12.310

अहमेषामुत्तरे मनुष्यधर्मे ऋद्धिप्रातिहार्यं विदर्शयिष्यामि हिताय प्राणिनाम्

ahameṣāmuttare manuṣyadharme ṛddhiprātihāryaṃ vidarśayiṣyāmi hitāya prāṇinām

12.311

निर्भर्त्सयिष्यामि तीर्थ्यान्

nirbhartsayiṣyāmi tīrthyān

12.312

नन्दयिष्यामि देवमनुष्यान्

nandayiṣyāmi devamanuṣyān

12.313

तोषयिष्यामि सज्जनहृदयमनांसि

toṣayiṣyāmi sajjanahṛdayamanāṃsi

12.314

निषीद त्वं मौद्गल्यायन यथास्वके आसने

niṣīda tvaṃ maudgalyāyana yathāsvake āsane

12.315

निषण्ण आयुष्मान् महामौद्गल्यायनो यथास्वके आसने

niṣaṇṇa āyuṣmān mahāmaudgalyāyano yathāsvake āsane

12.316

तत्र भगवान् राजानं प्रसेनजितं कौशलमामन्त्रयते को महाराज तथागतमध्येषते उत्तरे मनुष्यधर्मे ऋद्धिप्रातिहार्यं हिताय प्राणिनाम् अथ राजा प्रसेनजित् कौशल उत्थायासनाद् एकांसमुत्तरासङ्गं कृत्वा दक्षिणं जानुमण्डलं पृथिव्यां प्रतिष्ठाप्य येन भगवांस्तेनाञ्जलिं प्रणम्य भगवन्तमेतदवोचत् अहं भदन्त भगवन्तमध्येषे उत्तरे मनुष्यधर्मे ऋद्धिप्रातिहार्यं विदर्शयितुम्

tatra bhagavān rājānaṃ prasenajitaṃ kauśalamāmantrayate ko mahārāja tathāgatamadhyeṣate uttare manuṣyadharme ṛddhiprātihāryaṃ hitāya prāṇinām atha rājā prasenajit kauśala utthāyāsanād ekāṃsamuttarāsaṅgaṃ kṛtvā dakṣiṇaṃ jānumaṇḍalaṃ pṛthivyāṃ pratiṣṭhāpya yena bhagavāṃstenāñjaliṃ praṇamya bhagavantametadavocat ahaṃ bhadanta bhagavantamadhyeṣe uttare manuṣyadharme ṛddhiprātihāryaṃ vidarśayitum

12.317

भगवानुत्तरे मनुष्यधर्मे ऋद्धिप्रातिहार्यम् विदर्शयतु हिताय प्राणिनाम्

bhagavānuttare manuṣyadharme ṛddhiprātihāryam vidarśayatu hitāya prāṇinām

12.318

निर्भर्त्सयतु तीर्थ्यान्

nirbhartsayatu tīrthyān

12.319

नन्दयतु देवमनुष्यान्

nandayatu devamanuṣyān

12.320

तोषयतु सज्जनहृदयमनांसि

toṣayatu sajjanahṛdayamanāṃsi

12.321

अथ भगवांस्तद्रूपं समाधिं समापन्नो यथा समाहिते चित्ते स्वस्मिन्नासने ऽन्तर्हितः पूर्वस्यां दिशि उपरिविहायसमभ्युद्गम्य चतुर्विधमीर्यापथं कल्पयति तद्यथा चङ्क्रम्यते तिष्ठति निषीदति शय्यां कल्पयति

atha bhagavāṃstadrūpaṃ samādhiṃ samāpanno yathā samāhite citte svasminnāsane 'ntarhitaḥ pūrvasyāṃ diśi uparivihāyasamabhyudgamya caturvidhamīryāpathaṃ kalpayati tadyathā caṅkramyate tiṣṭhati niṣīdati śayyāṃ kalpayati

12.322

तेजोधातुमपि सम्पद्यते

tejodhātumapi sampadyate

12.323

तेजोधातुसमापन्नस्य बुद्धस्य भगवतो विविधान्यर्चींषि कायान्निश्चरन्ति तद्यथा नीलपीतानि लोहितान्यवदातानि मञ्जिष्ठानि स्फटिकवर्णानि

tejodhātusamāpannasya buddhasya bhagavato vividhānyarcīṃṣi kāyānniścaranti tadyathā nīlapītāni lohitānyavadātāni mañjiṣṭhāni sphaṭikavarṇāni

12.324

अनेकान्यपि प्रातिहार्याणि विदर्शयति

anekānyapi prātihāryāṇi vidarśayati

12.325

अधःकायं प्रज्वालयति उपरिमात् कायाच्छीतला वारिधाराः स्यन्दन्ते

adhaḥkāyaṃ prajvālayati uparimāt kāyācchītalā vāridhārāḥ syandante

12.326

यथा पूर्वस्यां दिशि एवं दक्षिणस्यां दिशीति चतुर्दिशं चतुर्विधम् ऋद्धिप्रातिहार्यं विदर्श्य तान् ऋद्ध्यभिसंस्कारान् प्रतिप्रस्रभ्य प्रज्ञप्त एवासने निषण्णः

yathā pūrvasyāṃ diśi evaṃ dakṣiṇasyāṃ diśīti caturdiśaṃ caturvidham ṛddhiprātihāryaṃ vidarśya tān ṛddhyabhisaṃskārān pratiprasrabhya prajñapta evāsane niṣaṇṇaḥ

12.327

निषद्य भगवान् राजानं प्रसेनजितं कौशलमिदमवोचत् इयं महाराज तथागतस्य सर्वश्रावकसाधारणा ऋद्धिः

niṣadya bhagavān rājānaṃ prasenajitaṃ kauśalamidamavocat iyaṃ mahārāja tathāgatasya sarvaśrāvakasādhāraṇā ṛddhiḥ

12.328

तत्र भगवान् द्विरपि राजानं प्रसेनजितं कौशलमामन्त्रयते को महाराज तथागतमध्येषते ऽसाधारणायाम् ऋद्ध्यामुत्तरे मनुष्यधर्मे ऋद्धिप्रातिहार्यं हिताय प्राणिनाम् अथ राजा प्रसेनजित् कौशल उत्थायासनाद् एकांसमुत्तरासङ्गं कृत्वा दक्षिणं जानुमण्डलं पृथिव्यां प्रतिष्ठाप्य येन भगवांस्तेनाञ्जलिं प्रणम्य भगवन्तमिदमवोचत् अहं भदन्त भगवन्तमध्येषे ऽसाधारणायाम् ऋद्ध्यामुत्तरे मनुष्यधर्मे ऋद्धिप्रातिहार्यं हिताय प्राणिनाम्

tatra bhagavān dvirapi rājānaṃ prasenajitaṃ kauśalamāmantrayate ko mahārāja tathāgatamadhyeṣate 'sādhāraṇāyām ṛddhyāmuttare manuṣyadharme ṛddhiprātihāryaṃ hitāya prāṇinām atha rājā prasenajit kauśala utthāyāsanād ekāṃsamuttarāsaṅgaṃ kṛtvā dakṣiṇaṃ jānumaṇḍalaṃ pṛthivyāṃ pratiṣṭhāpya yena bhagavāṃstenāñjaliṃ praṇamya bhagavantamidamavocat ahaṃ bhadanta bhagavantamadhyeṣe 'sādhāraṇāyām ṛddhyāmuttare manuṣyadharme ṛddhiprātihāryaṃ hitāya prāṇinām

12.329

निर्भर्त्सयतु तीर्थ्यान्

nirbhartsayatu tīrthyān

Divyāvadāna