8.497

तत्र रत्नगुहां समन्विष्य प्रवेष्टव्यम्

tatra ratnaguhāṃ samanviṣya praveṣṭavyam

8.498

सप्तरात्रस्य चात्ययाद्दुष्टनागः स्वपिष्यति

saptarātrasya cātyayādduṣṭanāgaḥ svapiṣyati

8.499

शयिते दुष्टनागे पर्वतमधिरोढव्यम्

śayite duṣṭanāge parvatamadhiroḍhavyam

8.500

तत्र द्रक्ष्यसि समं भूमिप्रदेशमकृष्टोप्तं च तण्डुलफलशालिम् अकणकमतुषं शुचिं निष्पूतिगन्धिकं चतुरङ्गुलपर्यवनद्धम्

tatra drakṣyasi samaṃ bhūmipradeśamakṛṣṭoptaṃ ca taṇḍulaphalaśālim akaṇakamatuṣaṃ śuciṃ niṣpūtigandhikaṃ caturaṅgulaparyavanaddham

8.501

यस्तमष्टम्यां पञ्चदश्यां वा बालाहोऽश्वराजः परिभुज्य सुखी अरोगो बलवान् प्रीणितेन्द्रियः पूर्वकायमभ्युन्नमय्योदानमुदानयति कः पारगामी कः पारगामी कं पारं नयामि स्वस्तिक्षेमाभ्यां जम्बुद्वीपमनुप्रापयामि स त्वयोपसंक्रम्य इदं स्याद्वचनीयम् अहं पारगामी मां पारं नय मां स्वस्तिक्षेमाभ्यां वाराणसीमनुप्रापय

yastamaṣṭamyāṃ pañcadaśyāṃ vā bālāho'śvarājaḥ paribhujya sukhī arogo balavān prīṇitendriyaḥ pūrvakāyamabhyunnamayyodānamudānayati kaḥ pāragāmī kaḥ pāragāmī kaṃ pāraṃ nayāmi svastikṣemābhyāṃ jambudvīpamanuprāpayāmi sa tvayopasaṃkramya idaṃ syādvacanīyam ahaṃ pāragāmī māṃ pāraṃ naya māṃ svastikṣemābhyāṃ vārāṇasīmanuprāpaya

8.502

अथ स सुप्रियो महासार्थवाहस्ताः किन्नरकन्या धर्म्यया कथया संदर्श्य समादाप्य समुत्तेज्य संप्रहर्ष्य मातृदुहितृवत् प्रतिसंमोद्य यथोद्दिष्टेन मार्गेण यथोक्तेन विधिना अनुपूर्वेण तं भूमिप्रदेशमनुप्राप्तः

atha sa supriyo mahāsārthavāhastāḥ kinnarakanyā dharmyayā kathayā saṃdarśya samādāpya samuttejya saṃpraharṣya mātṛduhitṛvat pratisaṃmodya yathoddiṣṭena mārgeṇa yathoktena vidhinā anupūrveṇa taṃ bhūmipradeśamanuprāptaḥ

8.503

स च बालाहोऽश्वराजश्चरन्नेवमाह कः पारगामी कः पारगामी कं पारं नयामि स्वस्तिक्षेमाभ्यां जम्बुद्वीपमनुप्रापयामि ततः सुप्रियो महासार्थवाहो येन बालाहो ऽश्वराजस्तेनोपसंक्रान्तः

sa ca bālāho'śvarājaścarannevamāha kaḥ pāragāmī kaḥ pāragāmī kaṃ pāraṃ nayāmi svastikṣemābhyāṃ jambudvīpamanuprāpayāmi tataḥ supriyo mahāsārthavāho yena bālāho 'śvarājastenopasaṃkrāntaḥ

8.504

उपसंक्रम्य एकांसमुत्तरासङ्गं कृत्वा दक्षिणं जानुमण्डलं पृथिव्यां प्रतिष्ठाप्य येन बालाहो ऽश्वराजस्तेनाञ्जलिं प्रणम्य बालाहमश्वराजमिदमवोचत् अहं पारगामी अहं पारगामी नय माम्

upasaṃkramya ekāṃsamuttarāsaṅgaṃ kṛtvā dakṣiṇaṃ jānumaṇḍalaṃ pṛthivyāṃ pratiṣṭhāpya yena bālāho 'śvarājastenāñjaliṃ praṇamya bālāhamaśvarājamidamavocat ahaṃ pāragāmī ahaṃ pāragāmī naya mām

8.505

स्वस्तिक्षेमाभ्यां वाराणसीमनुप्रापय

svastikṣemābhyāṃ vārāṇasīmanuprāpaya

8.506

एवमुक्ते बालाहो ऽश्वराजः सुप्रियं महासार्थवाहमिदमवोचत् न ते महासार्थवाह मम पृष्ठाधिरूढेन दिशो नावलोकयितव्याः निमीलिताक्षेण ते स्थेयम्

evamukte bālāho 'śvarājaḥ supriyaṃ mahāsārthavāhamidamavocat na te mahāsārthavāha mama pṛṣṭhādhirūḍhena diśo nāvalokayitavyāḥ nimīlitākṣeṇa te stheyam

8.507

इत्युक्त्वा बालाहोऽश्वराजः पृष्ठमुपनामयति

ityuktvā bālāho'śvarājaḥ pṛṣṭhamupanāmayati

8.508

अथ सुप्रियो महासार्थवाहो बालाहस्याश्वराजस्य पृष्ठमधिरुह्य यथानुशिष्टो ऽल्पैश्च क्षणलवमुहूर्तैर्वाराणसीमनुप्राप्तः

atha supriyo mahāsārthavāho bālāhasyāśvarājasya pṛṣṭhamadhiruhya yathānuśiṣṭo 'lpaiśca kṣaṇalavamuhūrtairvārāṇasīmanuprāptaḥ

8.509

स्व उद्याने ऽवतरितः

sva udyāne 'vataritaḥ

8.510

अवतीर्य सुप्रियो महासार्थवाहो बालाहाश्वराजपृष्ठाद् बालाहाश्वराजं त्रिप्रदक्षिणीकृत्य पादाभिवन्दनं करोति

avatīrya supriyo mahāsārthavāho bālāhāśvarājapṛṣṭhād bālāhāśvarājaṃ tripradakṣiṇīkṛtya pādābhivandanaṃ karoti

8.511

ततो बालाहो ऽश्वराजः सुप्रियं महासार्थवाहं संराधयामास साधु साधु महासार्थवाह

tato bālāho 'śvarājaḥ supriyaṃ mahāsārthavāhaṃ saṃrādhayāmāsa sādhu sādhu mahāsārthavāha

8.512

निस्तीर्णानि ते महासमुद्रपर्वतनदीकान्ताराणि

nistīrṇāni te mahāsamudraparvatanadīkāntārāṇi

8.513

पूरिता ते दृढप्रतिज्ञा

pūritā te dṛḍhapratijñā

8.514

सफलीकृतस्ते ऽध्वा

saphalīkṛtaste 'dhvā

8.515

गोपितानीन्द्रियाणि

gopitānīndriyāṇi

8.516

साधिता ते बदरद्वीपमहापत्तनयात्रा

sādhitā te badaradvīpamahāpattanayātrā

Divyāvadāna