13.44

स मुहुर्मुहुरनर्थश्रवणदृढीकृतचित्तसंततिः कथयति भोः पुरुष प्राप्तव्यमेतत्

sa muhurmuhuranarthaśravaṇadṛḍhīkṛtacittasaṃtatiḥ kathayati bhoḥ puruṣa prāptavyametat

13.45

अलं विषादेन तूष्णीं तिष्ठेति

alaṃ viṣādena tūṣṇīṃ tiṣṭheti

13.46

अथ तस्य ज्ञातयो लोकधर्मानुवृत्त्या अवज्ञापूर्वकेन नामधेयं व्यवस्थापयितुमारब्धाः किं भवतु दारकस्य नामेति

atha tasya jñātayo lokadharmānuvṛttyā avajñāpūrvakena nāmadheyaṃ vyavasthāpayitumārabdhāḥ kiṃ bhavatu dārakasya nāmeti

13.47

तत्रैके कथयन्ति यत्कुलसदृशं तत्क्रियतामिति

tatraike kathayanti yatkulasadṛśaṃ tatkriyatāmiti

13.48

अपरे कथयन्ति येन बोधस्य गृहपतेः कुक्षिगतेनैवानेकधनसमुदितं गृहं निधनमुपनीतम् तस्य कीदृशं कुलसदृशं नाम व्यवस्थाप्यते अपि तु अयं पित्रा जातमात्रः स्वागतवादेन समुदाचरितः तस्मादस्य स्वागत इति नाम भवतु इति

apare kathayanti yena bodhasya gṛhapateḥ kukṣigatenaivānekadhanasamuditaṃ gṛhaṃ nidhanamupanītam tasya kīdṛśaṃ kulasadṛśaṃ nāma vyavasthāpyate api tu ayaṃ pitrā jātamātraḥ svāgatavādena samudācaritaḥ tasmādasya svāgata iti nāma bhavatu iti

13.49

तस्य स्वागत इति नामधेयं व्यवस्थापितम्

tasya svāgata iti nāmadheyaṃ vyavasthāpitam

13.50

यथा यथा स्वागतो वृद्धिमुपयाति तथा तथा बोधस्य गृहपतेर् धनधान्यहिरण्यसुवर्णदासीदासकर्मकरपौरुषेयास् तनुत्वं परिक्षयं पर्यादानं गच्छन्ति

yathā yathā svāgato vṛddhimupayāti tathā tathā bodhasya gṛhapater dhanadhānyahiraṇyasuvarṇadāsīdāsakarmakarapauruṣeyās tanutvaṃ parikṣayaṃ paryādānaṃ gacchanti

13.51

यावदपरेण समयेन बोधो गृहपतिः कालगतः

yāvadapareṇa samayena bodho gṛhapatiḥ kālagataḥ

13.52

साप्यस्य पत्नी कालगता

sāpyasya patnī kālagatā

13.53

तद्गृहं प्रतिसंस्कृतं पुनरग्निना दग्धम्

tadgṛhaṃ pratisaṃskṛtaṃ punaragninā dagdham

13.54

ये ऽप्यस्य पौरुषेयाः पण्यमादाय देशान्तरगता महासमुद्रम् यावत्तीर्णाः ततः केषांचिद्यानपात्रं विपन्नम् केषांचित् पण्यमपण्यीजातम् केचित् तत्रैवानयेन व्यसनमापन्नाः केषांचित् कान्तारमध्यगतानां चौरैर्द्रव्यमपहृतम् केषांचिन्नगरसमीपमनुप्राप्तानां शौल्किकशौल्किकैर्द्रव्यं विचारयद्भिः सारो गृहीतः केषांचित् पत्तनमनुप्राप्तानां राज्ञा विनियुक्तैर्दोषमुत्पाद्य सर्वस्वमपहृतम्

ye 'pyasya pauruṣeyāḥ paṇyamādāya deśāntaragatā mahāsamudram yāvattīrṇāḥ tataḥ keṣāṃcidyānapātraṃ vipannam keṣāṃcit paṇyamapaṇyījātam kecit tatraivānayena vyasanamāpannāḥ keṣāṃcit kāntāramadhyagatānāṃ caurairdravyamapahṛtam keṣāṃcinnagarasamīpamanuprāptānāṃ śaulkikaśaulkikairdravyaṃ vicārayadbhiḥ sāro gṛhītaḥ keṣāṃcit pattanamanuprāptānāṃ rājñā viniyuktairdoṣamutpādya sarvasvamapahṛtam

13.55

केचिद्बोधस्य गृहपतेः प्राणवियोगं श्रुत्वा तत्रैव अवस्थिताः

kecidbodhasya gṛhapateḥ prāṇaviyogaṃ śrutvā tatraiva avasthitāḥ

13.56

ज्ञातीनामपि केचित् कालगताः केचिन्निष्पलायिताः केचित् तत्रैवावस्थिताः स्वागतस्य वाचमपि न प्रयच्छन्ति

jñātīnāmapi kecit kālagatāḥ kecinniṣpalāyitāḥ kecit tatraivāvasthitāḥ svāgatasya vācamapi na prayacchanti

13.57

दासीदासकर्मकरपौरुषेया अपि केचित् कालगताः केचिन्निष्पलायिताः केचिदन्याश्रयेण तत्रैवावस्थिताः सन्तः स्वागतस्य नामापि न गृह्णन्ति

dāsīdāsakarmakarapauruṣeyā api kecit kālagatāḥ kecinniṣpalāyitāḥ kecidanyāśrayeṇa tatraivāvasthitāḥ santaḥ svāgatasya nāmāpi na gṛhṇanti

13.58

किंतु बोधस्यैका पुराणवृद्धा दासी कृतज्ञतया स्वागतस्योपस्थानं कुर्वन्ती तिष्ठति

kiṃtu bodhasyaikā purāṇavṛddhā dāsī kṛtajñatayā svāgatasyopasthānaṃ kurvantī tiṣṭhati

13.59

तया स लिप्यक्षराचार्यस्याक्षराणि शिक्षयितुमुपन्यस्तः

tayā sa lipyakṣarācāryasyākṣarāṇi śikṣayitumupanyastaḥ

13.60

सा संलक्षयति बोधस्य गृहपतेर्गृहमनेकधनसमुदितं विस्तीर्णस्वजनबन्धुवर्गं प्रभूतदासीदासकर्मकरपौरुषेयम् पर्यादानं गतम्

sā saṃlakṣayati bodhasya gṛhapatergṛhamanekadhanasamuditaṃ vistīrṇasvajanabandhuvargaṃ prabhūtadāsīdāsakarmakarapauruṣeyam paryādānaṃ gatam

13.61

स्वागतो ऽहं चावस्थिताः

svāgato 'haṃ cāvasthitāḥ

13.62

तज्जिज्ञासयामि तावत् कस्यापुण्येनायमुपप्लवः किं स्वागतस्य आहोस्विन्ममेति

tajjijñāsayāmi tāvat kasyāpuṇyenāyamupaplavaḥ kiṃ svāgatasya āhosvinmameti

13.63

तया स्वागतस्य नाम्ना स्थाल्यां तण्डुलान् प्रक्षिप्य भक्तार्थम् योजिता विनष्टाः

tayā svāgatasya nāmnā sthālyāṃ taṇḍulān prakṣipya bhaktārtham yojitā vinaṣṭāḥ

Divyāvadāna