12.47

चत्वारि श्रमणो गौतमो वयमष्टौ

catvāri śramaṇo gautamo vayamaṣṭau

12.48

अष्टौ श्रमणो गौतमः वयं षोडश

aṣṭau śramaṇo gautamaḥ vayaṃ ṣoḍaśa

12.49

षोडश श्रमणो गौतमः वयं द्वात्रिंशदिति यावच्छ्रमणो गौतम उत्तरे मनुष्यधर्म ऋद्धिप्रातिहार्यं विदर्शयिष्यति वयं तद्द्विगुणं तत्त्रिगुणम् ऋद्धिप्रातिहार्यं विदर्शयिष्यामः

ṣoḍaśa śramaṇo gautamaḥ vayaṃ dvātriṃśaditi yāvacchramaṇo gautama uttare manuṣyadharma ṛddhiprātihāryaṃ vidarśayiṣyati vayaṃ taddviguṇaṃ tattriguṇam ṛddhiprātihāryaṃ vidarśayiṣyāmaḥ

12.50

उपार्धं मार्गं श्रमणो गौतम आगच्छतु वयमप्युपार्धं मार्गं गमिष्यामः

upārdhaṃ mārgaṃ śramaṇo gautama āgacchatu vayamapyupārdhaṃ mārgaṃ gamiṣyāmaḥ

12.51

तत्रास्माकं भवतु श्रमणेन गौतमेन सार्धमुत्तरे मनुष्यधर्म ऋद्धिप्रातिहार्यं विदर्शयितुम्

tatrāsmākaṃ bhavatu śramaṇena gautamena sārdhamuttare manuṣyadharma ṛddhiprātihāryaṃ vidarśayitum

12.52

एवमुक्ते राजा मागधः श्रेण्यो बिम्बिसारस्तीर्थ्यानिदमवोचत् यूयमपि शवा भूत्वा भगवता सार्धम् ऋद्धिं प्रारभध्वे अथ पूरणाद्याः षट् शास्तारो ऽसर्वज्ञाः सर्वज्ञज्ञानिनो ऽर्धमार्गे राजानं मागधं श्रेण्यं बिम्बिसारं विज्ञापयन्ति वयं स्मो देव ऋद्धिमन्तो ज्ञानवादिनः

evamukte rājā māgadhaḥ śreṇyo bimbisārastīrthyānidamavocat yūyamapi śavā bhūtvā bhagavatā sārdham ṛddhiṃ prārabhadhve atha pūraṇādyāḥ ṣaṭ śāstāro 'sarvajñāḥ sarvajñajñānino 'rdhamārge rājānaṃ māgadhaṃ śreṇyaṃ bimbisāraṃ vijñāpayanti vayaṃ smo deva ṛddhimanto jñānavādinaḥ

12.53

श्रमणो ऽपि गौतम ऋद्धिमाञ्ज्ञानवादीत्यात्मानं प्रतिजानीते

śramaṇo 'pi gautama ṛddhimāñjñānavādītyātmānaṃ pratijānīte

12.54

अर्हति ज्ञानवादी ज्ञानवादिना सार्धमुत्तरे मनुष्यधर्म ऋद्धिप्रातिहार्यं विदर्शयितुम्

arhati jñānavādī jñānavādinā sārdhamuttare manuṣyadharma ṛddhiprātihāryaṃ vidarśayitum

12.55

यावत् तत्रास्माकं भवतु श्रमणेन गौतमेन सार्धमुत्तरे मनुष्यधर्म ऋद्धिप्रातिहार्यं विदर्शयितुम्

yāvat tatrāsmākaṃ bhavatu śramaṇena gautamena sārdhamuttare manuṣyadharma ṛddhiprātihāryaṃ vidarśayitum

12.56

एवमुक्ते राजा मागधः श्रेण्यो बिम्बिसारस्तांस्तीर्थिकपरिव्राजकानिदमवोचत् यद्येवं त्रिरप्येतमर्थं विज्ञापयिष्यथ निर्विषयान् वः करिष्यामि

evamukte rājā māgadhaḥ śreṇyo bimbisārastāṃstīrthikaparivrājakānidamavocat yadyevaṃ trirapyetamarthaṃ vijñāpayiṣyatha nirviṣayān vaḥ kariṣyāmi

