18.443

स च राजा दीपः शतशलाकं छत्रं दीपंकरस्य सम्यक्सम्बुद्धस्य धारयति

sa ca rājā dīpaḥ śataśalākaṃ chatraṃ dīpaṃkarasya samyaksambuddhasya dhārayati

18.444

तथैवामात्या वासवो राजा अमात्यसहायः

tathaivāmātyā vāsavo rājā amātyasahāyaḥ

18.445

भगवता ऋद्ध्या तथाधिष्ठितं यथा एकैकः संलक्षयत्य् अहं भगवतश्छत्रं धारयामीति

bhagavatā ṛddhyā tathādhiṣṭhitaṃ yathā ekaikaḥ saṃlakṣayaty ahaṃ bhagavataśchatraṃ dhārayāmīti

18.446

अथ भगवांस्तथाविधया शोभया जनमध्यमनुप्राप्तः

atha bhagavāṃstathāvidhayā śobhayā janamadhyamanuprāptaḥ

18.447

तत्र भगवता साभिसंस्कार इन्द्रकीले पादो व्यवस्थापितः

tatra bhagavatā sābhisaṃskāra indrakīle pādo vyavasthāpitaḥ

18.448

यदैव भगवता इन्द्रकीले पादो व्यवस्थापितस् तदैव समनन्तरकालं पृथिवी षड्विकारं प्रकम्पिता चलिता प्रचलिता संप्रचलिता वेधिता प्रवेधिता संप्रवेधिता

yadaiva bhagavatā indrakīle pādo vyavasthāpitas tadaiva samanantarakālaṃ pṛthivī ṣaḍvikāraṃ prakampitā calitā pracalitā saṃpracalitā vedhitā pravedhitā saṃpravedhitā

18.449

धर्मता च बुद्धानां भगवताम् यदेन्द्रकीले साभिसंस्कारेण पादौ व्यवस्थापयन्ति चित्राण्याश्चर्याण्यद्भुतधर्माः प्रादुर्भवन्त्य् उन्मत्ताः स्वचित्तं प्रतिलभन्ते ऽन्धाश्चक्षूंषि प्रतिलभन्ते बधिराः श्रोत्रश्रवणसमर्था भवन्ति मूकाः प्रव्याहरणसमर्था भवन्ति पङ्गवो गमनसमर्था भवन्ति मूढा गर्भिणीनां स्त्रीणां गर्भा अनुलोमीभवन्ति हडिनिगडबद्धानां च सत्त्वानां बन्धनानि शिथिलीभवन्ति जन्मजन्मवैरानुबद्धास्तदनन्तरं मैत्रचित्ततां प्रतिलभन्ते वत्सा दामानि छित्त्वा मातृभिः संगच्छन्ति हस्तिनः क्रोशन्ति अश्वा ह्रेषन्ते ऋषभा गर्जन्ति शुकसारिकाकोकिलजीवंजीवका मधुरं निकूजन्ति अनेरितानि वादित्रभाण्डानि मधुरशब्दान् निश्चारयन्ति पेडाकृता अलंकारा मधुरशब्दान्निश्चारयन्त्य् उन्नताः पृथिवीप्रदेशा अवनमन्त्य् अवनताश्चोन्नमन्ति अपगतपाषाणशर्करकपालास्तिष्ठन्त्य् अन्तरिक्षाद्देवता दिव्यान्युत्पलानि क्षिपन्ति पद्मानि कुमुदानि पुण्डरीकान्यगुरुचूर्णानि चन्दनचूर्णानि तगरचूर्णानि तमालपत्राणि दिव्यानि मन्दारकाणि पुष्पाणि क्षिपन्ति पूर्वो दिग्भाग उन्नमति पश्चिमो ऽवनमति पश्चिम उन्नमति पूर्वो ऽवनमति दक्षिण उन्नमत्युत्तरो ऽवनमत्य् उत्तर उन्नमति दक्षिणो ऽवनमति मध्य उन्नमत्यन्तो ऽवनमति अन्त उन्नमति मध्यो ऽवनमति

