9.20

सर्वज्ञसंताननिवासिनी हि कारुण्यधेनुर् मृगयत्यखिन्ना

sarvajñasaṃtānanivāsinī hi kāruṇyadhenur mṛgayatyakhinnā

9.20.2

वैनेयवत्सान् भवदुर्गनष्टान् वत्सान् प्रणष्टानिव वत्सला गौः

vaineyavatsān bhavadurganaṣṭān vatsān praṇaṣṭāniva vatsalā gauḥ

9.21

भगवान् संलक्षयति अयं मेण्ढको गृहपतिः सपरिवारो भद्रंकरे नगरे प्रतिवसति

bhagavān saṃlakṣayati ayaṃ meṇḍhako gṛhapatiḥ saparivāro bhadraṃkare nagare prativasati

9.22

तस्य वैनेयकालं पक्वमिव गण्डं शस्त्राभिनिपातमवेक्षते

tasya vaineyakālaṃ pakvamiva gaṇḍaṃ śastrābhinipātamavekṣate

9.23

यन्न्वहं भद्रंकरेषु जनपदेषु चारिकाम् चरेयम्

yannvahaṃ bhadraṃkareṣu janapadeṣu cārikām careyam

9.24

तत्र भगवानायुष्मन्तमानन्दमामन्त्रयते गच्छ त्वमानन्द भिक्षूणामारोचय तथागतो भिक्षवो भद्रंकरेषु जनपदेषु चारिकां चरिष्यति

tatra bhagavānāyuṣmantamānandamāmantrayate gaccha tvamānanda bhikṣūṇāmārocaya tathāgato bhikṣavo bhadraṃkareṣu janapadeṣu cārikāṃ cariṣyati

9.25

यो युष्माकमुत्सहते तथागतेन सार्धं भद्रंकरेषु जनपदेषु चारिकां चर्तुम् स चीवरकाणि प्रतिगृह्णातु इति

yo yuṣmākamutsahate tathāgatena sārdhaṃ bhadraṃkareṣu janapadeṣu cārikāṃ cartum sa cīvarakāṇi pratigṛhṇātu iti

9.26

एवं भदन्तेत्यायुष्मानानन्दो भगवतः प्रतिश्रुत्य भिक्षूणामारोचयति तथागत आयुष्मन्तो भद्रंकरेषु जनपदेषु चारिकां चरिष्यति

evaṃ bhadantetyāyuṣmānānando bhagavataḥ pratiśrutya bhikṣūṇāmārocayati tathāgata āyuṣmanto bhadraṃkareṣu janapadeṣu cārikāṃ cariṣyati

9.27

यो युष्माकमुत्सहते तथागतेन सार्धं भद्रंकरेषु जनपदेषु चारिकां चरितुम् स चीवरकाणि प्रतिगृह्णातु इति

yo yuṣmākamutsahate tathāgatena sārdhaṃ bhadraṃkareṣu janapadeṣu cārikāṃ caritum sa cīvarakāṇi pratigṛhṇātu iti

9.28

एवमायुष्मन्निति ते भिक्षव आयुष्मत आनन्दस्य प्रतिश्रुत्य पृष्ठतः पृष्ठतः समनुबद्धा गच्छन्ति

evamāyuṣmanniti te bhikṣava āyuṣmata ānandasya pratiśrutya pṛṣṭhataḥ pṛṣṭhataḥ samanubaddhā gacchanti

9.29

अथ भगवान् दान्तो दान्तपरिवारः शान्तः शान्तपरिवारो मुक्तो मुक्तपरिवार आश्वस्त आश्वस्तपरिवारो विनीतो विनीतपरिवारो ऽर्हन्नर्हत्परिवारो वीतरागो वीतरागपरिवारः प्रासादिकः प्रासादिकपरिवारः वृषभ इव गोगणपरिवृतः सिंह इव दंष्ट्रिगणपरिवारः हंसराज इव हंसगणपरिवृतः सुपर्ण इव पक्षिगणपरिवृतः विप्र इव शिष्यगणपरिवृतः सुवैद्य इवातुरगणपरिवृतः शूर इव योधगणपरिवृतः देशिक इवाध्वगणपरिवृतः सार्थवाह इव वणिग्गणपरिवृतः श्रेष्ठीव पौरजनपरिवृतः कोट्टराज इव मन्त्रिगणपरिवृतः चक्रवर्तीव पुत्रसहस्रपरिवृतः चन्द्र इव नक्षत्रगणपरिवृतः सूर्य इव रश्मिसहस्रपरिवृतः धृतराष्ट्र इव गन्धर्वगणपरिवृतः विरूढक इव कुम्भाण्डगणपरिवृतो विरूपाक्ष इव नागगणपरिवृतः धनद इव यक्षगणपरिवृतः वेमचित्रिर् इवासुरगणपरिवृतः शक्र इव त्रिदशगणपरिवृतः ब्रह्मेव ब्रह्मकायिकपरिवृतः स्तिमित इव जलनिधिः सजल इव जलनिधिः विमद इव गजपतिः सुदान्तैरिन्द्रियैर् असंक्षोभितेर्यापथप्रचारो द्वात्रिंशता महापुरुषलक्षणैर् अशीत्यानुव्यञ्जनैर्विराजितगात्रो दशभिर्बलैश्चतुर्भिर्वैशारद्यैस्त्रिभिः स्मृत्युपस्थानैर्महाकरुणया च

