18.85

भगवानाह येन मयेन्द्राय बलबोध्यङ्गरत्नान्यधिगतानि किं तथागतस्य भूयः प्राकृतरत्नैः करणीयं यदि चेच्छत अस्मच्छासने वत्साः प्रव्रजितुम् आगच्छथ

bhagavānāha yena mayendrāya balabodhyaṅgaratnānyadhigatāni kiṃ tathāgatasya bhūyaḥ prākṛtaratnaiḥ karaṇīyaṃ yadi cecchata asmacchāsane vatsāḥ pravrajitum āgacchatha

18.86

यतस्ते संलक्षयन्ति वणिजो यदस्माकं किंचित् जीवितम् तत्सर्वं बुद्धस्य भगवतस्तेजसा

yataste saṃlakṣayanti vaṇijo yadasmākaṃ kiṃcit jīvitam tatsarvaṃ buddhasya bhagavatastejasā

18.87

यद्वयमेतानि रत्नानि त्यक्त्वा भगवतो ऽन्तिके प्रव्रजेम इति

yadvayametāni ratnāni tyaktvā bhagavato 'ntike pravrajema iti

18.88

पश्चात् ते तानि रत्नानि मातापितृभ्यः पुत्रदारदासीदासकर्मकरमित्रामात्यज्ञातिसालोहितेभ्यो यथान्यायतः संविभज्य प्रव्रजिताः

paścāt te tāni ratnāni mātāpitṛbhyaḥ putradāradāsīdāsakarmakaramitrāmātyajñātisālohitebhyo yathānyāyataḥ saṃvibhajya pravrajitāḥ

18.89

प्रव्रज्य तैर्युज्यद्भिर्घटद्भिर् व्यायच्छद्भिर्यावदर्हत्त्वं साक्षात्कृतम्

pravrajya tairyujyadbhirghaṭadbhir vyāyacchadbhiryāvadarhattvaṃ sākṣātkṛtam

18.90

यतो भिक्षवः संशयजाताः सर्वसंशयच्छेत्तारं बुद्धं भगवन्तं पृच्छन्ति कीदृशानि कर्माणि भगवन् एभिर्वणिग्भिः कृतान्युपचितानि येषां कर्मणां विपाकेन भगवानारागितो न विरागितो भगवानाह

yato bhikṣavaḥ saṃśayajātāḥ sarvasaṃśayacchettāraṃ buddhaṃ bhagavantaṃ pṛcchanti kīdṛśāni karmāṇi bhagavan ebhirvaṇigbhiḥ kṛtānyupacitāni yeṣāṃ karmaṇāṃ vipākena bhagavānārāgito na virāgito bhagavānāha

18.91

भूतपूर्वं भिक्षवः काश्यपः सम्यक्सम्बुद्धो लोक उत्पन्नो ऽभूत्

bhūtapūrvaṃ bhikṣavaḥ kāśyapaḥ samyaksambuddho loka utpanno 'bhūt

18.92

तस्य च शासने एत एव च प्रव्रजिता अभूवन्

tasya ca śāsane eta eva ca pravrajitā abhūvan

18.93

तत्र प्रव्रज्य च न कश्चित् तद्रूपो गुणगणो ऽधिगतो नान्यत्र सब्रह्मचारिणामुद्दिष्टमधीतं स्वाध्यायितं च

tatra pravrajya ca na kaścit tadrūpo guṇagaṇo 'dhigato nānyatra sabrahmacāriṇāmuddiṣṭamadhītaṃ svādhyāyitaṃ ca

18.94

मरणकालसमये प्रणिधानं कृतवन्तो यदस्माभिः काश्यपं सम्यक्सम्बुद्धमासाद्योद्दिष्टमधीतं स्वाध्यायितं च न कश्चित् गुणगणो ऽधिगतो ऽस्ति अस्य कर्मणो विपाकेन वयम् यो ऽसौ अनागते ऽध्वनि काश्यपेन सम्यक्सम्बुद्धेन शाक्यमुनिर्नाम सम्यक्सम्बुद्धो व्याकृतः तं वयमारागयेमो न विरागयेमः

maraṇakālasamaye praṇidhānaṃ kṛtavanto yadasmābhiḥ kāśyapaṃ samyaksambuddhamāsādyoddiṣṭamadhītaṃ svādhyāyitaṃ ca na kaścit guṇagaṇo 'dhigato 'sti asya karmaṇo vipākena vayam yo 'sau anāgate 'dhvani kāśyapena samyaksambuddhena śākyamunirnāma samyaksambuddho vyākṛtaḥ taṃ vayamārāgayemo na virāgayemaḥ

18.95

भगवानाह किं मन्यध्वे भिक्षवो यानि तानि पञ्चभिक्षुशतान्यतीते ऽध्वन्यासन् काश्यपस्य सम्यक्सम्बुद्धस्य शासने प्रव्रजितानि एतावन्त्येतानि पञ्चभिक्षुशतानि

bhagavānāha kiṃ manyadhve bhikṣavo yāni tāni pañcabhikṣuśatānyatīte 'dhvanyāsan kāśyapasya samyaksambuddhasya śāsane pravrajitāni etāvantyetāni pañcabhikṣuśatāni

18.96

तदा चैषामिन्द्रियाणि परिपाचितानि एतर्हि अर्हत्त्वं साक्षात्कृतम्

tadā caiṣāmindriyāṇi paripācitāni etarhi arhattvaṃ sākṣātkṛtam

18.97

यश्चासौ महासमुद्रे तिमिस्तिमिंगिलो नाम मत्स्यो बुद्धशब्दं श्रुत्वा अनाहारतायां व्यवस्थितः स स्वभावेनैव तीक्ष्णाग्नितया क्षुद्दुःखस्यासहत्वाच्च्युतः कालगतः

yaścāsau mahāsamudre timistimiṃgilo nāma matsyo buddhaśabdaṃ śrutvā anāhāratāyāṃ vyavasthitaḥ sa svabhāvenaiva tīkṣṇāgnitayā kṣudduḥkhasyāsahatvāccyutaḥ kālagataḥ

18.98

तेन श्रावस्त्यां षट्कर्मनिरते ब्राह्मणकुले प्रतिसंधिर्गृहीतः

tena śrāvastyāṃ ṣaṭkarmanirate brāhmaṇakule pratisaṃdhirgṛhītaḥ

18.99

तस्य तच्छरीरं कलेवरं महासमुद्रे उत्प्लुतम्

tasya taccharīraṃ kalevaraṃ mahāsamudre utplutam

18.100

नागैश्च तस्य स्वभवनसमीपस्थस्य गन्धमसहद्भिरन्यतो विक्षिप्तम्

nāgaiśca tasya svabhavanasamīpasthasya gandhamasahadbhiranyato vikṣiptam

18.101

यत्र च विक्षिप्तं तत्रापि समीपे नागस्यैव भवनम्

yatra ca vikṣiptaṃ tatrāpi samīpe nāgasyaiva bhavanam

18.102

तेनापि गन्धमसहता अन्यतः क्षिप्तम्

tenāpi gandhamasahatā anyataḥ kṣiptam

18.103

एवं क्षिप्तेन पारम्पर्येण तत् कलेवरं महासमुद्रतटं समुदानीतम्

evaṃ kṣiptena pāramparyeṇa tat kalevaraṃ mahāsamudrataṭaṃ samudānītam

18.104

यतो ऽनन्तरं समुद्रवेलयोत्सार्य स्थले प्रक्षिप्तम्

yato 'nantaraṃ samudravelayotsārya sthale prakṣiptam

Divyāvadāna