18.5

यतो वणिजस्तं महासमुद्रं दृष्ट्वा संभिन्नमनसो न प्रसहन्ते समवतरितुम्

yato vaṇijastaṃ mahāsamudraṃ dṛṣṭvā saṃbhinnamanaso na prasahante samavataritum

18.6

पश्चात्तैर्वणिग्भिः कर्णधार उक्त उद्घोषय नः पुरुष महासमुद्रस्य भूतं वर्णम्

paścāttairvaṇigbhiḥ karṇadhāra ukta udghoṣaya naḥ puruṣa mahāsamudrasya bhūtaṃ varṇam

18.7

यतो कर्णधार उद्घोषयितुं प्रवृत्तः शृण्वन्तु भवन्तो जम्बुद्वीपका मनुष्याः सन्त्यस्मिन् महासमुद्रे एवंविधानि रत्नानि तद्यथा मणयो मुक्ता वैडूर्यशङ्खशिला प्रवालो रजतं जातरूपमश्मगर्भो मुसारगल्वो लोहितिका दक्षिणावर्ताः

yato karṇadhāra udghoṣayituṃ pravṛttaḥ śṛṇvantu bhavanto jambudvīpakā manuṣyāḥ santyasmin mahāsamudre evaṃvidhāni ratnāni tadyathā maṇayo muktā vaiḍūryaśaṅkhaśilā pravālo rajataṃ jātarūpamaśmagarbho musāragalvo lohitikā dakṣiṇāvartāḥ

18.8

य इच्छति एवंरूपै रत्नैरात्मानं सम्यक्सुखेन प्रीणयितुं मातापितरौ पुत्रदारं दासीदासकर्मकरपौरुषेयं मित्रामात्यज्ञातिसालोहितम् कालेन च कालं दक्षिणीयेभ्यः श्रमणब्राह्मणेभ्यो दक्षिणां प्रतिष्ठापयितुमूर्ध्वगामिनीं सौभाग्यकरीं सुखविपाकामायत्यां स्वर्गसंवर्तनीम् सो ऽस्मिन् महासमुद्रे अवतरतु धनहेतोः

ya icchati evaṃrūpai ratnairātmānaṃ samyaksukhena prīṇayituṃ mātāpitarau putradāraṃ dāsīdāsakarmakarapauruṣeyaṃ mitrāmātyajñātisālohitam kālena ca kālaṃ dakṣiṇīyebhyaḥ śramaṇabrāhmaṇebhyo dakṣiṇāṃ pratiṣṭhāpayitumūrdhvagāminīṃ saubhāgyakarīṃ sukhavipākāmāyatyāṃ svargasaṃvartanīm so 'smin mahāsamudre avataratu dhanahetoḥ

18.9

एवमुक्ते च पुनः सर्व एव सत्त्वाः संपत्तिकामा विपत्तिप्रतिकूलास्तं श्रुत्वा तस्मिन् महासमुद्रे व्यवसिताः समवतरितुम्

evamukte ca punaḥ sarva eva sattvāḥ saṃpattikāmā vipattipratikūlāstaṃ śrutvā tasmin mahāsamudre vyavasitāḥ samavataritum

18.10

यतस्तद्वहनम् अतिप्रभूतैर्मनुष्यैरतिभारेण च आक्रान्तत्वात् तत्रैवावसीदति

yatastadvahanam atiprabhūtairmanuṣyairatibhāreṇa ca ākrāntatvāt tatraivāvasīdati

18.11

ततः कर्णधारेणोक्तम् असह्यं वहनम्

tataḥ karṇadhāreṇoktam asahyaṃ vahanam

18.12

यतो वणिजः कथयन्ति कस्येदानीं वक्ष्यामो वहनात् प्रत्यवतरस्वेति

yato vaṇijaḥ kathayanti kasyedānīṃ vakṣyāmo vahanāt pratyavatarasveti

18.13

तैर्वणिग्भिः कर्णधारस्योक्तं महासमुद्रस्य भूतं वर्णमुद्घोषयत

tairvaṇigbhiḥ karṇadhārasyoktaṃ mahāsamudrasya bhūtaṃ varṇamudghoṣayata

18.14

ततः स उद्घोषयितुं प्रवृत्तः शृण्वन्तु भवन्तो जम्बुद्वीपका मनुष्याः सन्त्यस्मिन् महासमुद्रे इमानि एवंरूपाणि महान्ति महाभयानि तद्यथा तिमिभयं तिमिंगिलभयमूर्मिभयं कूर्मभयं स्थले उत्सीदनभयं जले संसीदनभयमन्तर्जलगतानां पर्वतानामाघट्टनभयं कालिकावातभयम्

