18.65

किंतु सर्व एवैकरवेण नमो बुद्धायेति वदामः

kiṃtu sarva evaikaraveṇa namo buddhāyeti vadāmaḥ

18.66

सति मरणे बुद्धावलम्बनया स्मृत्या कालं करिष्यामः

sati maraṇe buddhāvalambanayā smṛtyā kālaṃ kariṣyāmaḥ

18.67

सुगतिगमनं भविष्यति

sugatigamanaṃ bhaviṣyati

18.68

यतस्तैर्वणिग्भिरेकरवेण नमो बुद्धायेति प्रणामः कृतः सर्वैरेव

yatastairvaṇigbhirekaraveṇa namo buddhāyeti praṇāmaḥ kṛtaḥ sarvaireva

18.69

भगवता च जेतवनस्थेन स वादः श्रुतो दिव्येन श्रोत्रेण विशुद्धेन अतिक्रान्तमानुषेण

bhagavatā ca jetavanasthena sa vādaḥ śruto divyena śrotreṇa viśuddhena atikrāntamānuṣeṇa

18.70

श्रुत्वा च पुनर्भगवता स नादस्तथा अधिष्ठितो यथा तेन तिमिंगिलेन श्रुतम्

śrutvā ca punarbhagavatā sa nādastathā adhiṣṭhito yathā tena timiṃgilena śrutam

18.71

तस्य तं नमो बुद्धायेति रावं श्रुत्वा मनसो ऽमर्ष उत्पन्नो विक्लवीभूतश्च बुद्धो बत लोक उत्पन्नः

tasya taṃ namo buddhāyeti rāvaṃ śrutvā manaso 'marṣa utpanno viklavībhūtaśca buddho bata loka utpannaḥ

18.72

न मम प्रतिरूपं स्यात् यदहं बुद्धस्य भगवतो नामोद्घोषं श्रुत्वा आहारमाहरेयम्

na mama pratirūpaṃ syāt yadahaṃ buddhasya bhagavato nāmodghoṣaṃ śrutvā āhāramāhareyam

18.73

स चिन्तयितुं प्रवृत्तो यद्यहमिदानीं सहसैव मुखद्वारं पिधास्यामि सलिलवेगप्रत्याहतस्य वहनस्य विनाशो भविष्यति एतेषां चानेकानां

sa cintayituṃ pravṛtto yadyahamidānīṃ sahasaiva mukhadvāraṃ pidhāsyāmi salilavegapratyāhatasya vahanasya vināśo bhaviṣyati eteṣāṃ cānekānāṃ

18.74

यन्न्वहं मृदुनोपक्रमेण स्वैरं स्वैरं मुखद्वारं संपिदध्याम्

yannvahaṃ mṛdunopakrameṇa svairaṃ svairaṃ mukhadvāraṃ saṃpidadhyām

18.75

ततस्तेन तिमिंगिलेनात्मीयं मुखद्वारं मृदुनोपक्रमेण स्वैरं स्वैरं पिहितम्

tatastena timiṃgilenātmīyaṃ mukhadvāraṃ mṛdunopakrameṇa svairaṃ svairaṃ pihitam

18.76

पश्चात् तद्वहनं तस्मान्महाग्राहमुखाद्विनिर्मुक्तम् अनुगुणं वायुमासाद्य तीरमनुप्राप्तम्

paścāt tadvahanaṃ tasmānmahāgrāhamukhādvinirmuktam anuguṇaṃ vāyumāsādya tīramanuprāptam

18.77

अथ ते वणिजस्तीरमासाद्य तद्भाण्डं शकटोष्ट्रगोगर्दभादिभिः पूरयित्वा अनुपूर्वेण ग्रामनिगमपल्लीपत्तनादिषु चञ्चूर्यमाणाः श्रावस्तीमनुप्राप्ताः

atha te vaṇijastīramāsādya tadbhāṇḍaṃ śakaṭoṣṭragogardabhādibhiḥ pūrayitvā anupūrveṇa grāmanigamapallīpattanādiṣu cañcūryamāṇāḥ śrāvastīmanuprāptāḥ

18.78

ते तत्र गत्वा संलक्षयन्ति धर्मतैषा यस्य नाम्ना वहनं संसिद्धयानपात्रमागच्छति तस्यैव तानि रत्नानि गम्यानि भवन्ति

te tatra gatvā saṃlakṣayanti dharmataiṣā yasya nāmnā vahanaṃ saṃsiddhayānapātramāgacchati tasyaiva tāni ratnāni gamyāni bhavanti

18.79

यन्नु वयमेतानि रत्नानि बुद्धस्य भगवतो दद्यामः

yannu vayametāni ratnāni buddhasya bhagavato dadyāmaḥ

18.80

ते तानि रत्नानि संगृह्य भगवतः सकाशमुपगताः

te tāni ratnāni saṃgṛhya bhagavataḥ sakāśamupagatāḥ

18.81

अनुपूर्वेण भगवतः पादौ शिरसा वन्दित्वा भगवतः कथयन्ति भगवन् अस्माकं समुद्रे यानपात्रेणावतीर्णानां तिमिंगिलग्राहेण तस्मिन् यानपात्रे ऽपह्रियमाणे जीवितविनाशे प्रत्युपस्थिते भगवतः स्मरणपरायणानां नामग्रहणं तस्मात् महाग्राहमुखाद्विनिर्मुक्तं ततो वयं भगवन् संसिद्धयानपात्राः क्षेमस्वस्तिना इहागताः

anupūrveṇa bhagavataḥ pādau śirasā vanditvā bhagavataḥ kathayanti bhagavan asmākaṃ samudre yānapātreṇāvatīrṇānāṃ timiṃgilagrāheṇa tasmin yānapātre 'pahriyamāṇe jīvitavināśe pratyupasthite bhagavataḥ smaraṇaparāyaṇānāṃ nāmagrahaṇaṃ tasmāt mahāgrāhamukhādvinirmuktaṃ tato vayaṃ bhagavan saṃsiddhayānapātrāḥ kṣemasvastinā ihāgatāḥ

18.82

धर्मता चैषा यस्य नाम्ना वहनं संसिद्धयानपात्रा आगच्छन्ति तस्य तद्गम्यं भवति

dharmatā caiṣā yasya nāmnā vahanaṃ saṃsiddhayānapātrā āgacchanti tasya tadgamyaṃ bhavati

18.83

तद्वयं भगवतो नामग्रहणेन मरणभयादुत्तीर्णाः

tadvayaṃ bhagavato nāmagrahaṇena maraṇabhayāduttīrṇāḥ

18.84

तदस्माकमेतानि रत्नानि भगवान् गृह्णातु

tadasmākametāni ratnāni bhagavān gṛhṇātu

Divyāvadāna