atha bhagavān dānto dāntaparivāraḥ śāntaḥ śāntaparivāro mukto muktaparivāra āśvasta āśvastaparivāro vinīto vinītaparivāro 'rhannarhatparivāro vītarāgo vītarāgaparivāraḥ prāsādikaḥ prāsādikaparivāraḥ vṛṣabha iva gogaṇaparivṛtaḥ siṃha iva daṃṣṭrigaṇaparivāraḥ haṃsarāja iva haṃsagaṇaparivṛtaḥ suparṇa iva pakṣigaṇaparivṛtaḥ vipra iva śiṣyagaṇaparivṛtaḥ suvaidya ivāturagaṇaparivṛtaḥ śūra iva yodhagaṇaparivṛtaḥ deśika ivādhvagaṇaparivṛtaḥ sārthavāha iva vaṇiggaṇaparivṛtaḥ śreṣṭhīva paurajanaparivṛtaḥ koṭṭarāja iva mantrigaṇaparivṛtaḥ cakravartīva putrasahasraparivṛtaḥ candra iva nakṣatragaṇaparivṛtaḥ sūrya iva raśmisahasraparivṛtaḥ dhṛtarāṣṭra iva gandharvagaṇaparivṛtaḥ virūḍhaka iva kumbhāṇḍagaṇaparivṛto virūpākṣa iva nāgagaṇaparivṛtaḥ dhanada iva yakṣagaṇaparivṛtaḥ vemacitrir ivāsuragaṇaparivṛtaḥ śakra iva tridaśagaṇaparivṛtaḥ brahmeva brahmakāyikaparivṛtaḥ stimita iva jalanidhiḥ sajala iva jalanidhiḥ vimada iva gajapatiḥ sudāntairindriyair asaṃkṣobhiteryāpathapracāro dvātriṃśatā mahāpuruṣalakṣaṇair aśītyānuvyañjanairvirājitagātro daśabhirbalaiścaturbhirvaiśāradyaistribhiḥ smṛtyupasthānairmahākaruṇayā ca

9.30

एवमनेकगुणगणसमन्वागतो बुद्धो भगवाञ् जनपदचारिकया भद्रंकरं नगरं सम्प्रस्थितः

evamanekaguṇagaṇasamanvāgato buddho bhagavāñ janapadacārikayā bhadraṃkaraṃ nagaraṃ samprasthitaḥ

9.31

यदा भगवता श्रावस्त्यां महाप्रातिहार्यं विदर्शितम् निर्भर्त्सिता आनन्दिता देवमनुष्याः तोषितानि सज्जनहृदयानि तदा भग्नप्रभावास्तीर्थ्याः प्रत्यन्तान् संश्रिताः

yadā bhagavatā śrāvastyāṃ mahāprātihāryaṃ vidarśitam nirbhartsitā ānanditā devamanuṣyāḥ toṣitāni sajjanahṛdayāni tadā bhagnaprabhāvāstīrthyāḥ pratyantān saṃśritāḥ

9.32

ततः केचिद्भद्रंकरं नगरं गत्वा अवस्थिताः

tataḥ kecidbhadraṃkaraṃ nagaraṃ gatvā avasthitāḥ

9.33

तैः श्रुतं श्रमणगौतम आगच्छतीति

taiḥ śrutaṃ śramaṇagautama āgacchatīti

9.34

श्रुत्वा च पुनर्व्यथितास्ते परस्परं कथयन्ति पूर्वं तावद्वयं श्रमणेन गौतमेन मध्यदेशान्निर्वासिताः

śrutvā ca punarvyathitāste parasparaṃ kathayanti pūrvaṃ tāvadvayaṃ śramaṇena gautamena madhyadeśānnirvāsitāḥ

9.35

स यदीहागमिष्यति नियतमितो ऽपि निर्वासयिष्यति

sa yadīhāgamiṣyati niyatamito 'pi nirvāsayiṣyati

9.36

तदुपायसंविधानं कर्तव्यमिति

tadupāyasaṃvidhānaṃ kartavyamiti

9.37

ते कुलोपकरणशाला उपसंक्रम्य कथयन्ति धर्मलाभो धर्मलाभः

te kulopakaraṇaśālā upasaṃkramya kathayanti dharmalābho dharmalābhaḥ

9.38

ते कथयन्ति किमिदम् अवलोकिता गमिष्यामः

te kathayanti kimidam avalokitā gamiṣyāmaḥ

Divyāvadāna