tataḥ sa udghoṣayituṃ pravṛttaḥ śṛṇvantu bhavanto jambudvīpakā manuṣyāḥ santyasmin mahāsamudre imāni evaṃrūpāṇi mahānti mahābhayāni tadyathā timibhayaṃ timiṃgilabhayamūrmibhayaṃ kūrmabhayaṃ sthale utsīdanabhayaṃ jale saṃsīdanabhayamantarjalagatānāṃ parvatānāmāghaṭṭanabhayaṃ kālikāvātabhayam

18.15

चौरा अपि आगच्छन्ति नीलवाससो धनहारिणः

caurā api āgacchanti nīlavāsaso dhanahāriṇaḥ

18.16

येन चात्मनो जीवितपरित्यागो व्यवस्थितो मातापितरौ पुत्रदारं दासीदासकर्मकरपौरुषेयं मित्रामात्यज्ञातिसालोहितं चित्रं च जम्बुद्वीपं परित्यक्तुम् स महासमुद्रमवतरतु

yena cātmano jīvitaparityāgo vyavasthito mātāpitarau putradāraṃ dāsīdāsakarmakarapauruṣeyaṃ mitrāmātyajñātisālohitaṃ citraṃ ca jambudvīpaṃ parityaktum sa mahāsamudramavataratu

18.17

अल्पाः शूरा बहवः कातराः

alpāḥ śūrā bahavaḥ kātarāḥ

18.18

तं श्रुत्वा तथोद्घुष्य तु तस्माद्यानपात्रादवतीर्णा बहवः केचिदवशिष्टाः

taṃ śrutvā tathodghuṣya tu tasmādyānapātrādavatīrṇā bahavaḥ kecidavaśiṣṭāḥ

18.19

ततस्तैर्वणिग्भिर्वहनस्यैकं वरत्रं छिन्नम्

tatastairvaṇigbhirvahanasyaikaṃ varatraṃ chinnam

18.20

पश्चाद् द्वौ त्रयो यावदनुपूर्वेण सर्वे वरत्राश्छिन्नाः

paścād dvau trayo yāvadanupūrveṇa sarve varatrāśchinnāḥ

18.21

तासु छिन्नासु तद्वहनं महाकर्णधारसंप्रेरितं गगने महावातसंप्रेरितो मेघ इव बलवद्वायुसंप्रेरितं क्षिप्रमेव सम्प्रस्थितम्

tāsu chinnāsu tadvahanaṃ mahākarṇadhārasaṃpreritaṃ gagane mahāvātasaṃprerito megha iva balavadvāyusaṃpreritaṃ kṣiprameva samprasthitam

18.22

यावद्रत्नद्वीपमनुप्राप्तः

yāvadratnadvīpamanuprāptaḥ

18.23

स तं प्रदेशमनुप्राप्तानां कर्णधारः कथयति सन्त्यस्मिन् रत्नद्वीपे काचमणयो रत्नसदृशास् ते भवद्भिरुपपरीक्ष्योपपरीक्ष्य गृहीतव्याः

sa taṃ pradeśamanuprāptānāṃ karṇadhāraḥ kathayati santyasmin ratnadvīpe kācamaṇayo ratnasadṛśās te bhavadbhirupaparīkṣyopaparīkṣya gṛhītavyāḥ

18.24

मा वः पश्चाज्जम्बुद्वीपगतानां ताप्यं भविष्यति

mā vaḥ paścājjambudvīpagatānāṃ tāpyaṃ bhaviṣyati

Divyāvadāna