17.51

समनन्तरोत्सृष्टेष्वायुःसंस्कारेष्वनेका नागयक्षगन्धर्वकिन्नरमहोरगा भगवतः सकाशमुपसंक्रान्ता भगवतो दर्शनाय

samanantarotsṛṣṭeṣvāyuḥsaṃskāreṣvanekā nāgayakṣagandharvakinnaramahoragā bhagavataḥ sakāśamupasaṃkrāntā bhagavato darśanāya

17.52

भगवता तेषामेवंविधा धर्मदेशना कृता यदनेकैर् नागयक्षगन्धर्वकिन्नरैर्महोरगैः शरणगमनशिक्षापदानि गृहीतानि यावत् स्वभवनमनुप्राप्ताः

bhagavatā teṣāmevaṃvidhā dharmadeśanā kṛtā yadanekair nāgayakṣagandharvakinnarairmahoragaiḥ śaraṇagamanaśikṣāpadāni gṛhītāni yāvat svabhavanamanuprāptāḥ

17.53

अथायुष्मानानन्दः सायाह्णे ऽभिसंलयनाद्व्युत्थाय येन भगवांस्तेनोपसंक्रान्तः

athāyuṣmānānandaḥ sāyāhṇe 'bhisaṃlayanādvyutthāya yena bhagavāṃstenopasaṃkrāntaḥ

17.54

उपसंक्रम्य भगवतः पादौ शिरसा वन्दित्वा एकान्ते ऽस्थात्

upasaṃkramya bhagavataḥ pādau śirasā vanditvā ekānte 'sthāt

17.55

एकान्तस्थित आयुष्मानानन्दो भगवन्तमिदमवोचत् को भदन्त हेतुः कः प्रत्ययो महतः पृथिवीचालस्य अष्टौ इमे आनन्द अष्टौ प्रत्यया महतः पृथिवीचालस्य

ekāntasthita āyuṣmānānando bhagavantamidamavocat ko bhadanta hetuḥ kaḥ pratyayo mahataḥ pṛthivīcālasya aṣṭau ime ānanda aṣṭau pratyayā mahataḥ pṛthivīcālasya

17.56

कतमे ऽष्टौ इयमानन्द महापृथिवी अप्सु प्रतिष्ठिता आपो वायौ प्रतिष्ठिताः वायुराकाशे प्रतिष्ठितः

katame 'ṣṭau iyamānanda mahāpṛthivī apsu pratiṣṭhitā āpo vāyau pratiṣṭhitāḥ vāyurākāśe pratiṣṭhitaḥ

17.57

भवत्यानन्द समयो यदाकाशे विषमा वायवो वान्ति आपः क्षोभयन्ति आपः क्षुब्धाः पृथिवीं चालयन्ति

bhavatyānanda samayo yadākāśe viṣamā vāyavo vānti āpaḥ kṣobhayanti āpaḥ kṣubdhāḥ pṛthivīṃ cālayanti

17.58

अयमानन्द प्रथमो हेतुः प्रथमः प्रत्ययो महतः पृथिवीचालस्य

ayamānanda prathamo hetuḥ prathamaḥ pratyayo mahataḥ pṛthivīcālasya

17.59

पुनरपरमानन्द भिक्षुर्महर्द्धिको भवति महानुभावः

punaraparamānanda bhikṣurmaharddhiko bhavati mahānubhāvaḥ

17.60

स आकाङ्क्षमाणः पृथिवीं चालयति

sa ākāṅkṣamāṇaḥ pṛthivīṃ cālayati

17.61

देवता महर्द्धिका भवति महानुभावा

devatā maharddhikā bhavati mahānubhāvā

17.62

सापि परीत्तां पृथिवीसंज्ञामधितिष्ठति अप्रमाणां चाप्संज्ञाम्

sāpi parīttāṃ pṛthivīsaṃjñāmadhitiṣṭhati apramāṇāṃ cāpsaṃjñām

17.63

साप्याकाङ्क्षमाणा पृथिवीं चालयति

sāpyākāṅkṣamāṇā pṛthivīṃ cālayati

17.64

अयं द्वितीयो हेतुर्द्वितीयः प्रत्ययो महतः पृथिवीचालस्य

ayaṃ dvitīyo heturdvitīyaḥ pratyayo mahataḥ pṛthivīcālasya

17.65

पुनरपरमानन्द

punaraparamānanda

17.66

यस्मिन् समये बोधिसत्त्वस्तुषिताद् देवनिकायाच्च्युत्वा मातुः कुक्षिमवक्रामति अथ तस्मिन् समये महापृथिवीचालो भवति सर्वश्चायं लोक उदारेणावभासेन स्फुटो भवति

yasmin samaye bodhisattvastuṣitād devanikāyāccyutvā mātuḥ kukṣimavakrāmati atha tasmin samaye mahāpṛthivīcālo bhavati sarvaścāyaṃ loka udāreṇāvabhāsena sphuṭo bhavati

17.67

या लोकस्य लोकान्तरिका अन्धास्तमसो ऽन्धकारतमिस्रा यत्रामू सूर्याचन्द्रमसौ एवं महर्द्धिकौ एवं महानुभावौ आभयाभां न प्रत्यनुभवतः ता अपि तस्मिन् समये उदारेणावभासेन स्फुटा भवन्ति

yā lokasya lokāntarikā andhāstamaso 'ndhakāratamisrā yatrāmū sūryācandramasau evaṃ maharddhikau evaṃ mahānubhāvau ābhayābhāṃ na pratyanubhavataḥ tā api tasmin samaye udāreṇāvabhāsena sphuṭā bhavanti

17.68

तत्र ये सत्त्वा उपपन्नाः ते तयान्योन्यं सत्त्वं दृष्ट्वा संजानन्ते अन्ये ऽपीह भवन्तः सत्त्वा उपपन्नाः अन्ये ऽपीह भवन्तः सत्त्वा उपपन्ना इति

tatra ye sattvā upapannāḥ te tayānyonyaṃ sattvaṃ dṛṣṭvā saṃjānante anye 'pīha bhavantaḥ sattvā upapannāḥ anye 'pīha bhavantaḥ sattvā upapannā iti

17.69

अयमानन्द तृतीयो हेतुस्तृतीयः प्रत्ययो महतः पृथिवीचालस्य

ayamānanda tṛtīyo hetustṛtīyaḥ pratyayo mahataḥ pṛthivīcālasya

17.70

पुनरपरमानन्द यस्मिन् समये बोधिसत्त्वो मातुः कुक्षेर् निष्क्रामति अथ तस्मिन् समये महापृथिवीचालो भवति सर्वश्चायं लोक उदारेणावभासेन स्फुटो भवति

punaraparamānanda yasmin samaye bodhisattvo mātuḥ kukṣer niṣkrāmati atha tasmin samaye mahāpṛthivīcālo bhavati sarvaścāyaṃ loka udāreṇāvabhāsena sphuṭo bhavati

Divyāvadāna