10.34

स तेन गृहपतिना दृष्टश्चित्तप्रासादिकः कायप्रासादिकश्च

sa tena gṛhapatinā dṛṣṭaścittaprāsādikaḥ kāyaprāsādikaśca

10.35

दृष्ट्वा च पुनः संलक्षयति एतदप्यहं परित्यज्य नियतं प्राणैर्वियोक्ष्ये यन्न्वहं स्वप्रत्यंशमस्मै प्रव्रजिताय दद्यामिति

dṛṣṭvā ca punaḥ saṃlakṣayati etadapyahaṃ parityajya niyataṃ prāṇairviyokṣye yannvahaṃ svapratyaṃśamasmai pravrajitāya dadyāmiti

10.36

तेन भार्या अभिहिता भद्रे यो मम प्रत्यंशस्तमहमस्मै प्रव्रजितायानुप्रयच्छामीति

tena bhāryā abhihitā bhadre yo mama pratyaṃśastamahamasmai pravrajitāyānuprayacchāmīti

10.37

सा संलक्षयति मम स्वामी न परिभुङ्क्ते कथमहं परिभोक्ष्य इति

sā saṃlakṣayati mama svāmī na paribhuṅkte kathamahaṃ paribhokṣya iti

10.38

सा कथयति आर्यपुत्र अहमपि प्रत्यंशमस्मै प्रयच्छामि

sā kathayati āryaputra ahamapi pratyaṃśamasmai prayacchāmi

10.39

एवं पुत्रेण स्नुषया दासेन दास्या च विचार्य स्वस्वप्रत्यंशाः परित्यक्ताः

evaṃ putreṇa snuṣayā dāsena dāsyā ca vicārya svasvapratyaṃśāḥ parityaktāḥ

10.40

ततस्तैः सर्वैः सम्भूय प्रत्येकबुद्धः पिण्डकेन प्रतिपादितः

tatastaiḥ sarvaiḥ sambhūya pratyekabuddhaḥ piṇḍakena pratipāditaḥ

10.41

कायिकी तेषां महात्मनां धर्मदेशना न वाचिकी

kāyikī teṣāṃ mahātmanāṃ dharmadeśanā na vācikī

10.42

स विततपक्ष इव हंसराज उपरि विहायसमुद्गम्य ज्वलनतपनवर्षणविद्योतनप्रातिहार्याणि कर्तुमारब्धः

sa vitatapakṣa iva haṃsarāja upari vihāyasamudgamya jvalanatapanavarṣaṇavidyotanaprātihāryāṇi kartumārabdhaḥ

10.43

आशु पृथग्जनावर्जनकरी ऋद्धिः

āśu pṛthagjanāvarjanakarī ṛddhiḥ

10.44

ते मूलनिकृत्ता इव द्रुमाः पादयोर् निपत्य प्रणिधानं कर्तुमारब्धाः

te mūlanikṛttā iva drumāḥ pādayor nipatya praṇidhānaṃ kartumārabdhāḥ

10.45

गृहपतिः प्रणिधानं कर्तुमारब्धः यन्मया एवंविधे सद्भूतदक्षिणीये कारः कृतः अनेनाहं कुशलमूलेन यदि रिक्तकानि कोशकोष्ठागाराणि सहदर्शनान्मे पूर्णानि स्युर् एवंविधानां च धर्माणां लाभी स्याम् प्रतिविशिष्टतरं चातः शास्तारमारागयेयं मा विरागयेयमिति

gṛhapatiḥ praṇidhānaṃ kartumārabdhaḥ yanmayā evaṃvidhe sadbhūtadakṣiṇīye kāraḥ kṛtaḥ anenāhaṃ kuśalamūlena yadi riktakāni kośakoṣṭhāgārāṇi sahadarśanānme pūrṇāni syur evaṃvidhānāṃ ca dharmāṇāṃ lābhī syām prativiśiṣṭataraṃ cātaḥ śāstāramārāgayeyaṃ mā virāgayeyamiti

10.46

पत्नी प्रणिधानं कर्तुमारब्धा यन्मया एवंविधे सद्भूतदक्षिणीये कारः कृतः अनेनाहं कुशलमूलेन यद्येकस्यार्थाय स्थालीं पचेयम् सा शतेनापि परिभुज्येत सहस्रेणापि न परिक्षयं गच्छेत् यावन्मया प्रयोगो ऽप्रतिप्रश्रब्धः इत्येवंविधानां च धर्माणां लाभिनी स्याम् प्रतिविशिष्टतरं चातः शास्तारमारागयेयं मा

patnī praṇidhānaṃ kartumārabdhā yanmayā evaṃvidhe sadbhūtadakṣiṇīye kāraḥ kṛtaḥ anenāhaṃ kuśalamūlena yadyekasyārthāya sthālīṃ paceyam sā śatenāpi paribhujyeta sahasreṇāpi na parikṣayaṃ gacchet yāvanmayā prayogo 'pratipraśrabdhaḥ ityevaṃvidhānāṃ ca dharmāṇāṃ lābhinī syām prativiśiṣṭataraṃ cātaḥ śāstāramārāgayeyaṃ mā