dharmatā ca buddhānāṃ bhagavatām yadendrakīle sābhisaṃskāreṇa pādau vyavasthāpayanti citrāṇyāścaryāṇyadbhutadharmāḥ prādurbhavanty unmattāḥ svacittaṃ pratilabhante 'ndhāścakṣūṃṣi pratilabhante badhirāḥ śrotraśravaṇasamarthā bhavanti mūkāḥ pravyāharaṇasamarthā bhavanti paṅgavo gamanasamarthā bhavanti mūḍhā garbhiṇīnāṃ strīṇāṃ garbhā anulomībhavanti haḍinigaḍabaddhānāṃ ca sattvānāṃ bandhanāni śithilībhavanti janmajanmavairānubaddhāstadanantaraṃ maitracittatāṃ pratilabhante vatsā dāmāni chittvā mātṛbhiḥ saṃgacchanti hastinaḥ krośanti aśvā hreṣante ṛṣabhā garjanti śukasārikākokilajīvaṃjīvakā madhuraṃ nikūjanti aneritāni vāditrabhāṇḍāni madhuraśabdān niścārayanti peḍākṛtā alaṃkārā madhuraśabdānniścārayanty unnatāḥ pṛthivīpradeśā avanamanty avanatāśconnamanti apagatapāṣāṇaśarkarakapālāstiṣṭhanty antarikṣāddevatā divyānyutpalāni kṣipanti padmāni kumudāni puṇḍarīkānyagurucūrṇāni candanacūrṇāni tagaracūrṇāni tamālapatrāṇi divyāni mandārakāṇi puṣpāṇi kṣipanti pūrvo digbhāga unnamati paścimo 'vanamati paścima unnamati pūrvo 'vanamati dakṣiṇa unnamatyuttaro 'vanamaty uttara unnamati dakṣiṇo 'vanamati madhya unnamatyanto 'vanamati anta unnamati madhyo 'vanamati

18.450

तत्र च दीपावत्यां राजधान्यामनेकानि प्राणिशतसहस्राणि पुष्पैर्धूपैर्गन्धैश्च कारां कुर्वन्ति

tatra ca dīpāvatyāṃ rājadhānyāmanekāni prāṇiśatasahasrāṇi puṣpairdhūpairgandhaiśca kārāṃ kurvanti

18.451

ते ऽपि च सुमतिश्च दारिका च येन दीपंकरः सम्यक्सम्बुद्धस्तेनानुगच्छन्ति पद्मानि गृह्य

te 'pi ca sumatiśca dārikā ca yena dīpaṃkaraḥ samyaksambuddhastenānugacchanti padmāni gṛhya

18.452

ते च तत्र महाजनकायेन पूजार्थं संपरिवृतस्य भगवत उपश्लेषं न लभन्ते

te ca tatra mahājanakāyena pūjārthaṃ saṃparivṛtasya bhagavata upaśleṣaṃ na labhante

18.453

भगवान् संलक्षयति बहुतरं सुमतिर्माणवो ऽस्मान्महाजनकायात् पुण्यप्रसवं करिष्यतीति

bhagavān saṃlakṣayati bahutaraṃ sumatirmāṇavo 'smānmahājanakāyāt puṇyaprasavaṃ kariṣyatīti

18.454

मत्वा महतीं तुमुलां वातवृष्टिम् अभिनिर्मिणोति

matvā mahatīṃ tumulāṃ vātavṛṣṭim abhinirmiṇoti

18.455

यतस्तेन जनकायेनावकाशो दत्तः

yatastena janakāyenāvakāśo dattaḥ

18.456

लब्धावकाशश्च सुमतिर्माणवो भगवन्तमसेचनकदर्शनं दृष्ट्वा अतीव प्रसादजातः

labdhāvakāśaśca sumatirmāṇavo bhagavantamasecanakadarśanaṃ dṛṣṭvā atīva prasādajātaḥ

18.457

प्रसादजातेन च तानि पञ्च पद्मानि भगवतः क्षिप्तानि

prasādajātena ca tāni pañca padmāni bhagavataḥ kṣiptāni

18.458

तानि च भगवता दीपंकरेण सम्यक्सम्बुद्धेन तथा अधिष्ठितानि यथा शकटीचक्रमात्राणि वितानं बद्ध्वा व्यवस्थितानि

tāni ca bhagavatā dīpaṃkareṇa samyaksambuddhena tathā adhiṣṭhitāni yathā śakaṭīcakramātrāṇi vitānaṃ baddhvā vyavasthitāni

18.459

गच्छतो ऽनुगच्छन्ति तिष्ठतो ऽनुतिष्ठन्ति

gacchato 'nugacchanti tiṣṭhato 'nutiṣṭhanti

18.460

तथा दृष्ट्वा तया दारिकया प्रसादजातया द्वौ पद्मौ भगवतः क्षिप्तौ

tathā dṛṣṭvā tayā dārikayā prasādajātayā dvau padmau bhagavataḥ kṣiptau

18.461

तौ चापि भगवता तथाधिष्ठितौ यथा शकटीचक्रमात्रौ कर्णसमीपे वितानं बद्ध्वा व्यवस्थितौ

tau cāpi bhagavatā tathādhiṣṭhitau yathā śakaṭīcakramātrau karṇasamīpe vitānaṃ baddhvā vyavasthitau

18.462

तत्र च प्रदेशे तुमुलेन वातवर्षेण कर्दमो जातः

tatra ca pradeśe tumulena vātavarṣeṇa kardamo jātaḥ

Divyāvadāna