2.627

भगवता गृहीत्वा परिभुक्तम्

bhagavatā gṛhītvā paribhuktam

2.628

आयुष्मान् महामौद्गल्यायनः संलक्षयति पूर्वमुक्तं भगवता दुष्करकारकौ हि भिक्षवः पुत्रस्य मातापितरौ आप्यायकौ पोषकौ संवर्धकौ स्तन्यस्य दातारौ चित्रस्य जम्बुद्वीपस्य दर्शयितारौ

āyuṣmān mahāmaudgalyāyanaḥ saṃlakṣayati pūrvamuktaṃ bhagavatā duṣkarakārakau hi bhikṣavaḥ putrasya mātāpitarau āpyāyakau poṣakau saṃvardhakau stanyasya dātārau citrasya jambudvīpasya darśayitārau

2.629

एकेनांशेन पुत्रो मातरं द्वितीयेन पितरं पूर्णवर्षशतं परिचरेत् यद्वा अस्यां महापृथिव्यां मणयो मुक्ता वैदूर्यशङ्खशिलाप्रवालं रजतं जातरूपमश्मगर्भो मुसारगल्वो लोहितिका दक्षिणावर्त इति एवंरूपे वा विविधैश्वर्याधिपत्ये प्रतिष्ठापयेन् नेयता पुत्रेण मातापित्रोः कृतं वा स्यादुपकृतं वा

ekenāṃśena putro mātaraṃ dvitīyena pitaraṃ pūrṇavarṣaśataṃ paricaret yadvā asyāṃ mahāpṛthivyāṃ maṇayo muktā vaidūryaśaṅkhaśilāpravālaṃ rajataṃ jātarūpamaśmagarbho musāragalvo lohitikā dakṣiṇāvarta iti evaṃrūpe vā vividhaiśvaryādhipatye pratiṣṭhāpayen neyatā putreṇa mātāpitroḥ kṛtaṃ vā syādupakṛtaṃ vā

2.630

यस्तु असावश्राद्धं मातापितरं श्रद्धासम्पदि समादापयति विनयति निवेशयति प्रतिष्ठापयति दुःशीलं शीलसम्पदि मत्सरिणं त्यागसम्पदि दुष्प्रज्ञं प्रज्ञासम्पदि समादापयति विनयति निवेशयति प्रतिष्ठापयति इयता पुत्रेण मातापित्रोः कृतं वा स्यादुपकृतं वेति

yastu asāvaśrāddhaṃ mātāpitaraṃ śraddhāsampadi samādāpayati vinayati niveśayati pratiṣṭhāpayati duḥśīlaṃ śīlasampadi matsariṇaṃ tyāgasampadi duṣprajñaṃ prajñāsampadi samādāpayati vinayati niveśayati pratiṣṭhāpayati iyatā putreṇa mātāpitroḥ kṛtaṃ vā syādupakṛtaṃ veti

2.631

मया च मातुर् न कश्चिदुपकारः कृतः

mayā ca mātur na kaścidupakāraḥ kṛtaḥ

2.632

यदहं समन्वाहरेयं कुत्र मे माता उपपन्नेति

yadahaṃ samanvāhareyaṃ kutra me mātā upapanneti

2.633

समन्वाहर्तुं संवृत्तः पश्यति मरीचिके लोकधातौ उपपन्ना

samanvāhartuṃ saṃvṛttaḥ paśyati marīcike lokadhātau upapannā

2.634

स संलक्षयति कस्य विनेया पश्यति भगवतः

sa saṃlakṣayati kasya vineyā paśyati bhagavataḥ

2.635

तस्यैतदभवत् दूरं वयमिहागताः

tasyaitadabhavat dūraṃ vayamihāgatāḥ

2.636

यन्न्वहमेतमर्थं भगवतो निवेदयेयमिति भगवन्तमिदमवोचत् उक्तं भदन्त भगवता पूर्वम् दुष्करकारकौ हि भिक्षवः पुत्रस्य मातापितरौ इति

yannvahametamarthaṃ bhagavato nivedayeyamiti bhagavantamidamavocat uktaṃ bhadanta bhagavatā pūrvam duṣkarakārakau hi bhikṣavaḥ putrasya mātāpitarau iti

2.637

तन्मम माता मरीचिके लोकधातौ उपपन्ना सा च भगवतो विनेया

tanmama mātā marīcike lokadhātau upapannā sā ca bhagavato vineyā

2.638

तदर्हति भगवांस् तां विनेतुमनुकम्पामुपादायेति

tadarhati bhagavāṃs tāṃ vinetumanukampāmupādāyeti

2.639

भगवान् कथयति मौद्गल्यायन कस्य ऋद्ध्या गच्छामः भगवन् मदीयया

bhagavān kathayati maudgalyāyana kasya ṛddhyā gacchāmaḥ bhagavan madīyayā

2.640

ततो भगवानायुष्मांश्च महामौद्गल्यायनः सुमेरुमूर्ध्नि पादान् स्थापयन्तौ सम्प्रस्थितौ

tato bhagavānāyuṣmāṃśca mahāmaudgalyāyanaḥ sumerumūrdhni pādān sthāpayantau samprasthitau

2.641

सप्तमे दिवसे मरीचिकं लोकधातुमनुप्राप्तः

saptame divase marīcikaṃ lokadhātumanuprāptaḥ

2.642

अद्राक्षीत् सा भद्रकन्या आयुष्मन्तं महामौद्गल्यायनं दूरादेव

adrākṣīt sā bhadrakanyā āyuṣmantaṃ mahāmaudgalyāyanaṃ dūrādeva

2.643

दृष्ट्वा च पुनः ससम्भ्रमात् तत्सकाशमुपसंक्रम्य कथयति चिराद्बत पुत्रकं पश्यामीति

dṛṣṭvā ca punaḥ sasambhramāt tatsakāśamupasaṃkramya kathayati cirādbata putrakaṃ paśyāmīti

2.644

ततो जनकायः कथयति भदन्तो ऽयं प्रव्रजितो वृद्धः

tato janakāyaḥ kathayati bhadanto 'yaṃ pravrajito vṛddhaḥ

2.645

इयं च कन्या

iyaṃ ca kanyā

2.646

कथमस्य माता भवतीति आयुष्मान् मौद्गल्यायनः कथयति भवन्तः मम इमे स्कन्धा अनया संवृद्धाः

kathamasya mātā bhavatīti āyuṣmān maudgalyāyanaḥ kathayati bhavantaḥ mama ime skandhā anayā saṃvṛddhāḥ

Divyāvadāna