2.587

भगवता ऋद्ध्या प्रतीष्टः

bhagavatā ṛddhyā pratīṣṭaḥ

2.588

ततो ऽस्य भगवता आशयानुशयं धातुं प्रकृतिं च ज्ञात्वा तादृशी धर्मदेशना कृता यां श्रुत्वा वक्कलिना अनागामिफलं साक्षात्कृतम् ऋद्धिश्चाभिनिर्हृता

tato 'sya bhagavatā āśayānuśayaṃ dhātuṃ prakṛtiṃ ca jñātvā tādṛśī dharmadeśanā kṛtā yāṃ śrutvā vakkalinā anāgāmiphalaṃ sākṣātkṛtam ṛddhiścābhinirhṛtā

2.589

ततो भगवन्तमिदमवोचत् लभेयाहं भदन्त स्वाख्याते धर्मविनये प्रव्रज्यामुपसम्पदं भिक्षुभावं पूर्ववत् यावत् भगवता एहिभिक्षुकया प्रव्राजितो यावदेवं स्थितो बुद्धमनोरथेन

tato bhagavantamidamavocat labheyāhaṃ bhadanta svākhyāte dharmavinaye pravrajyāmupasampadaṃ bhikṣubhāvaṃ pūrvavat yāvat bhagavatā ehibhikṣukayā pravrājito yāvadevaṃ sthito buddhamanorathena

2.590

तत्र भगवान् भिक्षूनामन्त्रयते स्म एषो ऽग्रो मे भिक्षवो भिक्षूणां मम श्रद्धाधिमुक्तानाम् यदुत वक्कली भिक्षुरिति

tatra bhagavān bhikṣūnāmantrayate sma eṣo 'gro me bhikṣavo bhikṣūṇāṃ mama śraddhādhimuktānām yaduta vakkalī bhikṣuriti

2.591

ततो भगवान् भिक्षुसहस्रपरिवृतो विचित्राणि प्रातिहार्याणि कुर्वन् सूर्पारकं नगरमनुप्राप्तः

tato bhagavān bhikṣusahasraparivṛto vicitrāṇi prātihāryāṇi kurvan sūrpārakaṃ nagaramanuprāptaḥ

2.592

भगवान् संलक्षयति यदि एकेन द्वारेण प्रविशामि अपरेषां भविष्यति अन्यथात्वम्

bhagavān saṃlakṣayati yadi ekena dvāreṇa praviśāmi apareṣāṃ bhaviṣyati anyathātvam

2.593

यन्न्वहम् ऋद्ध्यैव प्रविशेयमिति

yannvaham ṛddhyaiva praviśeyamiti

2.594

तत ऋद्ध्या उपरि विहायसा मध्ये सूर्पारकस्य नगरस्यावतीर्णः

tata ṛddhyā upari vihāyasā madhye sūrpārakasya nagarasyāvatīrṇaḥ

2.595

ततः सूर्पारकाधिपती राजा आयुष्मान् पूर्णो दारुकर्णी स्तवकर्णी त्रपुकर्णी ते च सप्तदश पुत्राः स्वकस्वकेन परिवारेण येन भगवांस्तेनोपसंक्रान्ताः अनेकानि च प्राणिशतसहस्राणि

tataḥ sūrpārakādhipatī rājā āyuṣmān pūrṇo dārukarṇī stavakarṇī trapukarṇī te ca saptadaśa putrāḥ svakasvakena parivāreṇa yena bhagavāṃstenopasaṃkrāntāḥ anekāni ca prāṇiśatasahasrāṇi

2.596

ततो भगवाननेकैः प्राणिशतसहस्रैरनुगम्यमानो येन चन्दनमालः प्रासादस् तेनोपसंक्रान्तः

tato bhagavānanekaiḥ prāṇiśatasahasrairanugamyamāno yena candanamālaḥ prāsādas tenopasaṃkrāntaḥ

