1.297

चित्तमभिप्रसन्नं दृष्ट्वा स मया प्रसादजातया पिण्डकेन प्रतिपादितः

cittamabhiprasannaṃ dṛṣṭvā sa mayā prasādajātayā piṇḍakena pratipāditaḥ

1.298

तस्या मम बुद्धिरुत्पन्ना स्वामिनमनुमोदयामि प्रामोद्यमुत्पादयिष्यतीति

tasyā mama buddhirutpannā svāminamanumodayāmi prāmodyamutpādayiṣyatīti

1.299

स स्नात्वा आगतः

sa snātvā āgataḥ

1.300

मयोक्तम् आर्यपुत्र अनुमोदस्व मयार्यो महाकात्यायनः पिण्डकेन प्रतिपादितः

mayoktam āryaputra anumodasva mayāryo mahākātyāyanaḥ piṇḍakena pratipāditaḥ

1.301

स रुषितो यावद् ब्राह्मणानां न दीयते ज्ञातीनां वा ज्ञातिपूजा न क्रियते तावत्त्वया तस्मै मुण्डकाय श्रमणकायाग्रपिण्डकं दत्तम् सो ऽमर्षजातः कथयति कस्मात् स मुण्डकः श्रमणको बुसप्लावीं न भक्षयतीति तस्य कर्मणो विपाकेनायं बुसप्लावीं भक्षयति

sa ruṣito yāvad brāhmaṇānāṃ na dīyate jñātīnāṃ vā jñātipūjā na kriyate tāvattvayā tasmai muṇḍakāya śramaṇakāyāgrapiṇḍakaṃ dattam so 'marṣajātaḥ kathayati kasmāt sa muṇḍakaḥ śramaṇako busaplāvīṃ na bhakṣayatīti tasya karmaṇo vipākenāyaṃ busaplāvīṃ bhakṣayati

1.302

मम बुद्धिरुत्पन्ना पुत्रमपि अनुमोदयामि प्रामोद्यमुत्पादयिष्यतीति

mama buddhirutpannā putramapi anumodayāmi prāmodyamutpādayiṣyatīti

1.303

सो ऽपि मयोक्तः पुत्र अनुमोदस्व मयार्यो महाकात्यायनः पिण्डकेन प्रतिपादितः

so 'pi mayoktaḥ putra anumodasva mayāryo mahākātyāyanaḥ piṇḍakena pratipāditaḥ

1.304

सो ऽपि रुषितो यावद् ब्राह्मणानां न दीयते ज्ञातीनां वा ज्ञातिपूजा न क्रियते तावत्त्वया तस्मै मुण्डकाय श्रमणकायाग्रपिण्डं दत्तम् सो ऽपि अमर्षजातः कथयति कस्मात् स मुण्डकः श्रमणको ऽयोगुडं न भक्षयतीति तस्य कर्मणो विपाकेनायमयोगुडं भक्षयति

so 'pi ruṣito yāvad brāhmaṇānāṃ na dīyate jñātīnāṃ vā jñātipūjā na kriyate tāvattvayā tasmai muṇḍakāya śramaṇakāyāgrapiṇḍaṃ dattam so 'pi amarṣajātaḥ kathayati kasmāt sa muṇḍakaḥ śramaṇako 'yoguḍaṃ na bhakṣayatīti tasya karmaṇo vipākenāyamayoguḍaṃ bhakṣayati

1.305

नक्षत्ररात्र्यां प्रत्युपस्थितायां मम ज्ञातयः प्रहेणकानि प्रेषयन्ति

nakṣatrarātryāṃ pratyupasthitāyāṃ mama jñātayaḥ praheṇakāni preṣayanti

1.306

तानि अहं स्नुषायाः समर्पयामि

tāni ahaṃ snuṣāyāḥ samarpayāmi

1.307

सा प्रणीतानि प्रहेणकानि भक्षयित्वा मम लूहानि उपनामयति

sā praṇītāni praheṇakāni bhakṣayitvā mama lūhāni upanāmayati

1.308

अहं तेषां ज्ञातीनां संदिशामि किं नु यूयं दुर्भिक्षे यथा लूहानि प्रहेणकानि प्रेषयत ते मम संदिशन्ति न वयं लूहानि प्रेषयामः अपि तु प्रणीतान्येव प्रहेणकानि प्रेषयामः

ahaṃ teṣāṃ jñātīnāṃ saṃdiśāmi kiṃ nu yūyaṃ durbhikṣe yathā lūhāni praheṇakāni preṣayata te mama saṃdiśanti na vayaṃ lūhāni preṣayāmaḥ api tu praṇītānyeva praheṇakāni preṣayāmaḥ

