9.1

श्रावस्त्यां निदानम्

śrāvastyāṃ nidānam

9.2

तेन खलु समयेन भद्रंकरे नगरे षड् जना महापुण्याः प्रतिवसन्ति मेण्ढको गृहपतिर् मेण्ढकपत्नी मेण्ढकपुत्रो मेण्ढकस्नुषा मेण्ढकदासो मेण्ढकदासी

tena khalu samayena bhadraṃkare nagare ṣaḍ janā mahāpuṇyāḥ prativasanti meṇḍhako gṛhapatir meṇḍhakapatnī meṇḍhakaputro meṇḍhakasnuṣā meṇḍhakadāso meṇḍhakadāsī

9.3

कथं मेण्ढको गृहपतिर्ज्ञातो महापुण्यः स यदि रिक्तकानि कोशकोष्ठागाराणि पश्यति सहदर्शनादेव पूर्यन्ते

kathaṃ meṇḍhako gṛhapatirjñāto mahāpuṇyaḥ sa yadi riktakāni kośakoṣṭhāgārāṇi paśyati sahadarśanādeva pūryante

9.4

एवं मेण्ढको गृहपतिर्ज्ञातो महापुण्यः

evaṃ meṇḍhako gṛhapatirjñāto mahāpuṇyaḥ

9.5

कथं मेण्ढकपत्नी सा एकस्यार्थाय स्थालिकां साधयति शतानि सहस्राणि च भुञ्जते

kathaṃ meṇḍhakapatnī sā ekasyārthāya sthālikāṃ sādhayati śatāni sahasrāṇi ca bhuñjate

9.6

एवं मेण्ढकपत्नी

evaṃ meṇḍhakapatnī

9.7

कथं मेण्ढकपुत्रः तस्य पञ्चशतिको नकुलको कट्यां बद्धस्तिष्ठति

kathaṃ meṇḍhakaputraḥ tasya pañcaśatiko nakulako kaṭyāṃ baddhastiṣṭhati

9.8

स यदि शतं सहस्रं वा परित्यजति तदा पूर्ण एव तिष्ठति न परिक्षीयते

sa yadi śataṃ sahasraṃ vā parityajati tadā pūrṇa eva tiṣṭhati na parikṣīyate

9.9

एवं मेण्ढकपुत्रः

evaṃ meṇḍhakaputraḥ

9.10

कथं मेण्ढकस्नुषा सा एकस्यार्थाय गन्धं सम्पादयति शतसहस्रस्य पर्याप्तिर्भवति

kathaṃ meṇḍhakasnuṣā sā ekasyārthāya gandhaṃ sampādayati śatasahasrasya paryāptirbhavati

9.11

एवं मेण्ढकस्नुषा

evaṃ meṇḍhakasnuṣā

9.12

कथं मेण्ढकदासः स यदैकं हलसीरं कृषति तदा सप्त सीराः कृष्टा भवन्ति

kathaṃ meṇḍhakadāsaḥ sa yadaikaṃ halasīraṃ kṛṣati tadā sapta sīrāḥ kṛṣṭā bhavanti