10.47

पुत्रः प्रणिधानं कर्तुमारब्धो यन्मया एवंविधे सद्भूतदक्षिणीये कारः कृतः अनेनाहं कुशलमूलेन पञ्चशतिको नकुलकः कट्यामुपरिबद्धस्तिष्ठेत् यदि च शतं वा सहस्रं वा ततो व्ययं कुर्यात् पूर्ण एव तिष्ठेत् मा परिक्षयं गच्छेत् एवंविधानां च धर्माणां लाभी स्याम् प्रतिविशिष्टतरं चातः शास्तारमारागयेयं मा विरागयेयमिति

putraḥ praṇidhānaṃ kartumārabdho yanmayā evaṃvidhe sadbhūtadakṣiṇīye kāraḥ kṛtaḥ anenāhaṃ kuśalamūlena pañcaśatiko nakulakaḥ kaṭyāmuparibaddhastiṣṭhet yadi ca śataṃ vā sahasraṃ vā tato vyayaṃ kuryāt pūrṇa eva tiṣṭhet mā parikṣayaṃ gacchet evaṃvidhānāṃ ca dharmāṇāṃ lābhī syām prativiśiṣṭataraṃ cātaḥ śāstāramārāgayeyaṃ mā virāgayeyamiti

10.48

स्नुषा प्रणिधानं कर्तुमारब्धा यन्मया एवंविधे सद्भूतदक्षिणीये कारः कृतः अनेनाहं कुशलमूलेन यद्येकस्य गन्धम् योजयेयम् शतं वा गन्धं घ्रास्यति तं न च परिक्षयं गच्छेयुर्यावन्मया अप्रतिप्रश्रब्धम् एवंविधानां धर्माणां लाभिनी स्याम् प्रतिविशिष्टतरं चातः शास्तारमारागयेयं मा विरागयेयमिति

snuṣā praṇidhānaṃ kartumārabdhā yanmayā evaṃvidhe sadbhūtadakṣiṇīye kāraḥ kṛtaḥ anenāhaṃ kuśalamūlena yadyekasya gandham yojayeyam śataṃ vā gandhaṃ ghrāsyati taṃ na ca parikṣayaṃ gaccheyuryāvanmayā apratipraśrabdham evaṃvidhānāṃ dharmāṇāṃ lābhinī syām prativiśiṣṭataraṃ cātaḥ śāstāramārāgayeyaṃ mā virāgayeyamiti

10.49

दासः प्रणिधानं कर्तुमारब्धः यन्मया एवंविधे सद्भूतदक्षिणीये कारः कृतः अनेनाहं कुशलमूलेन यद्येकहलसीरं कृषेयम् सप्त सीराः कृष्टाः स्युः एवंविधानां धर्माणां च लाभी स्यां प्रतिविशिष्टतरं चातः शास्तारमारागयेयं मा विरागयेयमिति

dāsaḥ praṇidhānaṃ kartumārabdhaḥ yanmayā evaṃvidhe sadbhūtadakṣiṇīye kāraḥ kṛtaḥ anenāhaṃ kuśalamūlena yadyekahalasīraṃ kṛṣeyam sapta sīrāḥ kṛṣṭāḥ syuḥ evaṃvidhānāṃ dharmāṇāṃ ca lābhī syāṃ prativiśiṣṭataraṃ cātaḥ śāstāramārāgayeyaṃ mā virāgayeyamiti

10.50

दासी प्रणिधानं कर्तुमारब्धा एवंविधे सद्भूतदक्षिणीये कारः कृतः अनेनाहं कुशलमूलेन यद्येकां मात्रामारभेयम् सप्त मात्राः संपद्येरन् एवंविधानां धर्माणां च लाभिनी स्यां प्रतिविशिष्टतरं चातः शास्तारमारागयेयं मा विरागयेयमिति

dāsī praṇidhānaṃ kartumārabdhā evaṃvidhe sadbhūtadakṣiṇīye kāraḥ kṛtaḥ anenāhaṃ kuśalamūlena yadyekāṃ mātrāmārabheyam sapta mātrāḥ saṃpadyeran evaṃvidhānāṃ dharmāṇāṃ ca lābhinī syāṃ prativiśiṣṭataraṃ cātaḥ śāstāramārāgayeyaṃ mā virāgayeyamiti

10.51

तैश्चैवं प्रणिधानं कृतम्

taiścaivaṃ praṇidhānaṃ kṛtam

10.52

स च महात्मा प्रत्येकबुद्धस्तेषामनुकम्पया ऋद्ध्या उपरि विहायसा राजकुलस्योपरिष्टात् सम्प्रस्थितः

sa ca mahātmā pratyekabuddhasteṣāmanukampayā ṛddhyā upari vihāyasā rājakulasyopariṣṭāt samprasthitaḥ

10.53

तेन खलु समयेन राजा ब्रह्मदत्त उपरिप्रासादतलगतस्तिष्ठति

tena khalu samayena rājā brahmadatta upariprāsādatalagatastiṣṭhati

Divyāvadāna