20.20

अष्टादश कुलकोटी ऋद्धानि स्फीतानि क्षेमाणि सुभिक्षाण्याकीर्णबहुजनमनुष्याणि

aṣṭādaśa kulakoṭī ṛddhāni sphītāni kṣemāṇi subhikṣāṇyākīrṇabahujanamanuṣyāṇi

20.21

सप्तपञ्चाशद्ग्रामकोट्य ऋद्धाः स्फीताः क्षेमाः सुभिक्षा रमणीया महाजनाकीर्णमनुष्याः

saptapañcāśadgrāmakoṭya ṛddhāḥ sphītāḥ kṣemāḥ subhikṣā ramaṇīyā mahājanākīrṇamanuṣyāḥ

20.22

षष्टिः कर्वटसहस्राण्यभूवन्न् ऋद्धानि स्फीतानि क्षेमाणि सुभिक्षाण्याकीर्णबहुजनमनुष्याणि

ṣaṣṭiḥ karvaṭasahasrāṇyabhūvann ṛddhāni sphītāni kṣemāṇi subhikṣāṇyākīrṇabahujanamanuṣyāṇi

20.23

राज्ञः कनकवर्णस्याष्टादशामात्यसहस्राण्य् अभूवन्

rājñaḥ kanakavarṇasyāṣṭādaśāmātyasahasrāṇy abhūvan

20.24

विंशतिस्त्रीसहस्राण्यन्तःपुरमभूत्

viṃśatistrīsahasrāṇyantaḥpuramabhūt

20.25

राजा भिक्षवः कनकवर्णो धार्मिको बभूव

rājā bhikṣavaḥ kanakavarṇo dhārmiko babhūva

20.26

धर्मेण राज्यं कारयति

dharmeṇa rājyaṃ kārayati

20.27

अथापरेण समयेन राज्ञः कनकवर्णस्य एकाकिनो रहोगतस्य प्रतिसंलीनस्य एवं चेतसि चेतःपरिवितर्कमुदपादि यन्न्वहं सर्ववणिजो ऽशुल्कानगुल्मान् मुञ्चेयम्

athāpareṇa samayena rājñaḥ kanakavarṇasya ekākino rahogatasya pratisaṃlīnasya evaṃ cetasi cetaḥparivitarkamudapādi yannvahaṃ sarvavaṇijo 'śulkānagulmān muñceyam

20.28

सर्वजाम्बुद्वीपकान् मनुष्यान् अकारानगुल्मान् मुञ्चेयमिति

sarvajāmbudvīpakān manuṣyān akārānagulmān muñceyamiti

20.29

अथ राजा कनकवर्णो गणकमहामात्रामात्यदौवारिकपारिषद्यान् आमन्त्रयते अद्याग्रेण वो ग्रामण्यः सर्ववणिजो ऽशुल्कान् मुञ्चामि सर्वजाम्बुद्वीपकान् मनुष्यान् अकारानशुल्कान् मुञ्चामि

atha rājā kanakavarṇo gaṇakamahāmātrāmātyadauvārikapāriṣadyān āmantrayate adyāgreṇa vo grāmaṇyaḥ sarvavaṇijo 'śulkān muñcāmi sarvajāmbudvīpakān manuṣyān akārānaśulkān muñcāmi

20.30

तस्यानेनोपायेन बहूनि वर्षाणि राज्यं कारयतो ऽपरेण समयेन नक्षत्रं विषमीभूतं द्वादश वर्षाणि देवो न वर्षति

tasyānenopāyena bahūni varṣāṇi rājyaṃ kārayato 'pareṇa samayena nakṣatraṃ viṣamībhūtaṃ dvādaśa varṣāṇi devo na varṣati

20.31

अथ ब्राह्मणा लक्षणज्ञा नैमित्तिका भूम्यन्तरिक्षमन्त्रकुशला नक्षत्रशुक्रग्रहचरितेषु तत् संलक्षयित्वा येन राजा कनकवर्णः तेनोपसंक्रान्ताः

atha brāhmaṇā lakṣaṇajñā naimittikā bhūmyantarikṣamantrakuśalā nakṣatraśukragrahacariteṣu tat saṃlakṣayitvā yena rājā kanakavarṇaḥ tenopasaṃkrāntāḥ

20.32

उपसंक्रम्य राजानं कनकवर्णमिदमवोचन् यत्खलु देवो जानीयान् नक्षत्रं विषमीभूतम् द्वादश वर्षाणि देवो न वर्षिष्यति

upasaṃkramya rājānaṃ kanakavarṇamidamavocan yatkhalu devo jānīyān nakṣatraṃ viṣamībhūtam dvādaśa varṣāṇi devo na varṣiṣyati