12.57

अथ तीर्थ्यानामेतदभवत् अयं राजा मागधः श्रेण्यो बिम्बिसारः श्रमणस्य गौतमस्य श्रावकः बिम्बिसारस्तिष्ठतु

atha tīrthyānāmetadabhavat ayaṃ rājā māgadhaḥ śreṇyo bimbisāraḥ śramaṇasya gautamasya śrāvakaḥ bimbisārastiṣṭhatu

12.58

राजा प्रसेनजित् कौशलो मध्यस्थः

rājā prasenajit kauśalo madhyasthaḥ

12.59

यदा श्रमणो गौतमः श्रावस्तीं गमिष्यति तत्र वयं गत्वा श्रमणं गौतममुत्तरे मनुष्यधर्म ऋद्धिप्रातिहार्ये आह्वयिष्यामः

yadā śramaṇo gautamaḥ śrāvastīṃ gamiṣyati tatra vayaṃ gatvā śramaṇaṃ gautamamuttare manuṣyadharma ṛddhiprātihārye āhvayiṣyāmaḥ

12.60

इत्युक्त्वा प्रक्रान्ताः

ityuktvā prakrāntāḥ

12.61

अथ राजा मागधः श्रेण्यो बिम्बिसारो ऽन्यतमं पुरुषमामन्त्रयते गच्छ त्वं भोः पुरुष क्षिप्रम्

atha rājā māgadhaḥ śreṇyo bimbisāro 'nyatamaṃ puruṣamāmantrayate gaccha tvaṃ bhoḥ puruṣa kṣipram

12.62

भद्रं यानं योजय यत्राहमधिरुह्य भगवन्तं दर्शनायोपसंक्रमिष्यामि पर्युपासनायै

bhadraṃ yānaṃ yojaya yatrāhamadhiruhya bhagavantaṃ darśanāyopasaṃkramiṣyāmi paryupāsanāyai

12.63

एवं देवेति स पुरुषो राज्ञो मागधस्य श्रेण्यस्य बिम्बिसारस्य प्रतिश्रुत्य क्षिप्रं भद्रं यानं योजयित्वा येन राजा मागधः श्रेण्यो बिम्बिसारस्तेनोपसंक्रान्तः

evaṃ deveti sa puruṣo rājño māgadhasya śreṇyasya bimbisārasya pratiśrutya kṣipraṃ bhadraṃ yānaṃ yojayitvā yena rājā māgadhaḥ śreṇyo bimbisārastenopasaṃkrāntaḥ

12.64

उपसंक्रम्य राजानं मागधं श्रेण्यं बिम्बिसारमिदमवोचत् युक्तं देवस्य भद्रं यानं यस्येदानीं देवः कालं मन्यत इति

upasaṃkramya rājānaṃ māgadhaṃ śreṇyaṃ bimbisāramidamavocat yuktaṃ devasya bhadraṃ yānaṃ yasyedānīṃ devaḥ kālaṃ manyata iti

12.65

अथ राजा मागधः श्रेण्यो बिम्बिसारो भद्रं यानमभिरुह्य राजगृहान्निर्याति भगवतो ऽन्तिकं भगवन्तं दर्शनायोपसंक्रमितुं पर्युपासनाय

atha rājā māgadhaḥ śreṇyo bimbisāro bhadraṃ yānamabhiruhya rājagṛhānniryāti bhagavato 'ntikaṃ bhagavantaṃ darśanāyopasaṃkramituṃ paryupāsanāya

12.66

तस्य यावती यानस्य भूमिस्तावद्यानेन गत्वा यानादवतीर्य पद्भ्यामेवारामं प्राविक्षत्

tasya yāvatī yānasya bhūmistāvadyānena gatvā yānādavatīrya padbhyāmevārāmaṃ prāvikṣat

Divyāvadāna