1.309

मया स्नुषाभिहिता वधूके मा त्वं प्रणीतानि प्रहेणकानि भक्षयित्वास्माकं लूहानि उपनामयसि सा कथयति किं स्वमांसं न भक्षयति या त्वदीयानि प्रहेणकानि भक्षयतीति इयं तस्य कर्मणो विपाकेन स्वमांसानि भक्षयति

mayā snuṣābhihitā vadhūke mā tvaṃ praṇītāni praheṇakāni bhakṣayitvāsmākaṃ lūhāni upanāmayasi sā kathayati kiṃ svamāṃsaṃ na bhakṣayati yā tvadīyāni praheṇakāni bhakṣayatīti iyaṃ tasya karmaṇo vipākena svamāṃsāni bhakṣayati

1.310

नक्षत्ररात्र्यां प्रत्युपस्थितायां प्रणीतानि प्रहेणकानि दत्त्वा ज्ञातीनां प्रेषयामि

nakṣatrarātryāṃ pratyupasthitāyāṃ praṇītāni praheṇakāni dattvā jñātīnāṃ preṣayāmi

1.311

सा दारिका तानि प्रणीतानि प्रहेणकानि मार्गे ऽन्तर्भक्षयित्वा तेषां लूहानि उपनामयति

sā dārikā tāni praṇītāni praheṇakāni mārge 'ntarbhakṣayitvā teṣāṃ lūhāni upanāmayati

1.312

ते मम संदिशन्ति किं नु त्वं दुर्भिक्षे यथा लूहानि अस्माकं प्रहेणकानि प्रेषयसि अहं तेषां संदिशामि नाहं लूहानि प्रेषयामि अपि तु प्रणीतान्येवाहं प्रेषयामीति

te mama saṃdiśanti kiṃ nu tvaṃ durbhikṣe yathā lūhāni asmākaṃ praheṇakāni preṣayasi ahaṃ teṣāṃ saṃdiśāmi nāhaṃ lūhāni preṣayāmi api tu praṇītānyevāhaṃ preṣayāmīti

1.313

मया दारिकाभिहिता दारिके मा त्वं प्रणीतानि प्रहेणकानि भक्षयित्वा तेषां लूहानि उपनामयसि

mayā dārikābhihitā dārike mā tvaṃ praṇītāni praheṇakāni bhakṣayitvā teṣāṃ lūhāni upanāmayasi

1.314

सा कथयति किं नु पूयशोणितं न भक्षयति या त्वदीयानि प्रहेणकानि भक्षयतीति तस्य कर्मणो विपाकेनेयं पूयशोणितं भक्षयति

sā kathayati kiṃ nu pūyaśoṇitaṃ na bhakṣayati yā tvadīyāni praheṇakāni bhakṣayatīti tasya karmaṇo vipākeneyaṃ pūyaśoṇitaṃ bhakṣayati

1.315

मम बुद्धिरुत्पन्ना तत्र प्रतिसंधिं गृह्णीयाम् यत्रैतान् सर्वान् स्वकं स्वकं कर्मफलं परिभुञ्जानान् पश्येयमिति

mama buddhirutpannā tatra pratisaṃdhiṃ gṛhṇīyām yatraitān sarvān svakaṃ svakaṃ karmaphalaṃ paribhuñjānān paśyeyamiti

1.316

यया मयार्यमहाकात्यायनं पिण्डकेन प्रतिपाद्य प्रणीते त्रायस्त्रिंशे देवनिकाये उपपत्तव्यम् साहं मिथ्याप्रणिधानवशात् प्रेतमहर्द्धिका संवृत्ता

yayā mayāryamahākātyāyanaṃ piṇḍakena pratipādya praṇīte trāyastriṃśe devanikāye upapattavyam sāhaṃ mithyāpraṇidhānavaśāt pretamaharddhikā saṃvṛttā

Divyāvadāna