17.12

द्विरपि त्रिरपि भगवानायुष्मन्तमानन्दमामन्त्रयते रमणीया आनन्द वैशाली वृजिभूमिश्चापालं चैत्यं सप्ताम्रकं बहुपत्त्रकं गौतमन्यग्रोधः शालवनं धुरानिक्षेपनं मल्लानां मकुटबन्धनं चैत्यम्

dvirapi trirapi bhagavānāyuṣmantamānandamāmantrayate ramaṇīyā ānanda vaiśālī vṛjibhūmiścāpālaṃ caityaṃ saptāmrakaṃ bahupattrakaṃ gautamanyagrodhaḥ śālavanaṃ dhurānikṣepanaṃ mallānāṃ makuṭabandhanaṃ caityam

17.13

चित्रो जम्बुद्वीपः मधुरं जीवितं मनुष्याणाम्

citro jambudvīpaḥ madhuraṃ jīvitaṃ manuṣyāṇām

17.14

यस्य कस्यचिदानन्द चत्वार ऋद्धिपादा आसेविता भाविता बहुलीकृताः आकाङ्क्षन् स कल्पं वा तिष्ठेत् कल्पावशेषं वा

yasya kasyacidānanda catvāra ṛddhipādā āsevitā bhāvitā bahulīkṛtāḥ ākāṅkṣan sa kalpaṃ vā tiṣṭhet kalpāvaśeṣaṃ vā

17.15

तथागतस्य आनन्द चत्वार ऋद्धिपादा आसेविता भाविता बहुलीकृताः

tathāgatasya ānanda catvāra ṛddhipādā āsevitā bhāvitā bahulīkṛtāḥ

17.16

आकाङ्क्षमाणस्तथागतः कल्पं वा तिष्ठेत् कल्पावशेषं वा

ākāṅkṣamāṇastathāgataḥ kalpaṃ vā tiṣṭhet kalpāvaśeṣaṃ vā

17.17

द्विरपि त्रिरपि आयुष्मानानन्दस्तूष्णीम्

dvirapi trirapi āyuṣmānānandastūṣṇīm

17.18

अथ भगवत एतदभवत् स्फुटो ऽभवदानन्दो भिक्षुर्मारेण पापीयसा यत्रेदानीम् यावत् त्रिरपि औदारिके अवभासनिमित्ते प्राविष्क्रियमाणे न शक्नोति तन्निमित्तमाज्ञातुम् यथापि ततः स्फुटो मारेण पापीयसा

atha bhagavata etadabhavat sphuṭo 'bhavadānando bhikṣurmāreṇa pāpīyasā yatredānīm yāvat trirapi audārike avabhāsanimitte prāviṣkriyamāṇe na śaknoti tannimittamājñātum yathāpi tataḥ sphuṭo māreṇa pāpīyasā

17.19

तत्र भगवानायुष्मन्तमानन्दमामन्त्रयते गच्छ त्वमानन्द अन्यतरवृक्षमूलं निश्रित्य विहर मा उभावपि आकीर्णविहारिणौ भविष्यावः

tatra bhagavānāyuṣmantamānandamāmantrayate gaccha tvamānanda anyataravṛkṣamūlaṃ niśritya vihara mā ubhāvapi ākīrṇavihāriṇau bhaviṣyāvaḥ

17.20

एवं भदन्तेत्यायुष्मानानन्दो भगवतः प्रतिश्रुत्य अन्यतमवृक्षमूलं निश्रित्य निषण्णो दिवाविहाराय

evaṃ bhadantetyāyuṣmānānando bhagavataḥ pratiśrutya anyatamavṛkṣamūlaṃ niśritya niṣaṇṇo divāvihārāya

