛtam muktapuṣpāṇāṃ bhagavatā iyat puṇyamuktam

6.78

अस्माकं मालाविहारस्य कियत्पुण्यं भविष्यतीति अथ भगवांस्तेषामपि चेतसा चित्तमाज्ञाय गाथां भाषते

asmākaṃ mālāvihārasya kiyatpuṇyaṃ bhaviṣyatīti atha bhagavāṃsteṣāmapi cetasā cittamājñāya gāthāṃ bhāṣate

6.79

शतं सहस्राणि सुवर्णवाहा जाम्बूनदा नास्य समा भवन्ति

śataṃ sahasrāṇi suvarṇavāhā jāmbūnadā nāsya samā bhavanti

6.79.2

यो बुद्धचैत्येषु प्रसन्नचित्तो मालाविहारं प्रकरोति विद्वान्

yo buddhacaityeṣu prasannacitto mālāvihāraṃ prakaroti vidvān

Divyāvadāna