6.43

तेन यथागृहीतयैव प्रतोदयष्ट्या तत्रस्थेनैवाभिवादनं कृतम् अभिवादये बुद्धं भगवन्तमिति

tena yathāgṛhītayaiva pratodayaṣṭyā tatrasthenaivābhivādanaṃ kṛtam abhivādaye buddhaṃ bhagavantamiti

6.44

तत्र भगवानायुष्मन्तमानन्दमामन्त्रयते भवक्षयकरः क्षणम् एष ब्राह्मणः

tatra bhagavānāyuṣmantamānandamāmantrayate bhavakṣayakaraḥ kṣaṇam eṣa brāhmaṇaḥ

6.45

सचेदस्यैवं सम्यक्सम्प्रत्ययज्ञानदर्शनं प्रवर्तते एतस्मिन् प्रदेशे काश्यपस्य सम्यक्सम्बुद्धस्याविकोपितो ऽस्थिसंघातस्तिष्ठतीत्य् अहमनेनोपक्रमेण वन्दितो भवेयम् एवमनेन द्वाभ्यां सम्यक्सम्बुद्धाभ्यां वन्दना कृता भवेत्

sacedasyaivaṃ samyaksampratyayajñānadarśanaṃ pravartate etasmin pradeśe kāśyapasya samyaksambuddhasyāvikopito 'sthisaṃghātastiṣṭhatīty ahamanenopakrameṇa vandito bhaveyam evamanena dvābhyāṃ samyaksambuddhābhyāṃ vandanā kṛtā bhavet

6.46

तत्कस्य हेतोः अस्मिन्नानन्द प्रदेशे काश्यपस्य सम्यक्सम्बुद्धस्याविकोपितो ऽस्थिसंघातस्तिष्ठति

tatkasya hetoḥ asminnānanda pradeśe kāśyapasya samyaksambuddhasyāvikopito 'sthisaṃghātastiṣṭhati

6.47

अथायुष्मानानन्दो लघुलघ्वेव चतुर्गुणमुत्तरासङ्गं प्रज्ञप्य भगवन्तमिदमवोचत् निषीदतु भगवान् प्रज्ञप्त एवासने

athāyuṣmānānando laghulaghveva caturguṇamuttarāsaṅgaṃ prajñapya bhagavantamidamavocat niṣīdatu bhagavān prajñapta evāsane

6.48

एवमयं पृथिवीप्रदेशो द्वाभ्यां सम्यक्सम्बुद्धाभ्यां परिभुक्तो भविष्यति यच्च काश्यपेन सम्यक्सम्बुद्धेन यच्चैतर्हि भगवता इति

evamayaṃ pṛthivīpradeśo dvābhyāṃ samyaksambuddhābhyāṃ paribhukto bhaviṣyati yacca kāśyapena samyaksambuddhena yaccaitarhi bhagavatā iti

6.49

निषण्णो भगवान् प्रज्ञप्त एवासने

niṣaṇṇo bhagavān prajñapta evāsane

6.50

निषद्य भिक्षूनामन्त्रयते स्म इच्छथ यूयं भिक्षवः काश्यपस्य सम्यक्सम्बुद्धस्य शरीरसंघातम् अविकोपितं द्रष्टुम् एतस्य भगवन् कालः एतस्य सुगत समयः यं भगवान् भिक्षूणां काश्यपस्य सम्यक्सम्बुद्धस्याविकोपितं शरीरसंघातमुपदर्शयेत्

niṣadya bhikṣūnāmantrayate sma icchatha yūyaṃ bhikṣavaḥ kāśyapasya samyaksambuddhasya śarīrasaṃghātam avikopitaṃ draṣṭum etasya bhagavan kālaḥ etasya sugata samayaḥ yaṃ bhagavān bhikṣūṇāṃ kāśyapasya samyaksambuddhasyāvikopitaṃ śarīrasaṃghātamupadarśayet

6.51

दृष्ट्वा भिक्षवश्चित्तमभिप्रसादयिष्यन्ति

dṛṣṭvā bhikṣavaścittamabhiprasādayiṣyanti

6.52

ततो भगवता लौकिकं चित्तमुत्पादितम्

tato bhagavatā laukikaṃ cittamutpāditam

6.53

धर्मता खलु यस्मिन् समये बुद्धा भगवन्तो लौकिकं चित्तमुत्पादयन्ति तस्मिन् समये कुन्तपिपीलिका अपि प्राणिनो भगवतश्चेतसा चित्तमाजानन्ति

dharmatā khalu yasmin samaye buddhā bhagavanto laukikaṃ cittamutpādayanti tasmin samaye kuntapipīlikā api prāṇino bhagavataścetasā cittamājānanti

6.54

नागाः संलक्षयन्ति किं कारणं भगवता लौकिकचित्तमुत्पादितमिति पश्यन्ति काश्यपस्य सम्यक्सम्बुद्धस्य शरीरसंघातमविकोपितं द्रष्टुकाम इति

nāgāḥ saṃlakṣayanti kiṃ kāraṇaṃ bhagavatā laukikacittamutpāditamiti paśyanti kāśyapasya samyaksambuddhasya śarīrasaṃghātamavikopitaṃ draṣṭukāma iti

6.55

ततस्तैः काश्यपस्य सम्यक्सम्बुद्धस्याविकोपितशरीरसंघात उच्छ्रापितः

tatastaiḥ kāśyapasya samyaksambuddhasyāvikopitaśarīrasaṃghāta ucchrāpitaḥ

6.56

तत्र भगवान् भिक्षूनामन्त्रयते स्म उद्गृह्णीत भिक्षवो निमित्तम्

tatra bhagavān bhikṣūnāmantrayate sma udgṛhṇīta bhikṣavo nimittam

6.57

अन्तर्धास्यति

antardhāsyati

6.58

अन्तर्हितः

antarhitaḥ

6.59

राज्ञा प्रसेनजिता श्रुतं भगवता श्रावकाणां दर्शनायाविकोपितं काश्यपस्य सम्यक्सम्बुद्धस्य शरीरसंघातं समुच्छ्रितमिति

rājñā prasenajitā śrutaṃ bhagavatā śrāvakāṇāṃ darśanāyāvikopitaṃ kāśyapasya samyaksambuddhasya śarīrasaṃghātaṃ samucchritamiti

6.60

श्रुत्वा च पुनः कुतूहलजातः सहान्तःपुरेण कुमारैरमात्यैर्भटबलाग्रैर् नैगमजानपदैश्च द्रष्टुं सम्प्रस्थितः

śrutvā ca punaḥ kutūhalajātaḥ sahāntaḥpureṇa kumārairamātyairbhaṭabalāgrair naigamajānapadaiśca draṣṭuṃ samprasthitaḥ

6.61

एवं विरूढकः अनाथपिण्डदो गृहपतिः ऋषिदत्तः पुराणः स्थपतिः विशाखा मृगारमाता अनेकानि च प्राणिशतसहस्राणि कुतूहलजातानि द्रष्टुं सम्प्रस्थितानि पूर्वकैश्च कुशलमूलैः संचोद्यमानानि

evaṃ virūḍhakaḥ anāthapiṇḍado gṛhapatiḥ ṛṣidattaḥ purāṇaḥ sthapatiḥ viśākhā mṛgāramātā anekāni ca prāṇiśatasahasrāṇi kutūhalajātāni draṣṭuṃ samprasthitāni pūrvakaiśca kuśalamūlaiḥ saṃcodyamānāni

6.62

यावदसौ अन्तर्हितः

yāvadasau antarhitaḥ

Divyāvadāna