17.21

स मारः पापीयान् येन भगवांस्तेनोपसंक्रान्तः

sa māraḥ pāpīyān yena bhagavāṃstenopasaṃkrāntaḥ

17.22

उपसंक्रम्य भगवन्तमिदमवोचत् परिनिर्वातु भगवान्

upasaṃkramya bhagavantamidamavocat parinirvātu bhagavān

17.23

परिनिर्वाणकालसमयः सुगतस्य

parinirvāṇakālasamayaḥ sugatasya

17.24

कस्मात् त्वं पापीयन्न् एवं वदसि परिनिर्वातु भगवान् परिनिर्वाणकालसमयः सुगतस्य एको ऽयं भदन्त समयो भगवानुरुबिल्वायां विहरति नद्या नैरञ्जनायास्तीरे बोधिमूले ऽचिराभिसंबुद्धः

kasmāt tvaṃ pāpīyann evaṃ vadasi parinirvātu bhagavān parinirvāṇakālasamayaḥ sugatasya eko 'yaṃ bhadanta samayo bhagavānurubilvāyāṃ viharati nadyā nairañjanāyāstīre bodhimūle 'cirābhisaṃbuddhaḥ

17.25

सो ऽहम् येन भगवांस्तेनोपसंक्रान्तः

so 'ham yena bhagavāṃstenopasaṃkrāntaḥ

17.26

उपसंक्रम्य भगवन्तमेवं वदामि परिनिर्वातु भगवान् परिनिर्वाणकालसमयः सुगतस्य

upasaṃkramya bhagavantamevaṃ vadāmi parinirvātu bhagavān parinirvāṇakālasamayaḥ sugatasya

17.27

भगवानेवमाह न तावत् पापीयन् परिनिर्वास्यामि यावन्न मे श्रावकाः पण्डिता भविष्यन्ति व्यक्ता विनीता विशारदाः अलमुत्पन्नोत्पन्नानां परप्रवादिनां सहधर्मेण निग्रहीतारः अलं स्वस्य वादस्य पर्यवदापयितारो भिक्षवो भिक्षुण्य उपासका उपासिकाः

bhagavānevamāha na tāvat pāpīyan parinirvāsyāmi yāvanna me śrāvakāḥ paṇḍitā bhaviṣyanti vyaktā vinītā viśāradāḥ alamutpannotpannānāṃ parapravādināṃ sahadharmeṇa nigrahītāraḥ alaṃ svasya vādasya paryavadāpayitāro bhikṣavo bhikṣuṇya upāsakā upāsikāḥ

17.28

वैस्तारिकं च ते ब्रह्मचर्यं चरिष्यन्ति बाहुजन्यं पृथुभूतम् यावद्देवमनुष्येभ्यः सम्यक्संप्रकाशितम्

vaistārikaṃ ca te brahmacaryaṃ cariṣyanti bāhujanyaṃ pṛthubhūtam yāvaddevamanuṣyebhyaḥ samyaksaṃprakāśitam

17.29

एतर्हि भदन्त भगवतः श्रावकाः पण्डिता व्यक्ता विनीता विशारदा अलमुत्पन्नोत्पन्नानां परप्रवादिनां सहधर्मेण निग्रहीतारः स्वस्य वादस्य पर्यवदापयितारो भिक्षवो भिक्षुण्य उपासका उपासिकाः

etarhi bhadanta bhagavataḥ śrāvakāḥ paṇḍitā vyaktā vinītā viśāradā alamutpannotpannānāṃ parapravādināṃ sahadharmeṇa nigrahītāraḥ svasya vādasya paryavadāpayitāro bhikṣavo bhikṣuṇya upāsakā upāsikāḥ

17.30

वैस्तारिकं च ते ब्रह्मचर्यं बाहुजन्यं पृथुभूतम् यावद्देवमनुष्येभ्यः सम्यक्संप्रकाशितम्

vaistārikaṃ ca te brahmacaryaṃ bāhujanyaṃ pṛthubhūtam yāvaddevamanuṣyebhyaḥ samyaksaṃprakāśitam

17.31

तस्मादहमेवं वदामि परिनिर्वातु भगवान् परिनिर्वाणकालसमयः सुगतस्य

tasmādahamevaṃ vadāmi parinirvātu bhagavān parinirvāṇakālasamayaḥ sugatasya

Divyāvadāna