2.705

आत्तमनसस्ते भिक्षवो भगवतो भाषितमभ्यनन्दन्निति

āttamanasaste bhikṣavo bhagavato bhāṣitamabhyanandanniti

3.1

यदा राज्ञा मागधेन अजातशत्रुणा वैदेहीपुत्रेण नौक्रमो मातापित्रोर्मापितस्तदा वैशालकैर्लिच्छविभिर्भगवतो ऽर्थे नौक्रमो मापितः

yadā rājñā māgadhena ajātaśatruṇā vaidehīputreṇa naukramo mātāpitrormāpitastadā vaiśālakairlicchavibhirbhagavato 'rthe naukramo māpitaḥ

3.2

नागाः संलक्षयन्ति वयं विनिपतितशरीरा यन्नु वयं फणसंक्रमेण भगवन्तं नदीम् गङ्गामुत्तारयेम इति

nāgāḥ saṃlakṣayanti vayaṃ vinipatitaśarīrā yannu vayaṃ phaṇasaṃkrameṇa bhagavantaṃ nadīm gaṅgāmuttārayema iti

3.3

तैः फणसंक्रमो मापितः

taiḥ phaṇasaṃkramo māpitaḥ

3.4

तत्र भगवान् भिक्षूनामन्त्रयते स्म राजगृहात् श्रावस्तीं गन्तुम् यो युष्माकं भिक्षव उत्सहते राज्ञो मागधस्याजातशत्रोर्वैदेहीपुत्रस्य नौसंक्रमेण नदीगङ्गामुत्तर्तुम् स तेन तरतु यो वा भिक्षवो वैशालकानां लिच्छवीनां नौसंक्रमेण सो ऽपि तेनोत्तरतु

tatra bhagavān bhikṣūnāmantrayate sma rājagṛhāt śrāvastīṃ gantum yo yuṣmākaṃ bhikṣava utsahate rājño māgadhasyājātaśatrorvaidehīputrasya nausaṃkrameṇa nadīgaṅgāmuttartum sa tena taratu yo vā bhikṣavo vaiśālakānāṃ licchavīnāṃ nausaṃkrameṇa so 'pi tenottaratu

3.5

अहमपि आयुष्मता आनन्देन भिक्षुणा सार्धं नागानां फणसंक्रमेण नदीं गङ्गामुत्तरिष्यामि

ahamapi āyuṣmatā ānandena bhikṣuṇā sārdhaṃ nāgānāṃ phaṇasaṃkrameṇa nadīṃ gaṅgāmuttariṣyāmi

3.6

तत्र केचित् राज्ञो मागधस्याजातशत्रोर्वैदेहीपुत्रस्य नौसंक्रमेणोत्तीर्णाः केचित् वैशालिकानां लिच्छवीनां नौसंक्रमेण

tatra kecit rājño māgadhasyājātaśatrorvaidehīputrasya nausaṃkrameṇottīrṇāḥ kecit vaiśālikānāṃ licchavīnāṃ nausaṃkrameṇa

3.7

भगवानपि आयुष्मता आनन्देन सार्धं नागानां फणसंक्रमेणोत्तीर्णः

bhagavānapi āyuṣmatā ānandena sārdhaṃ nāgānāṃ phaṇasaṃkrameṇottīrṇaḥ

3.8

अथान्यतमोपासकस्तस्यां वेलायां गाथां भाषते

athānyatamopāsakastasyāṃ velāyāṃ gāthāṃ bhāṣate

3.9

ये तरन्त्यर्णवं सरः सेतुं कृत्वा विसृज्य पल्वलानि

ye tarantyarṇavaṃ saraḥ setuṃ kṛtvā visṛjya palvalāni

3.9.2

कोलं हि जनाः प्रबन्धिता उत्तीर्णा मेधाविनो जनाः

kolaṃ hi janāḥ prabandhitā uttīrṇā medhāvino janāḥ

3.10

उत्तीर्णो भगवान् बुद्धो ब्राह्मणस्तिष्ठति स्थले

uttīrṇo bhagavān buddho brāhmaṇastiṣṭhati sthale

3.10.2

भिक्षवो ऽत्र परिस्नान्ति कोलं बध्नन्ति श्रावकाः

bhikṣavo 'tra parisnānti kolaṃ badhnanti śrāvakāḥ

3.11

किं कुर्यादुदपानेन आपश्चेत् सर्वतो यदि

kiṃ kuryādudapānena āpaścet sarvato yadi

3.11.2

छित्त्वेह मूलं तृष्णायाः कस्य पर्येषणां चरेत्

chittveha mūlaṃ tṛṣṇāyāḥ kasya paryeṣaṇāṃ caret

3.12

इति

iti

3.13

अद्राक्षीद्भगवानन्यतमस्मिन् भूभागे उन्नतोन्नतं पृथिवीप्रदेशम्

adrākṣīdbhagavānanyatamasmin bhūbhāge unnatonnataṃ pṛthivīpradeśam

3.14

दृष्ट्वा च पुनरायुष्मन्तमामन्त्रयते इच्छसि त्वमानन्द यो ऽसौ यूप ऊर्ध्वं व्यामसहस्रं तिर्यक् षोडशप्रवेधो नानारत्नविचित्रो दिव्यः सर्वसौवर्णो राज्ञा महाप्रणादेन दानानि दत्त्वा पुण्यानि कृत्वा नद्यां गङ्गायां आप्लावितः तं द्रष्टुम् एतस्य भगवन् कालः एतस्य सुगत समयः यो ऽयं भगवान् यूपमुच्छ्रापयेत् भिक्षवः पश्येयुः

dṛṣṭvā ca punarāyuṣmantamāmantrayate icchasi tvamānanda yo 'sau yūpa ūrdhvaṃ vyāmasahasraṃ tiryak ṣoḍaśapravedho nānāratnavicitro divyaḥ sarvasauvarṇo rājñā mahāpraṇādena dānāni dattvā puṇyāni kṛtvā nadyāṃ gaṅgāyāṃ āplāvitaḥ taṃ draṣṭum etasya bhagavan kālaḥ etasya sugata samayaḥ yo 'yaṃ bhagavān yūpamucchrāpayet bhikṣavaḥ paśyeyuḥ

3.15

ततो भगवता चक्रस्वस्तिकनन्द्यावर्तेन जालावनद्धेनानेकपुण्यशतनिर्जातेन भीतानामाश्वासनकरेण पृथिवी परामृष्टा

tato bhagavatā cakrasvastikanandyāvartena jālāvanaddhenānekapuṇyaśatanirjātena bhītānāmāśvāsanakareṇa pṛthivī parāmṛṣṭā

3.16

नागाः संलक्षयन्ति किमर्थं भगवता पृथिवी परामृष्टेति यावत् पश्यन्ति यूपं द्रष्टुकामाः

nāgāḥ saṃlakṣayanti kimarthaṃ bhagavatā pṛthivī parāmṛṣṭeti yāvat paśyanti yūpaṃ draṣṭukāmāḥ

Divyāvadāna