9.79

ततो हृष्टतुष्टप्रमुदिता प्रदीपमादाय सोपानेनावतीर्य येन भगवांस्तेनोपसंक्रान्ता

tato hṛṣṭatuṣṭapramuditā pradīpamādāya sopānenāvatīrya yena bhagavāṃstenopasaṃkrāntā

9.80

उपसंक्रम्य भगवतः पुरस्तात् प्रदीपं स्थापयित्वा पादौ शिरसा वन्दित्वा निषण्णा धर्मश्रवणाय

upasaṃkramya bhagavataḥ purastāt pradīpaṃ sthāpayitvā pādau śirasā vanditvā niṣaṇṇā dharmaśravaṇāya

9.81

ततो भगवता तस्या आशयानुशयं धातुं प्रकृतिं च ज्ञात्वा तादृशी चतुरार्यसत्यसम्प्रतिवेधिकी पूर्ववद्यावच्छरणगतामभिप्रसन्नामिति

tato bhagavatā tasyā āśayānuśayaṃ dhātuṃ prakṛtiṃ ca jñātvā tādṛśī caturāryasatyasamprativedhikī pūrvavadyāvaccharaṇagatāmabhiprasannāmiti

9.82

अथ भगवांस्तां दारिकामिदमवोचत् एहि त्वं दारिके येन मेण्ढको गृहपतिस्तेनोपसंक्रम उपसंक्रम्यैवं मद्वचनादारोग्यापय एवं च वद गृहपते त्वामुद्दिश्याहमिहागतः त्वं च द्वारं बद्ध्वा स्थितः

atha bhagavāṃstāṃ dārikāmidamavocat ehi tvaṃ dārike yena meṇḍhako gṛhapatistenopasaṃkrama upasaṃkramyaivaṃ madvacanādārogyāpaya evaṃ ca vada gṛhapate tvāmuddiśyāhamihāgataḥ tvaṃ ca dvāraṃ baddhvā sthitaḥ

9.83

युक्तमेतदेवमतिथेः प्रतिपत्तुम् यथा त्वम् प्रतिपन्न इति यदि कथयति गणेन क्रियाकारः कृत इति वक्तव्यस् तव पुत्रस्य पञ्चशतिको नकुलकः कट्यां बद्धस्तिष्ठति

yuktametadevamatitheḥ pratipattum yathā tvam pratipanna iti yadi kathayati gaṇena kriyākāraḥ kṛta iti vaktavyas tava putrasya pañcaśatiko nakulakaḥ kaṭyāṃ baddhastiṣṭhati

9.84

स यदि शतं वा सहस्रं वा व्ययीकरोति पूर्यत एव न परिक्षीयते

sa yadi śataṃ vā sahasraṃ vā vyayīkaroti pūryata eva na parikṣīyate

9.85

न शक्नोषि षष्टिकार्षापणं दत्त्वा आगन्तुमिति एवं भदन्तेति सा दारिका भगवतः प्रतिश्रुत्य सम्प्रस्थिता

na śaknoṣi ṣaṣṭikārṣāpaṇaṃ dattvā āgantumiti evaṃ bhadanteti sā dārikā bhagavataḥ pratiśrutya samprasthitā

9.86

यथापरिज्ञातैव केनचिदेव मेण्ढकस्य गृहपतेः सकाशं गता

yathāparijñātaiva kenacideva meṇḍhakasya gṛhapateḥ sakāśaṃ gatā

9.87

गत्वा च कथयति गृहपते भगवांस्त आरोग्ययति

gatvā ca kathayati gṛhapate bhagavāṃsta ārogyayati

9.88

स कथयति वन्दे बुद्धं भगवन्तम्

sa kathayati vande buddhaṃ bhagavantam

9.89

गृहपते भगवानेवमाह त्वामेवाहमुद्दिश्यागतः त्वं च द्वारं बद्ध्वा अवस्थितः

gṛhapate bhagavānevamāha tvāmevāhamuddiśyāgataḥ tvaṃ ca dvāraṃ baddhvā avasthitaḥ

9.90

युक्तमेतदेवमतिथेः प्रतिपत्तुम् यथा त्वं प्रतिपन्न इति स कथयति दारिके गणेन क्रियाकारः कृतः न केनचिच्छ्रमणं गौतमं दर्शनाय उपसंक्रमितव्यम्

yuktametadevamatitheḥ pratipattum yathā tvaṃ pratipanna iti sa kathayati dārike gaṇena kriyākāraḥ kṛtaḥ na kenacicchramaṇaṃ gautamaṃ darśanāya upasaṃkramitavyam

9.91

य उपसंक्रामति स गणेन षष्टिकार्षापणो दण्ड्य इति

ya upasaṃkrāmati sa gaṇena ṣaṣṭikārṣāpaṇo daṇḍya iti

9.92

गृहपते भगवान् कथयति तव पुत्रस्य पञ्चशतिको नकुलकः कट्यां बद्धस्तिष्ठति

gṛhapate bhagavān kathayati tava putrasya pañcaśatiko nakulakaḥ kaṭyāṃ baddhastiṣṭhati

9.93

स यदि शतं वा सहस्रं वा व्ययीकरोति पूर्यत एव न परिक्षीयते

sa yadi śataṃ vā sahasraṃ vā vyayīkaroti pūryata eva na parikṣīyate

9.94

न शक्नोषि त्वं षष्टिकार्षापणं दत्त्वा आगन्तुमिति स संलक्षयति न कश्चिदेतज्जानीते

na śaknoṣi tvaṃ ṣaṣṭikārṣāpaṇaṃ dattvā āgantumiti sa saṃlakṣayati na kaścidetajjānīte

9.95

नूनं सर्वज्ञः स भगवान्

nūnaṃ sarvajñaḥ sa bhagavān

9.96

गच्छामीति

gacchāmīti

9.97

स षष्टिकार्षापणान् द्वारे स्थापयित्वा ब्राह्मणदारिकोपदिष्टेन सोपानेनावतीर्य येन भगवांस्तेनोपसंक्रान्तः

sa ṣaṣṭikārṣāpaṇān dvāre sthāpayitvā brāhmaṇadārikopadiṣṭena sopānenāvatīrya yena bhagavāṃstenopasaṃkrāntaḥ

9.98

उपसंक्रम्य भगवतः पादौ शिरसा वन्दित्वा भगवतः पुरस्तान्निषण्णो धर्मश्रवणाय

upasaṃkramya bhagavataḥ pādau śirasā vanditvā bhagavataḥ purastānniṣaṇṇo dharmaśravaṇāya

Divyāvadāna