4.38

विगतोद्भवा दैन्यमदप्रहीणा बुद्धा जगत्युत्तमहेतुभूताः

vigatodbhavā dainyamadaprahīṇā buddhā jagatyuttamahetubhūtāḥ

4.38.2

नाकारणं शङ्खमृणालगौरं स्मितमुपदर्शयन्ति जिना जितारयः

nākāraṇaṃ śaṅkhamṛṇālagauraṃ smitamupadarśayanti jinā jitārayaḥ

4.39

तत्कालं स्वयमधिगम्य धीरबुद्ध्या श्रोतॄणां श्रमण जिनेन्द्र काङ्क्षितानाम्

tatkālaṃ svayamadhigamya dhīrabuddhyā śrotṝṇāṃ śramaṇa jinendra kāṅkṣitānām

4.39.2

धीराभिर्मुनिवृष वाग्भिरुत्तमाभिरुत्पन्नं व्यपनय संशयं शुभाभिः

dhīrābhirmunivṛṣa vāgbhiruttamābhirutpannaṃ vyapanaya saṃśayaṃ śubhābhiḥ

4.40

नाकस्माल्लवणजलाद्रिराजधैर्याः संबुद्धाः स्मितमुपदर्शयन्ति नाथाः

nākasmāllavaṇajalādrirājadhairyāḥ saṃbuddhāḥ smitamupadarśayanti nāthāḥ

4.40.2

यस्यार्थे स्मितमुपदर्शयन्ति धीरास्तं श्रोतुं समभिलषन्ति ते जनौघाः

yasyārthe smitamupadarśayanti dhīrāstaṃ śrotuṃ samabhilaṣanti te janaughāḥ

4.41

इति

iti

4.42

भगवानाह एवमेतदानन्द एवमेतत्

bhagavānāha evametadānanda evametat

4.43

नाहेतुप्रत्ययम् आनन्द तथागता अर्हन्तः सम्यक्सम्बुद्धाः स्मितं प्राविष्कुर्वन्ति

nāhetupratyayam ānanda tathāgatā arhantaḥ samyaksambuddhāḥ smitaṃ prāviṣkurvanti

4.44

दृष्टा तवैषा सा आनन्द ब्राह्मणदारिका यया प्रसादजातया मह्यं सक्तुभिक्षानुप्रदत्ता दृष्टा भदन्त

dṛṣṭā tavaiṣā sā ānanda brāhmaṇadārikā yayā prasādajātayā mahyaṃ saktubhikṣānupradattā dṛṣṭā bhadanta

4.45

असावानन्द ब्राह्मणदारिका अनेन कुशलमूलेन त्रयोदश कल्पान् विनिपातं न गमिष्यति

asāvānanda brāhmaṇadārikā anena kuśalamūlena trayodaśa kalpān vinipātaṃ na gamiṣyati

4.46

किं तर्हि देवांश्च मनुष्यांश्च संवाच्य संसृत्य पश्चिमे भवे पश्चिमे निकेते पश्चिमे समुच्छ्रये पश्चिम आत्मभावप्रतिलम्भे सुप्रणिहितो नाम प्रत्येकबुद्धो भविष्यति

kiṃ tarhi devāṃśca manuṣyāṃśca saṃvācya saṃsṛtya paścime bhave paścime nikete paścime samucchraye paścima ātmabhāvapratilambhe supraṇihito nāma pratyekabuddho bhaviṣyati

4.47

सामन्तकेन शब्दो विसृतः अमुकया ब्राह्मणदारिकया प्रसादजातया भगवते सक्तुभिक्षा प्रतिपादिता सा भगवता प्रत्येकायां बोधौ व्याकृतेति

sāmantakena śabdo visṛtaḥ amukayā brāhmaṇadārikayā prasādajātayā bhagavate saktubhikṣā pratipāditā sā bhagavatā pratyekāyāṃ bodhau vyākṛteti

4.48

तस्याश्च स्वामी पुष्पसमिधामर्थायारण्यं गतः

tasyāśca svāmī puṣpasamidhāmarthāyāraṇyaṃ gataḥ

4.49

तेन श्रुतं मम पत्न्या श्रमणाय गौतमाय सक्तुभिक्षा प्रतिपादिता सा च श्रमणेन गौतमेन प्रत्येकायां बोधौ व्याकृता इति

tena śrutaṃ mama patnyā śramaṇāya gautamāya saktubhikṣā pratipāditā sā ca śramaṇena gautamena pratyekāyāṃ bodhau vyākṛtā iti

4.50

श्रुत्वा पुनः संजातामर्षो येन भगवांस्तेनोपसंक्रान्तः

śrutvā punaḥ saṃjātāmarṣo yena bhagavāṃstenopasaṃkrāntaḥ

4.51

भगवता सार्धं संमुखं संमोदनीं संरञ्जनीं विविधां कथां व्यतिसार्य भगवन्तमिदमवोचत् अगमद्भवान् गौतमो ऽस्माकं निवेशनम् अगमं ब्राह्मण सत्यं भवते तया मम पत्न्या सक्तुभिक्षा प्रतिपादिता सा च त्वया प्रत्येकायां बोधौ व्याकृता इति सत्यं ब्राह्मण

bhagavatā sārdhaṃ saṃmukhaṃ saṃmodanīṃ saṃrañjanīṃ vividhāṃ kathāṃ vyatisārya bhagavantamidamavocat agamadbhavān gautamo 'smākaṃ niveśanam agamaṃ brāhmaṇa satyaṃ bhavate tayā mama patnyā saktubhikṣā pratipāditā sā ca tvayā pratyekāyāṃ bodhau vyākṛtā iti satyaṃ brāhmaṇa

4.52

त्वं गौतम चक्रवर्तिराज्यमपहाय प्रव्रजितः

tvaṃ gautama cakravartirājyamapahāya pravrajitaḥ

4.53

कथं नाम त्वमेतर्हि सक्तुभिक्षाहेतोः सम्प्रजानन् मृषावादं सम्भाषसे कस्ते श्रद्धास्यति इयत्प्रमाणस्य बीजस्येयत् फलमिति तेन हि ब्राह्मण त्वामेव प्रक्ष्यामि यथा ते क्षमते तथैवं व्याकुरु

kathaṃ nāma tvametarhi saktubhikṣāhetoḥ samprajānan mṛṣāvādaṃ sambhāṣase kaste śraddhāsyati iyatpramāṇasya bījasyeyat phalamiti tena hi brāhmaṇa tvāmeva prakṣyāmi yathā te kṣamate tathaivaṃ vyākuru

4.54

किं मन्यसे ब्राह्मण अस्ति कश्चित्त्वया आश्चर्याद्भुतो धर्मो दृष्टस् तिष्ठन्तु तावत् भो गौतम अन्ये आश्चर्याद्भुता धर्माः

kiṃ manyase brāhmaṇa asti kaścittvayā āścaryādbhuto dharmo dṛṣṭas tiṣṭhantu tāvat bho gautama anye āścaryādbhutā dharmāḥ

Divyāvadāna