2.597

उपसंक्रम्य पुरस्ताद्भिक्षुसंघस्य प्रज्ञप्त एवासने निषण्णः

upasaṃkramya purastādbhikṣusaṃghasya prajñapta evāsane niṣaṇṇaḥ

2.598

स जनकायो भगवन्तमपश्यंश्चन्दनमालं प्रासादं भेत्तुमारब्धः

sa janakāyo bhagavantamapaśyaṃścandanamālaṃ prāsādaṃ bhettumārabdhaḥ

2.599

भगवान् संलक्षयति यदि चन्दनमालः प्रासादो भेत्स्यते दातॄणां पुण्यान्तरायो भविष्यति

bhagavān saṃlakṣayati yadi candanamālaḥ prāsādo bhetsyate dātṝṇāṃ puṇyāntarāyo bhaviṣyati

2.600

यन्न्वहमेनं स्फटिकमयं निर्मिनुयामिति

yannvahamenaṃ sphaṭikamayaṃ nirminuyāmiti

2.601

स भगवता स्फटिकमयो निर्मितः

sa bhagavatā sphaṭikamayo nirmitaḥ

2.602

ततो भगवता तस्याः परिषद आशयानुशयं धातुं प्रकृतिं च ज्ञात्वा तादृशी धर्मदेशना कृता यां श्रुत्वा अनेकैः प्राणिशतसहस्रैर्महान् विशेषो ऽधिगतः

tato bhagavatā tasyāḥ pariṣada āśayānuśayaṃ dhātuṃ prakṛtiṃ ca jñātvā tādṛśī dharmadeśanā kṛtā yāṃ śrutvā anekaiḥ prāṇiśatasahasrairmahān viśeṣo 'dhigataḥ

2.603

कैश्चिन्मोक्षभागीयानि कुशलमूलानि उत्पादितानि कैश्चिन्निर्वेधभागीयानि कैश्चित् स्रोतापत्तिफलं साक्षात्कृतम् कैश्चित् सकृदागामिफलम् कैश्चिदनागामिफलम् कैश्चित् सर्वक्लेशप्रहाणादर्हत्त्वं साक्षात्कृतम् कैश्चित् श्रावकबोधौ चित्तान्युत्पादितानि कैश्चित् प्रत्येकबोधौ कैश्चिदनुत्तरायां सम्यक्सम्बोधौ चित्तान्युत्पादितानि

kaiścinmokṣabhāgīyāni kuśalamūlāni utpāditāni kaiścinnirvedhabhāgīyāni kaiścit srotāpattiphalaṃ sākṣātkṛtam kaiścit sakṛdāgāmiphalam kaiścidanāgāmiphalam kaiścit sarvakleśaprahāṇādarhattvaṃ sākṣātkṛtam kaiścit śrāvakabodhau cittānyutpāditāni kaiścit pratyekabodhau kaiścidanuttarāyāṃ samyaksambodhau cittānyutpāditāni

2.604

यद्भूयसा सा पर्षद् बुद्धनिम्ना धर्मप्रवणा संघप्राग्भारा व्यवस्थापिता

yadbhūyasā sā parṣad buddhanimnā dharmapravaṇā saṃghaprāgbhārā vyavasthāpitā

2.605

अथ दारुकर्णी स्तवकर्णी त्रपुकर्णी च प्रणीतं खादनीयं भोजनीयं समुदानीय आसनानि प्रज्ञाप्य भगवतो दूतेन कालमारोचयन्ति समयो भदन्त सज्जं भक्तम् यस्येदानीं भगवान् कालम् मन्यत इति

atha dārukarṇī stavakarṇī trapukarṇī ca praṇītaṃ khādanīyaṃ bhojanīyaṃ samudānīya āsanāni prajñāpya bhagavato dūtena kālamārocayanti samayo bhadanta sajjaṃ bhaktam yasyedānīṃ bhagavān kālam manyata iti

2.606

तेन खलु समयेन कृष्णगौतमकौ नागराजौ महासमुद्रे प्रतिवसतः

tena khalu samayena kṛṣṇagautamakau nāgarājau mahāsamudre prativasataḥ

Divyāvadāna