9.13

एवं मेण्ढकदासः

evaṃ meṇḍhakadāsaḥ

9.14

कथं मेण्ढकदासी महापुण्या सा यदैकं वस्तु रक्षति तत्सप्तगुणं स्यात्

kathaṃ meṇḍhakadāsī mahāpuṇyā sā yadaikaṃ vastu rakṣati tatsaptaguṇaṃ syāt

9.15

यदा एकमात्रं प्रतिजागर्ति तदा सप्त मात्राः संपद्यन्ते

yadā ekamātraṃ pratijāgarti tadā sapta mātrāḥ saṃpadyante

9.16

एवं मेण्ढकदासी महापुण्या

evaṃ meṇḍhakadāsī mahāpuṇyā

9.17

धर्मता खलु बुद्धानां भगवतां महाकारुणिकानां चतुरोघोत्तीर्णानां चतुरृद्धिपादचरणतलसुप्रतिष्ठितानां चतुर्षु संग्रहवस्तुषु दीर्घरात्रकृतपरिचयानां पञ्चाङ्गविप्रतिहीनानां पञ्चगतिसमतिक्रान्तानां षडङ्गसमन्वागतानां षट्पारमितापरिपूर्णानां सप्तबोध्यङ्गकुसुमाढ्यानाम् अष्टाङ्गमार्गदेशिकानां नवानुपूर्वसमापत्तिकुशलानां दशबलबलिनां दशदिक्समापूर्णयशसां दशशतवशवर्तिप्रतिविशिष्टानां त्री रात्रेस्त्रिर्दिवसस्य षट्कृत्वो रात्रिंदिवसस्य बुद्धचक्षुषा लोकं व्यवलोक्य ज्ञानदर्शनं प्रवर्तते को हीयते को वर्धते कः कृच्छ्रप्राप्तः कः संकटप्राप्तः कः संबाधप्राप्तः कः कृच्छ्रसंकटसम्बाधप्राप्तः को ऽपायनिम्नः को ऽपायप्रवणः को ऽपायप्राग्भारः कमहमपायमार्गाद्व्युत्थाप्य स्वर्गफले मोक्षे च प्रतिष्ठापयेयम् कस्य कामपङ्कनिमग्नस्य हस्तोद्धारमनुप्रदद्याम्

dharmatā khalu buddhānāṃ bhagavatāṃ mahākāruṇikānāṃ caturoghottīrṇānāṃ caturṛddhipādacaraṇatalasupratiṣṭhitānāṃ caturṣu saṃgrahavastuṣu dīrgharātrakṛtaparicayānāṃ pañcāṅgavipratihīnānāṃ pañcagatisamatikrāntānāṃ ṣaḍaṅgasamanvāgatānāṃ ṣaṭpāramitāparipūrṇānāṃ saptabodhyaṅgakusumāḍhyānām aṣṭāṅgamārgadeśikānāṃ navānupūrvasamāpattikuśalānāṃ daśabalabalināṃ daśadiksamāpūrṇayaśasāṃ daśaśatavaśavartiprativiśiṣṭānāṃ trī rātrestrirdivasasya ṣaṭkṛtvo rātriṃdivasasya buddhacakṣuṣā lokaṃ vyavalokya jñānadarśanaṃ pravartate ko hīyate ko vardhate kaḥ kṛcchraprāptaḥ kaḥ saṃkaṭaprāptaḥ kaḥ saṃbādhaprāptaḥ kaḥ kṛcchrasaṃkaṭasambādhaprāptaḥ ko 'pāyanimnaḥ ko 'pāyapravaṇaḥ ko 'pāyaprāgbhāraḥ kamahamapāyamārgādvyutthāpya svargaphale mokṣe ca pratiṣṭhāpayeyam kasya kāmapaṅkanimagnasya hastoddhāramanupradadyām

9.18

कमार्यधनविरहितम् आर्यधनैश्वर्याधिपत्ये प्रतिष्ठापयामि कस्यानवरोपितानि कुशलमूलान्यवरोपयेयम् कस्यावरोपितानि परिपाचयेयम् कस्य पक्वानि विमोचयेयम् कस्याज्ञानतिमिरपटलपर्यवनद्धनेत्रस्य ज्ञानाञ्जनशलाकया चक्षुर्विशोधयेयम्

kamāryadhanavirahitam āryadhanaiśvaryādhipatye pratiṣṭhāpayāmi kasyānavaropitāni kuśalamūlānyavaropayeyam kasyāvaropitāni paripācayeyam kasya pakvāni vimocayeyam kasyājñānatimirapaṭalaparyavanaddhanetrasya jñānāñjanaśalākayā cakṣurviśodhayeyam

9.19

अप्येवातिक्रमेद्वेलां सागरो मकरालयः

apyevātikramedvelāṃ sāgaro makarālayaḥ

9.19.2

न तु वैनेयवत्सानां बुद्धो वेलामतिक्रमेत्

na tu vaineyavatsānāṃ buddho velāmatikramet

Divyāvadāna