20.33

अथ राजा कनकवर्ण इदमेवंरूपं निर्घोषं श्रुत्वा अश्रूणि प्रवर्तयति अहो बत मे जाम्बुद्वीपका मनुष्याः अहो बत मे जम्बुद्वीप ऋद्धः स्फीतः क्षेमः सुभिक्षो रमणीयो बहुजनाकीर्णमनुष्यो नचिरादेव शून्यो भविष्यति रहितमनुष्यः

atha rājā kanakavarṇa idamevaṃrūpaṃ nirghoṣaṃ śrutvā aśrūṇi pravartayati aho bata me jāmbudvīpakā manuṣyāḥ aho bata me jambudvīpa ṛddhaḥ sphītaḥ kṣemaḥ subhikṣo ramaṇīyo bahujanākīrṇamanuṣyo nacirādeva śūnyo bhaviṣyati rahitamanuṣyaḥ

20.34

अथ राज्ञः कनकवर्णस्य मुहूर्तं शोचित्वा एतदभवत् य इमे आढ्या महाधना महाभोगास् ते शक्ष्यन्ति यापयितुम्

atha rājñaḥ kanakavarṇasya muhūrtaṃ śocitvā etadabhavat ya ime āḍhyā mahādhanā mahābhogās te śakṣyanti yāpayitum

20.35

य इमे दरिद्रा अल्पधना अल्पान्नपानभोगाः ते कथम् यापयिष्यन्ति तस्यैतदभवद् यन्न्वहं जम्बुद्वीपादन्नाद्यं संहरेयं सर्वजाम्बुद्वीपान् सत्त्वान् गणयेयम्

ya ime daridrā alpadhanā alpānnapānabhogāḥ te katham yāpayiṣyanti tasyaitadabhavad yannvahaṃ jambudvīpādannādyaṃ saṃhareyaṃ sarvajāmbudvīpān sattvān gaṇayeyam

20.36

अथ गणयित्वा मापयेयं मापयित्वा सर्वग्रामनगरनिगमकर्वटराजधानीष्वेकं कोष्ठागारं कारयेयम्

atha gaṇayitvā māpayeyaṃ māpayitvā sarvagrāmanagaranigamakarvaṭarājadhānīṣvekaṃ koṣṭhāgāraṃ kārayeyam

20.37

एकं कोष्ठागारं कारयित्वा सर्वजाम्बुद्वीपकानां मनुष्याणां समं भक्तं प्रत्यर्पयेयमिति

ekaṃ koṣṭhāgāraṃ kārayitvā sarvajāmbudvīpakānāṃ manuṣyāṇāṃ samaṃ bhaktaṃ pratyarpayeyamiti

20.38

अथ कनकवर्णो राजा गणकमहामात्रामात्यदौवारिकपारिषद्यान् आमन्त्रयते गच्छत यूयं ग्रामण्यः सर्वजम्बुद्वीपादन्नाद्यं संहृत्य गणयत गणयित्वा मापयत मापयित्वा सर्वग्रामनगरनिगमकर्वटराजधानीष्वेकं कोष्ठागारं स्थापयत

atha kanakavarṇo rājā gaṇakamahāmātrāmātyadauvārikapāriṣadyān āmantrayate gacchata yūyaṃ grāmaṇyaḥ sarvajambudvīpādannādyaṃ saṃhṛtya gaṇayata gaṇayitvā māpayata māpayitvā sarvagrāmanagaranigamakarvaṭarājadhānīṣvekaṃ koṣṭhāgāraṃ sthāpayata

20.39

परं देवेति गणकमहामात्रामात्यदौवारिकपारिषद्या राज्ञः कनकवर्णस्य प्रतिश्रुत्य सर्वजम्बुद्वीपादन्नाद्यं गणयन्ति गणयित्वा मापयन्ति मापयित्वा सर्वग्रामनगरनिगमकर्वटराजधानीष्वेकस्मिन् कोष्ठागारे स्थापयन्ति

paraṃ deveti gaṇakamahāmātrāmātyadauvārikapāriṣadyā rājñaḥ kanakavarṇasya pratiśrutya sarvajambudvīpādannādyaṃ gaṇayanti gaṇayitvā māpayanti māpayitvā sarvagrāmanagaranigamakarvaṭarājadhānīṣvekasmin koṣṭhāgāre sthāpayanti

Divyāvadāna