8.337

उपसंक्रम्य मघं सार्थवाहमिदमवोचत् देव समुदानीतो मङ्गलपोतः संवरं चारोपितम् यस्येदानीं महासार्थवाहः कालं मन्यते

upasaṃkramya maghaṃ sārthavāhamidamavocat deva samudānīto maṅgalapotaḥ saṃvaraṃ cāropitam yasyedānīṃ mahāsārthavāhaḥ kālaṃ manyate

8.338

अथ मघो महासार्थवाहो बदरद्वीपमहापत्तनगमनकृतबुद्धिः स्वजनबन्धुवर्गपुत्रदारमित्रामात्यज्ञातिसालोहितैः सभृत्यवर्गेण च रोहितकराज्ञा च निवार्यमाणो ऽपि गुणवति फलके बद्ध्वा आशु सुप्रियसार्थवाहसहायो मङ्गलपोतमभिरुह्य महासमुद्रमवतीर्णः

atha magho mahāsārthavāho badaradvīpamahāpattanagamanakṛtabuddhiḥ svajanabandhuvargaputradāramitrāmātyajñātisālohitaiḥ sabhṛtyavargeṇa ca rohitakarājñā ca nivāryamāṇo 'pi guṇavati phalake baddhvā āśu supriyasārthavāhasahāyo maṅgalapotamabhiruhya mahāsamudramavatīrṇaḥ

8.339

अथ मघो महासार्थवाहः सुप्रियस्य महासार्थवाहस्य कथयति अहं बाढग्लानो न शक्यामि स्थितो गन्तुम्

atha magho mahāsārthavāhaḥ supriyasya mahāsārthavāhasya kathayati ahaṃ bāḍhaglāno na śakyāmi sthito gantum

8.340

तदर्हसि शय्यां कल्पयितुम् यत्राहमपाश्रितो गमिष्यामीति

tadarhasi śayyāṃ kalpayitum yatrāhamapāśrito gamiṣyāmīti

8.341

अपि तु अस्मिन् महासमुद्रे यावदेवंविधानि निमित्तानि भवन्ति उदकस्य वर्णसंस्थानानि च मम निवेदयितव्यानि

api tu asmin mahāsamudre yāvadevaṃvidhāni nimittāni bhavanti udakasya varṇasaṃsthānāni ca mama nivedayitavyāni

8.342

यथा अनेकानि योजनशतानि गत्वा अद्राक्षीत् सुप्रियो महासार्थवाह एकपाण्डरं पानीयम्

yathā anekāni yojanaśatāni gatvā adrākṣīt supriyo mahāsārthavāha ekapāṇḍaraṃ pānīyam

8.343

दृष्ट्वा पुनर्मघाय सार्थवाहायारोचयति यत्खलु महासार्थवाह जानीयाः एकपाण्डरं पानीयं पश्यामि

dṛṣṭvā punarmaghāya sārthavāhāyārocayati yatkhalu mahāsārthavāha jānīyāḥ ekapāṇḍaraṃ pānīyaṃ paśyāmi

8.344

एवमुक्ते मघः सार्थवाहः कथयति नैतन्महासार्थवाह एकपाण्डरं पानीयम्

evamukte maghaḥ sārthavāhaḥ kathayati naitanmahāsārthavāha ekapāṇḍaraṃ pānīyam

8.345

अपि तु पश्यसि त्वं दक्षिणकेन महत्सुधापर्वतम् यदिदं तस्यैतदनुभावेन पानीयं रञ्जितम्

api tu paśyasi tvaṃ dakṣiṇakena mahatsudhāparvatam yadidaṃ tasyaitadanubhāvena pānīyaṃ rañjitam

8.346

यत्रैकविंशतिधातुगोत्राणि यं पक्त्वा सुवर्णरूप्यवैडूर्यान्यभिनिर्वर्तन्ते यदेके जाम्बुद्वीपका मनुष्या रत्नान्यादाय प्रतिनिवर्तन्ते

yatraikaviṃśatidhātugotrāṇi yaṃ paktvā suvarṇarūpyavaiḍūryānyabhinirvartante yadeke jāmbudvīpakā manuṣyā ratnānyādāya pratinivartante

8.347

इदं बदरद्वीपमहापत्तनस्य प्रथमनिमित्तम्

idaṃ badaradvīpamahāpattanasya prathamanimittam

8.348

पुनरपि गच्छन् पश्यति सुप्रियो महासार्थवाहः शस्त्रवर्णं पानीयम्

punarapi gacchan paśyati supriyo mahāsārthavāhaḥ śastravarṇaṃ pānīyam

8.349

दृष्ट्वा च पुनर्मघाय सार्थवाहायारोचयति यत् खलु महासार्थवाह जानीयाः शस्त्रवर्णं पानीयं दृश्यते

dṛṣṭvā ca punarmaghāya sārthavāhāyārocayati yat khalu mahāsārthavāha jānīyāḥ śastravarṇaṃ pānīyaṃ dṛśyate

8.350

मघः सार्थवाहः कथयति नैतच्छस्त्रवर्णं पानीयम्

maghaḥ sārthavāhaḥ kathayati naitacchastravarṇaṃ pānīyam

8.351

पश्यसि त्वं दक्षिणकेण महच्छस्त्रपर्वतम्

paśyasi tvaṃ dakṣiṇakeṇa mahacchastraparvatam

8.352

तस्यैतदनुभावेन पानीयं रञ्जितम्

tasyaitadanubhāvena pānīyaṃ rañjitam

8.353

अत्राप्यनेकानि धातुगोत्राणि यं पक्त्वा सुवर्णरूप्यवैदूर्यस्फटिकान्यभिनिर्वर्तन्ते यदेके जाम्बुद्वीपका मनुष्या रत्नान्यादाय प्रतिनिवर्तन्ते

atrāpyanekāni dhātugotrāṇi yaṃ paktvā suvarṇarūpyavaidūryasphaṭikānyabhinirvartante yadeke jāmbudvīpakā manuṣyā ratnānyādāya pratinivartante

8.354

इदं बदरद्वीपमहापत्तनस्य द्वितीयं निमित्तम्

idaṃ badaradvīpamahāpattanasya dvitīyaṃ nimittam

8.355

एवं लोहपर्वतास्ताम्रपर्वता रूप्यपर्वताः सुवर्णपर्वताः स्फटिकपर्वता वैदूर्यपर्वताः

evaṃ lohaparvatāstāmraparvatā rūpyaparvatāḥ suvarṇaparvatāḥ sphaṭikaparvatā vaidūryaparvatāḥ

8.356

अद्राक्षीत् सुप्रियो महासार्थवाहो नीलपीतलोहितावदातं पानीयम् अन्तर्जले च दीपार्चिषः पश्यति दीप्यमानाः

adrākṣīt supriyo mahāsārthavāho nīlapītalohitāvadātaṃ pānīyam antarjale ca dīpārciṣaḥ paśyati dīpyamānāḥ

Divyāvadāna